"İftar menyusu"nu təqdim edirik:
Əriştəli pendir şorbası
Ərzaqlar:
Süd - 2,5 x/q.
Yumurta - 3 ədəd
Duru pendir - 3 stəkan
Yağ - 1 x/q.
Toyuq filesi - 10 qr.
Soğan - 1 ədəd
Duz zövqə görə
Ət bulyonu
Hazırlanması:
Bir qaba südü və yumurtanı əlavə edib, yaxşıca qarışdır. Üzərinə pendir və duz əlavə edib, qarışdırmağa davam et. Yağda onu blinçik kimi qızartdıqdan sonra, sobada 10 dəqiqə bişir. Soyuduqdan sonra əriştə formasında doğra. Kənarda xırda doğranmış soğanı yağda qızardıb, üzərinə bişmiş toyuq filesini əlavə et. Bir az qovurduqdan sonra əriştəni və bulyonu töküb bişir.
Pastisio
Ərzaqlar:
Zeytun yağı - 1 x/q.
Xırda doğranmış soğan - 1 ədəd
Sarımsaq - 3 diş
Qoyun ətinin qiyməsi - 500 qr.
Xırda doğranmış badımcan - 1/2 ədəd
Tomat pastası - 2 x/q.
Konservləşdirilmiş pomidor - 400 qr.
Zirə - 1 x/q.
Dəfnə yarpağı - 2 ədəd
Tərəvəz bulyonu - 150 ml.
Makaron - 350 qr.
Kərə yağı - 50 qr.
Un - 15 qr.
Süd - 1,5 st.
Yumurta - 1 ədəd
Çeder pendiri - 50 qr.
Duz və istiot zövqə görə
Hazırlanması:
Əvvəlcədən isidilmiş kərə yağına soğanı və əzilmiş sarımsağı töküb, 3 dəqiqə qovurduqdan sonra, üzərinə qiyməni, badımcanı əlavə edib, 4 dəqiqə qızart. Sonra tomat pastasını, konservləşdirilmiş pomidoru, tərəvəz bulyonunu, zirəni töküb, 25 dəqiqə bişir. Sobanı 180 dərəcədə isit. Makaronu suya töküb bişir. Sous üçün yağı, unu və südü qarışdırıb, qatılaşana qədər sobada saxla. Sonra sobaya qoyacağın qaba makaronların yarısını töküb, üzərinə zeytun yağını, sousun bir hissəsini və əti əlavə edib, qalan makaronu da tök. Kənarda qalan sousa yumurta qatıb, makaronun üstünə tök. Üzərinə sürtkəcdən keçirilmiş pendir əlavə edib, 25 dəqiqə sobada bişir.
"Gül" peçenye
Ərzaqlar:
Yumurta - 2 ədəd
Duru yağ - 2 x/q.
Qatıq - 2 x/q.
Sirkə - 1 x/q.
Qabartma tozu - 1 paket
Kərə yağı - 125 qr.
Əzilmiş qoz - 1 st.
Nişasta - 2 x/q.
Un apardığı qədər
Şərbət üçün:
Şəkər tozu - 2 st.
Su - 1,5 st.
Limon şirəsi - 1 ç/q.
Hazırlanması:
Kənarda şəkər tozu və su ilə şərbət hazırla. Qaynadıqdan sonra içərisinə limon şirəsi töküb, soyumağa qoy. Qaba yumurta, duru yağ, qabartma tozu və sirkə töküb qarışdır. Üzərinə un əlavə edib, yumşaq xəmir hazırla və 15 dəqiqə gözlə. Sonra xəmirdən kiçik kündələr düzəldib, nişasta ilə boşqab böyüklüyündə yay. Ortasını birləşdirib içərisinə qoz töküb, şəkildəki formanı ver. Yağlanmış tavaya düzüb, üzərinə əridilmiş kərə yağı tök. Əvvəlcədən isidilmiş sobada qızarana qədər bişir. Hazır olduqdan sonra üstünə şərbət töküb, əzilmiş fındıq səp.
Axşam.az