İngiltərə Premyer Liqasının “Tottenhem”lə 17-ci tur səfər oyunu “Liverpul”un misirli ulduz hücumçusu Məhəmməd Salah üçün əlamətdar olub.
Arena.az məlumat verir ki, Salah “qırmızılar”ın 6:3 hesablı qələbəsinə 2 qol və 2 məhsuldar ötürmə ilə töhfəsini verib.
Beləliklə Salah bir oyunda 3 rekorda imza atıb:
– Salah İngiltərə Premyer Liqası tarixində ardıcıl 4 Premyer Liqa mövsümündə 10 və ya daha çox qol vurmuş və 10 və ya daha çox məhsuldar ötürmə vermiş ilk oyunçu olub;
– Salah həmçinin Premyer Liqada Milad bayramı öncəsi “qol və məhsuldar ötürmə” səmərəsi üzrə 26 xal (13+10) xal qazanmağı bacarmış ilk futbolçu olub;
– Eləcə də, Salah Premyer Liqada 252 səmərəli fəaliyyətlə (172 qol və 80 məhsuldar ötürmə) bu yarışda 249 səmərəli fəaliyyətə (175 qol və 74 məhsuldar ötürmə) nail olmuş, “Arsenal”ın fransalı keçmiş hücumçusu Tyerri Anrinin nəticəsini geridə qoyub. Hazırda Salah İngiltərə Premyer Liqası tarixində ümumi səmərəlilik üzrə siyahının 7-ci pilləsində qərarlaşıb. Müvafiq siyahıya “Nyukasl”ın ingilis keçmiş hücumçusu Alan Şirer 328 xalla (260 qol və 68 məhsuldar ötürmə) başçılıq edir.
“Bununla fəxr edirəm” – Salah
Misirli ulduz “Liverpul”un heyətində çıxışı ilə müəyyənləşdirdiyi rekordlar haqda fikrini ifadə edib:
“Oyundan əvvəl bu barədə düşünməmişdim, amma bunu etdiyim üçün şadam, bununla fəxr edirəm və səylə çalışmaqda davam edəcəyəm. Belə böyük klubda buna nail olmaq əladır, amma ən əsası odur ki, oyunda qalib gəldik. Karyeramı harada bitirmək istəsəm də, buna görə şadam”, – BBC “Sky Sports” dərgisinə istinadən Salahdan sitat gətirir.
Məhəmməd Salah 2017-ci ilin iyul ayından “Liverpul”da çıxış edir. İngiltərə nəhəngi həmin vaxt Salahın “Roma”dan transferi müqabilində 42 milyon avro məbləğində xərc çəkib.
Salah cari mövsümdə “qırmızılar”ın heyətində bütün yarışlarda 24 oyuna çıxıb, 18 qol vurub, 15 məhsuldar ötürmə verib.
Salah həmçinin cari mövsüm İngilyərə Premyer Liqasının ən məhsuldar və ən səmərəli oyunçusudur. Misirli ulduzun hesabında Premyer Liqada 15 qol və 11 məhsuldar ötürmə var.
Misirli hücumçunun “Liverpul”un heyətində ümumi statistikası 373 oyun, 229 qol, 103 məhsuldar ötürmədən ibarətdir.
Salah “Liverpul”la bütün mümkün ali klub yarışlarının qalibi olub.
Misirli ulduz həmçinin “Fiorentina”, “Çelsi”, “Bazel” və “Əl-Mukavilun” klublarında çıxış edib.
Məhəmməd Salah hazırda kapitanı olduğu, 2011-ci ilin sentyabr ayında debüt etdiyi Misir yığmasının heyətində 101 oyun keçirib, 58 qol vurub, 33 məhsuldar ötürmə verib.
“Transfermarkt” internet-portalı 32 yaşlı misirli sağ cinah hücumçusunun transfer dəyərini 55 milyon avro məbləğində qiymətləndirir.
