"Rusiya-Ukrayna müharibəsi hava yollarını ciddi tədbirlər görməyə məcbur edir".
TV Müsavatın məlumatına görə, politoloq Elxan Şahinoğlu canlı yayımda müsahibəsində bu mövzuya toxunub.
Ekspert Azərbaycana məxsus sərnişin təyyarəsinin Qazaxıstanda qəza enişi etməsini şərh edərkən bildirib.
“Təyyarə qəzaları ilə bağlı risklərdən heç bir ölkə tamamilə sığortalanmayıb. Bakıdan Qroznıya uçan təyyarənin Aktauda məcburi eniş etməsi ilə əlaqədar araşdırmalar başlanıb. Hadisəyə dair bir neçə fərqli versiya səsləndirilib. Əvvəlcə, hava şəraiti səbəbilə təyyarənin marşrutunu dəyişdirdiyi və Qroznıya enə bilmədiyi bildirilib. Digər məlumat isə təyyarənin geri dönərkən quş sürüsü ilə toqquşması ehtimalını gündəmə gətirib.
Rusiyanın bəzi informasiya kanallarında isə iddia olunub ki, Qroznı hava limanı üzərində Ukrayna dronlarının görünməsi səbəbindən təyyarə oraya enə bilməyib. Bu məlumat daha çox Rusiyanın Ukraynaya qarşı apardığı informasiya müharibəsinin bir hissəsi kimi görünür. Bununla, dolayısı ilə qəza ilə bağlı Ukraynanı günahlandırmaq məqsədi güdüldüyü ehtimal edilir.
Ancaq həmin vaxt Ukrayna dronlarının Çeçenistandakı hərbi obyektlərə zərbə endirdiyinə dair heç bir fakt yoxdur. Buna baxmayaraq, Rusiya-Ukrayna müharibəsi, raketlər və dronların yaratdığı təhlükə hava yolları şirkətlərini təhlükəsizlik tədbirlərini gücləndirməyə vadar edir”, - deyə politoloq əlavə edib.
Məlumatın istinadı: TV Müsavat.
Musavat.com
