Tayvan parlamentində gərginlik pik həddə çatıb. Prezident Lai Çinq-tenin partiyası Demokratik Tərəqqi Partiyasının (DPP) üzvləri müxalifətin irəli sürdüyü qanun layihələrini dayandırmaq üçün mübarizə aparıb.
Cümə günü baş verən hadisələrdə millət vəkilləri bir-birlərinə su tökərək və tribunaya barrikadalar quraraq vəziyyəti daha da gərginləşdirib.
DPP millət vəkilləri parlamentin əsas palatasının tribunasını zəbt edib və stullarla barrikada quraraq girişləri bağlayıb. Məqsəd müxalifət blokunun təklif etdiyi üç qanun dəyişikliklərinin qəbuluna mane olmaq olub. Bu qanun dəyişiklikləri seçicilərin yararsız hesab etdikləri seçilmiş məmurları vəzifədən kənarlaşdırmasını çətinləşdirir.
Müxalifətdəki Kuomintang (KMT) və Tayvan Xalq Partiyasını (TPP) tənqid edən DPP üzvləri onları qanun layihələrini səs çoxluğu ilə qəbul etməyə çalışmaqda günahlandırıb və bunu "parlament diktaturası" adlandırıblar.
Hadisələr zamanı DPP üzvləri qanun layihələrinin Tayvanın demokratik sisteminə ciddi zərər verəcəyini iddia edərək qanunların müzakirəsinin dərhal dayandırılmasını tələb ediblər.
Müxalifət partiyaları isə DPP-nin bu hərəkətini qanunverici prosesə zərbə kimi qiymətləndirib və onların parlamentin işini dayandırmaqla demokratiyaya zidd davrandığını bildirib.
Tayvan parlamentində bu cür insidentlər nadir deyil və ölkənin demokratik idarəetmə sistemi daxilində siyasi gərginliklərin bariz nümunəsi olaraq qiymətləndirilir.
