Moskvada 12 arvadı və 29 uşağı olan İvan Suxovun həyat tərzi YouTube-da verdiyi müsahibədən sonra müzakirələrə səbəb olub.
Hafta.az-ın 161.ru-ya istinadən yazdığına görə, Suxov arvadlarının çöldə işləməsini və ictimailəşməsini qadağan edib və bütün xərclərin onun razılığına bağlı olduğunu açıqlayıb. Özünü “kiçik prezident” kimi qələmə verən Suxovun həyat hədəfi ən azı 50 uşaq sahibi olmaqdır.
Xəbərə görə, bu vəziyyət həm cəmiyyətdə, həm də dövlət səviyyəsində geniş əks-səda doğurub. Moskva Uşaq Hüquqları üzrə Ombudsman Olqa Yaroslavskaya uşaqların təhsil və səhiyyə xidmətlərinə çıxışını yoxlamaq üçün ailəyə baş çəkdiyini açıqlayıb. Ailədə qeyri-qanuni hal aşkar edilməsə də, uşaqların mümkün sosial təzyiq və zorakılıqdan zərər çəkmə riskinin olduğu bildirilir.
Rusiya Dövlət Dumasının Ailə, Qadın və Uşaq Komitəsinin sədri Nina Ostanina 75 min rubl gəlirlə 12 həyat yoldaşı və 29 uşağı təmin etməyin mümkün olmadığını müdafiə edib. Ostanina ailənin yaşayış şəraitini tənqid edərək, dövlətin uşaqlar üçün daha yaxşı yaşayış şəraiti təmin etməli olduğunu bildirib. O, həmçinin bildirib ki, Suxovun psixoloji durumu qiymətləndirilməlidir.
Suxovun ənənəvi ailə quruluşuna sadiqliyi bir çox insanlar tərəfindən tənqid edilsə də, o, həyat tərzini müdafiə etməkdədir. O, övladlarını evdə oxutduğunu, ailənin hər bir üzvünün patriarxal qayda ilə yaşamasını təmin etdiyini bildirir. Lakin müsahibədən sonra bu sərəncamın uşaqlara təsiri sosial şəbəkələrdə müzakirə olunmağa başlayıb.
Ombudsman Yaroslavskaya ailədə heç bir qanunun pozulmadığını bildirsə də, ictimai yerlərdə əxlaqi və etik məsələlərin müzakirəsinin uşaqlara mənfi təsir göstərə biləcəyini bildirib.
