İtlaiya A Seriyasının 17-ci turunda “Parma” il ev oyunu “Roma”nın ukraynalı mərkəz hücumçusu Artyom Dovbik üçün əlamətdar olub.
Arena.az məlumat verir ki, Dovbik “canavarlar”ın 5:0 hesablı möhtəşəm qələbəsinə 1 qol və eyni sayda məhsuldar ötürmə ilə töhfəsini verib.
“Opta Sports” statistik internet-portalının təqdim etdiyi məlumata görə, Dovbik son iki mövsümdə Avropanın beş aparıcı futbol çempionatından 20 fərqli komandaya qarşı oyunlarda ən azı bir qol vurmuş ikinci oyunçu olub.
Daha əvvəl müvafiq nəticəni aşmış ilk futbolçu PSJ-nin fransalı keçmiş hücumçusu, hazırda “Real”da çıxış edən Kilian Mbappe olub. Mbappe 22 komandanın qapısını “dəlib”.
“Roma” Dovbiki bu yay 30,5 milyon avro məbləğ müqabilində “Jirona”dan transfer edib. Bəzi internet mənbələrində, keçidin əlavə üstəliklər də daxil olmaqla, 37 milyon avro məbləğ müqabilində razılaşdırıldığı haqda məlumat var. Ukraynalı futbolçu “canavarlar”la 5 illik – müddəti 2029-cu ilin iyun ayının sonuna qədər qüvvədə olacaq müqavilə razılaşdırıb.
Artyom Dovbik futbola “Slavutiç” (Çerkası) klubunda (sonralar “Çerkasski Dnepr” və “Çerkaşşina” – redaktorun qeydi) qədəm qoyub. Ukraynalı hücumçu karyerası ərzində “Dnepr”, “Zarya” (Beltsı), “Midtyullann”, “Sönderyyuske”, “Dnepr-1” və “Jirona”da çıxış edib.
Cari mövsümündə Dovbik “Roma”nın heyətində bütün yarışlarda 22 oyuna çıxıb, 9 qol vurub və 2 məhsuldar ötürmə verib.
Artyom Dovbik 2021-ci ilin martında debüt etdiyi Ukrayna yığmasının heyətində 35 oyuna 11 qol və 4 məhsuldar ötürmə ilə fərqlənib.
Artyom Dovbikin qənimətlər muzeyində “Midtyullann”la qazandığı Danimarka çempionluğu (2017/2018 və 2019/2020) və Danimarka Kuboku (2018/2019), həmçinin “Sönderyyuske” ilə əldə etdiyi daha bir Danimarka Kuboku (2019/2020) və “Zarya” ilə qalibi olduğu Moldova Kuboku (2015/2016) var.
Fərdi uğurlara gəlincə, Dovbik “Dnepr-1”-in heyətində 2021/2022-ci və 2022/2023-ci illər mövsümündə müvafiq olaraq 14 və 24 qolla 2 dəfə Ukrayna Premyer Liqasının və “Jirona”nın heyətində 2023/2024-cü illər mövsümündə İspaniya La Liqasının 24 qolla ən sərrast futbolçusu olub.
“Transfermarkt” internet-portalı 27 yaşlı ukraynalı hücumçunun transfer dəyərini 30 milyon avro məbləğində qiymətləndirir.
