İngiltərə millisinin və Madrid “Real”ının hücumçusu Cud Bellingem İspaniya La Liqasında dekabr ayının ən yaxşı oyunçusu seçilib.
Arena.az xəbər verir ki, bu barədə La Liqanın rəsmi saytı məlumat yayıb.
Bellingem dekabrda “Real”ın heyətində La Liqa çərçivəsində 5 oyuna çıxıb. O, bu oyunlarda 4 qol vurub, 2 məhsuldar ötürmə verib.
21 yaşlı oyunçu səsvermədə Antuan Qrizmann (“Atletiko”, Madrid), Rafinya Dias (“Barselona”), Oyan Sanset (“Atletik”) və Sandro Ramiresi (“Las Palmas”) qabaqlayıb.
Bu, Bellingemin üçüncü oxşar uğurudur. O, 2023-cü ilin avqust və oktyabr aylarında da La Liqanın ən yaxşı oyunçusu seçilmişdi.
Bellingem cari mövsümdə ayın ən yaxşısı seçilən ikinci “Real”lıdır. Ötən ay oxşar uğura Madrid klubunun hücumçusu Vinisius Junior imza atmışdı. Əvvəlki aylarda isə bunu “Barselona”nın futbolçuları bacarmışdılar. Rafinya avqustun, Lamin Yamal sentyabrın, Robert Levandovski oktyabrın ən yaxşısı elan edilmişdi.
Xatırladaq ki, Cud Bellingem “Real”a 2023-cü ilin iyun ayının əvvəlində Dormund “Borussiya”sından keçib. “Real” ingilis yarımmüdafiəçinin transferi müqabilində 103 milyon avro ödəyib. Cud İspaniya nəhəngi ilə müddəti 2029-cu ilin iyun ayının sonuna qədər qədər nəzərdə tutulmuş müqaviləyə imza atıb.
Gənc ingilis futbolçunun Madrid klubundakı çıxışı elə, ilk mövsümdəcə uğurlu alınıb. 2023/2024-cü illər mövsümündə Bellingem “Real”ın heyətində bütün yarışlarda 42 oyuna çıxıb, 23 qol və 13 məhsuldar ötürmə ilə fərqlənib.
Cari mövsümdə isə Bellingem “Real” üçün 21 oyun keçirib, 7 qol vurub, 6 məhsuldar ötürmə verib.
Hücumameyilli yarımmüdafiəçinin “Real”ın heyətindəki ümumi göstəriciləri belədir: 64 oyun, 30 qol və 19 məhsuldar ötürmə.
Bellingem elə, ilk mövsümündəcə “Real”la İspaniya Super Kubokunun (2024), İspaniya La Liqasının (2023/2024), UEFA Çempionlar Liqasının (2023/2024) və UEFA Super Kubokunun (2024) qalibi olub. Bu il isə o, Madrid klubu ilə FİFA Qitələrarası Kuboku qazanıb.
Cud Bellingem 2020-ci ilin noyabr ayında debüt etdiyi İngiltərə yığmasının heyətində 40 oyun keçirib, 6 qol vurub və 9 məhsuldar ötürmə verib.
“Transfermarkt” internet-portalı 21 yaşlı ingilis yarımmüdafiəçinin transfer dəyərini 180 milyon avro məbləğində qiymətləndirir.
