Braziliyalı ulduz hücumçu Neymarın atası oğlunun 2017-ci ildə “Barselona”dan PSJ-yə keçidinin səbəblərindən söhbət açıb.
Arena.az “Jota Jota Podcast”a istinadən, ata Neymarın bu barədə məlumatını təqdim edir:
“PSJ-yə keçid onun öz qərarı idi, o, şəraiti dəyişmək istəyirdi. O vaxt biz “Barselona”da çox mürəkkəb vəziyyətdə idik, çünki idman rəhbərliyinin nə düşündüyünü bilmirdik. Deyəsən, klub onun Messinin yerini tutmasını istəyirdi, Neymar isə bunu istəmirdi. Baxmayaraq ki, mən oğlumun “Barselona”da qalmasını istəsəm də, o, ayrılmaq qərarına gəldi. Son günlərə qədər onu klubda saxlamağa çalışırdıq. Amma o, Messinin yerini tutmaq və “Barselona”nın əsas ulduzu olmaq istəmədiyi üçün getdi”, deyə Neymarın atası vurğulayıb.
“Barselona”ya keçid tamamilə Neymarın qərarı idi”
Ata Neymar oğlunun “Barselona”ya necə gəlişini də xatırladıb:
“Barselona”ya keçid tamamilə onun qərarı idi. Mənim əlimdə “Barselona” və “Real”dan təkliflər vardı. “Real”ın təklifi üç dəfə böyük idi. O isə yox dedi, çünki bu uşaqlarla – Messi və “Barselona”nın qalan oyunçuları ilə birlikdə oynamaq istəyirdi. Neymarın arzusu “Barselona”da oynamaq idi”, deyə ata Neymar xatırlayıb.
Neymar “Santos”un məzunudur. “Ney” 2009-2013-cü illərdə “balıqlar”ın əsas komandasında çıxış edib. Bu müddət ərzində Neymar “Santos”un heyətində 225 oyuna çıxıb, 136 qol və 64 məhsuldar ötürmə ilə fərqlənib.
Neymar 2013-2017-ci illər aralığında “Barselona”da çıxış edib və “blauqrana”nı öz istəyi ilə tərk edərək, PSJ-yə keçib. Bu, hələ də futbol tarixini ən bahalı keçidi olaraq qalmaqdadır – 222 milyon avro məbləğində əməliyyat.
“Ney” “blauqrana”nın heyətində 186 oyuna çıxıb, 105 qol vurub, 76 məhsuldar ötürmə verib. Braziliyalı ulduz “Barselona” ilə İspaniya La Liqasının (2 dəfə), İspaniya Kubokunun (3 dəfə), İspaniya Super Kubokunun, UEFA Çempionlar Liqasının, UEFA Super Kubokunun, FIFA Klub Dünya Kubokunun qalibi olub.
Avropada debütü “Barselona” ilə başlamış Neymar PSJ-də də 6 il keçirdikdən sonra 2023-cü ilin yayında “Əl-Hilal”a keçib. Tərəflər arasında sonradan 1 il uzadılmaq imkanını özündə ehtiva edən, müddəti 2025-ci ilin iyun ayının sonuna qədər nəzərdə tutulmuş müqavilə imzalanıb. Transfer ərəblərə 90 milyon avro məbləğə başa gəlib.
Təcrübəli hücumçu “Əl-Hilal”ın heyətində bütün yarışlarda cəmi 7 oyuna çıxıb, 1 qol vurub, 3 məhsuldar ötürmə verib.
Neymar 2010-cu ilin avqustunda debüt etdiyi Braziliya yığmasının heyətində 128 oyun keçirib, 79 qol vurub, 58 məhsuldar ötürmə verib.
“Transfermarkt” internet-portalı 32 yaşlı braziliyalı hücumçunun transfer dəyərini 15 milyon avro məbləğində qiymətləndirir.
