"Milyardda bir" təsadüf edilən adi toyuq yumurtası Böyük Britaniyadakı hərracda 200 funt sterlinqə satılıb.
Reyting.az BBC kanalına istinadla bildirir ki, bu yumurta Britaniyanın Luventas xeyriyyə təşkilatı tərəfindən hərraca çıxarılıb. Yumurta satışından əldə edilən gəlir Oksfordşirdə müalicə olunan gənclərin psixi sağlamlığının dəstəklənməsinə yönəldiləcək.
Yumurtanı satışa Berkşirin sakini olan Ed Paunell adlı şəxs verib. O, qeyri-adi, həm də nadir hallarda təsadüf edilən bu sfera formalı toyuq yumurtasını Şotlandiyada keçirilən hərracda aldığını söyləyib. Kişi etiraf edib ki, bir neçə pint (təxminən 0,5 litr) pivədən sonra belə bahalı alış-verişə razılıq verib.
Öncə xeyriyyə təşkilatı belə bir qeyri-adi ianənin zarafat olduğunu düşünüb, lakin sonradan bu yumurtanı satışa çıxarmaq qərarına gəliblər.
Fondun sözçüsü Roz Rapp deyib ki, yumurtanın satılmasından çox məmnundurlar.
Rapp bu yumurtanın xeyriyyə üçün 5000 funt sterlinq topladığı hərracda çoxsaylı əşyalardan yalnız biri olduğunu xüsusi qeyd edib.
Yumurtanın ilk sahibi Şotlandiyanın Ayr şəhərinin sakini olub. O, yumurtanı qəsəbə supermarketində satışa qoyulan toyuq yumurtalarının arasından tapıb. Ed Paunell isə bir yumurta alışını çox yaxşı investisiya adlandırıb.
İngiltərədə bu yumurtanın satışını təşkil edən "Thomson Roddick Callan" hərrac evinin nümayəndəsi Devid Miller deyib ki, belə dəyirmi yumurtalar milyardda bir dəfə görünür.
Oqtay QORÇU
