Azərbaycanda müstəqillik dövründə ilk dəfə tam məsafəyə marafon qaçış yarışı keçirilib.
İdman.biz xəbər verir ki, "Prezident Kuboku" uğrunda yarış 2024-cü ilin "İdman Paytaxtı" olan Qubada baş tutub.
Marafon Gənclər və İdman Nazirliyi, Azərbaycan Atletika Federasiyası və "Zəfər" Qaçış Klubu ilə birgə təşkil olunub. Açılış mərasimində çıxış edən Azərbaycan Atletika Federasiyasının prezidenti Cavid Qurbanov "Prezident Kuboku"nun əhəmiyyətindən danışaraq bu cür kütləvi yarışların davamlı olaraq təşkil ediləcəyini bildirib.
Quba Rayon İcra Hakimiyyətinin başçısı İlqar Mahmudov ilk tam məsafəyə marafonun məhz Qubada keçirilməsinin rayon üçün əlamətdar hadisə olduğunu qeyd edib. Quba-Xaçmaz Regional Gənclər və İdman İdarəsinin rəisi vəzifəsini icra edən Qumru Məmmədova marafon iştirakçılarına onları gözləyən ağır mübarizədə uğurlar arzulayıb.
Marafonda yerli idmançılarla yanaşı, Türkiyə, Rusiya, Gürcüstan, Çin və Belçika təmsilçilərinin də daxil olduğu 132 atlet mübarizə aparıb. Quba Olimpiya İdman Kompleksində start götürən və qaçış məsafəsi 42 km 195 metr olan marafonda iştirakçılar Heydər Əliyev prospekti üzrə hərəkət ediblər. Yekunda kişilərin mübarizəsində Türkiyə təmsilçisi Ahmed Alkanoğlu 02:40:37 göstərici ilə "Prezident kuboku"nun qalibi olub. Elman Abışov 2-ci, Ağa Əliyev 3-cü yeri tutub.
Qadınların mübarizəsində Leyla Abdinova 03:28:48 nəticə ilə fəxri kürsünün ən yüksək pilləsinə qalxıb. Yuliya Belkova finişə 2-ci, Natalya Şiyanova isə 3-cü gəlib. 40, 50 və 60 yaşdan yuxarı iştirakçılar kateqoriyasında müvafiq olaraq kişilərdə Qin Ru, Yadigar Hüseynov və Tapdıq Dadaşov, qadınlarda isə Aynur Kazımova və Gülparə Əliyeva qalib adını qazanıblar.
İdman.biz
