Braziliyada çay üzərindəki körpünün uçması nəticəsində 2 nəfər ölüb, 16 nəfər itkin düşüb. SİA xarici KİV-ə istinadən xəbər verir ki, ölkə mətbuatında yer alan xəbərə görə, ölkənin şimalındakı Maranhao və Tokantins əyalətlərini birləşdirən Juselino Kubitçek de Oliveyra körpüsü uçub.
Hadisə zamanı 2 nəfərin meyiti tapıldığı halda, itkin düşən 16 nəfərin axtarışları davam edir. Səlahiyyətlilər körpünün uçması zamanı 4 yük maşını, 2 minik avtomobili və 2 motosikletin çaya düşdüyünü açıqlayıb. Sosial mediada paylaşılan görüntülərdə körpünün çökmə anı lentə alınıb. Braziliya prezidenti Luiz İnasio Lula da Silva sosial media hesabından verdiyi açıqlamada həyatını itirənlərin ailələrinə başsağlığı verib və məsələnin yaxından təqib edildiyini bildirib.
