Qəhvənin bağırsaq mikrobiomuna təsiri İtaliyanın Trento Universitetinin rəhbərlik etdiyi genişmiqyaslı tədqiqatda aşkar edilib.
"Cebheinfo.az" xəbər verir ki, dünyanın 25 ölkəsindən 54 mindən çox insanın tibbi məlumatlarını təhlil edən alimlər qəhvə içənlərlə içməyənlər arasında mikrob fərqlərini ətraflı araşdırıblar.
Nəticələr qəhvə içən fərdlərdə bağırsaq mikroblarının müxtəlifliyinin əhəmiyyətli dərəcədə yüksək olduğunu ortaya qoyub.
Xüsusilə, "Lawsonibacter asaccharolyticus" adlı bakteriyaların qəhvə içənlərdə qəhvə içməyənlərə nisbətən 4,5-8 dəfə çox olduğu müəyyən edilib.
Maraqlıdır ki, bu fərq qəhvə istehlakının yüksək olduğu Qərb ölkələrində daha çox nəzərə çarpsa da, Çin və Hindistan kimi kənd bölgələrində nadir hallarda müşahidə edilib.
Qəhvə içməyin bağırsaq mikrobiomuna necə təsir etdiyini anlamaq üçün tədqiqatçılar laboratoriya şəraitində təcrübələr apardılar və kofeinli və kofeinsiz qəhvə növlərini sınaqdan keçirib.
Nəticələr göstərib ki, qəhvənin tərkibindəki bioaktiv komponentlər, xüsusilə quinik turşusu və triqonelin kimi maddələr mikrobların böyüməsinə səbəb olub.
Professor Nikola Seqata qəhvə istehlakı ilə mikrob müxtəlifliyi arasındakı əlaqənin sağlamlığa birbaşa təsirinin hələ tam başa düşülmədiyini vurğulayıb.
Bununla belə, bu tapıntılar qidaların bağırsaq mikrobiomunu formalaşdırmaq gücünü vurğulayır və gələcəkdə fərdiləşdirilmiş qidalanma strategiyalarının hazırlanmasına imkan verə bilər.
Tədqiqat bağırsaq mikrobiomunun ümumi sağlamlığa və immunitet sisteminə təsirini daha yaxşı başa düşmək üçün mühüm addım hesab olunur.
Mütəxəssislər bir daha sağlam bağırsaq mikrobiomu üçün balanslaşdırılmış qidalanmanın vacibliyinə diqqət çəkiblər.
