Demokratlar, texnologiya milyarderi İlon Maskın yeni administrasiya üzərində güclü təsiri ilə bağlı ironiya etmişdilər.
Donald Trampın keçid dövrü üzrə sözçüsü Karolin Leavitt, "Yeni prezidentin Maskın nəzarətində olduğu" iddialarına qarşı çıxıb.
Seçilmiş prezident Donald Trampın komandası, hökumətin bağlanmasının qarşısını almaq üçün nəzərdə tutulan büdcə layihəsinin qəbul edilməməsində İlon Maskın rolunun əhəmiyyətli olması barədə iddialara cavab verib.
Mask çərşənbə günü səhər saatlarında ABŞ Nümayəndələr Palatasının spikeri Mayk Consonun təklif etdiyi iki partiyanın birgə konqres büdcə layihəsini tənqid etmişdi. Daha sonra Tramp və JD Vance ortaq bəyanatla Respublikaçıları bu layihəni dəstəkləməməyə çağırmış, nəticədə planın qəbuluna mane olmuşdular.
Mask "X" (keçmiş Twitter) sosial şəbəkəsində yazmışdı: "Vergilərinizin oğurlanmasına mane olun!" O, büdcə razılaşmasını dəstəkləyənləri ilkin seçkilərdə maliyyə çətinlikləri ilə üzləşdirmək hədəsi ilə xəbərdar etmişdi. Bu hədələr Tramp tərəfindən də paylaşılmışdı.
Federal hökumət, Trampın dəstəklədiyi B planı razılaşmasının cümə axşamı Nümayəndələr Palatasında qəbul edilməməsindən sonra yenidən bağlanma təhlükəsi ilə üz-üzədir.
Bu vəziyyət, Trampın yeni Ağ Ev sözçüsü Karolin Leavitti açıqlama verməyə vadar etdi.
Leavitt "Business Insider"ə açıqlamasında deyib:
"Prezident müvəqqəti büdcə layihəsi ilə bağlı rəsmi mövqeyini açıqlayan kimi, Kapitol Hilldəki Respublikaçılar onun baxışlarını dəstəklədilər. Respublikaçı Partiyasının lideri prezident Donald Trampdır. Nöqtə."
Mask "X" platformasında Consonun layihəsinə qarşı iradlarını paylaşdıqdan sonra Tramp və Vance çərşənbə günü layihənin uğursuz olduğunu, milli borc tavanını həll etmədiyini və Demokratlara çox güzəşt etdiyini bildirmişdilər.
Onlar Respublikaçılara xəbərdarlıq edərək, əgər layihədən imtina etməsələr, gələcəkdə ilkin seçkilərlə üzləşəcəklərini söyləmiş və sadələşdirilmiş yeni bir alternativə keçməyi təklif etmişdilər.
Demokratlar isə texnologiya milyarderi Maskın gələcək administrasiyadakı təsirini ironiya ilə qarşılamışdılar.
Vermont senatoru Berni Sanders (Bernie Sanders) Demokratların tənqidinə başçılıq edərək "X"də belə yazmışdı:
"Demokratlar və Respublikaçılar aylarla hökumətimizi maliyyələşdirmək üçün iki partiyalı bir razılaşma üzərində danışıqlar apardılar. Bu isə dünyanın ən varlı adamı prezident İlon Maskın xoşuna gəlmədi."
Pensilvaniyadan Demokrat nümayəndə Brendan Boyle isə "Respublikaçı Partiyasının lideri İlon Mask" deyə əlavə etmişdi:
"Artıq qərarları o verir."
Barak Obamanın sabiq Ağ Ev müşaviri Devid Akselrod (David Axelrod), yeni Tramp administrasiyasındakı güc mübarizəsindən məmnun olduğunu bildirib və gerçək liderin kim olduğunu sorğulayaraq "X"də sual etmişdi:
"Seçilmiş prezident Mask artıq büdcə danışıqlarına qoşulacaqmı?"
Demokrat nümayəndələr Pramila Ceyapal və Maksvell Alejandro Frost da müzakirələrə qatılmışdılar.
Ceyapal belə yazmışdı:
"Nəzarətin kimdə olduğu aydındır və bu şəxs seçilmiş prezident Donald Tramp deyil. Kölgə prezident İlon Mask bütün gününü Respublikaçıların müvəqqəti büdcə layihəsinə qarşı çıxmağa sərf etdi, layihəni məhv etdi və sonra Tramp onun ardınca getməyi seçdi."
Valyuta.Az
