“Neftçi” futbol üzrə Azərbaycan çempionatının (Premyer Liqa) 2024/2025-ci illər mövsümündə səfər qələbəsi qazanmayıb.
Arena.az xəbər verir ki, Bakı klubu cari mövsümdə keçirdiyi 9 qarşılaşmada 5 heç-heçə edib və 4 dəfə uduzub.
“Ağ-qaralar” rəqib meydanında sonuncu dəfə ötən mövsümün son səfərində 3 xal qazanıb. Mayın 18-də “Səbail”lə görüşən “Neftçi” üç cavabsız qol vurub.
Ardınca “Səbail” (1:1), “Araz-Naxçıvan” (1:1), “Şamaxı” (0:0), “Zirə” (0:2), “Qarabağ” (0:4), “Kəpəz” (3:4), “Sabah” (0:0), “Sumqayıt” (0:2) və “Turan Tovuz”un (1:1) qonağı olan paytaxt təmsilçisi 9 matçdan ibarət qələbəsizlik seriyası yaşayıb. Bu, klubun tarixində yeni antirekorddur.
Buna qədər “ağ-qaralar”ın səfərdəki ən uzun qələbəsiz oyunlar seriyası 8 matçdan ibarət idi. 2016-cı ilin avqustundan 2017-ci ilin fevralına qədər olan müddətdə 8 qarşılaşmada 1 heç-heçə və 7 məğlubiyyət qeydə alınıb.
Xatırladaq ki, “Neftçi” 18-ci turda Tovuz səfərindən bir xalla dönmüşdü – 1:1.
