BYD satışını 20 faizartırmağı hədəfləyir

Çinin elektrikli avtomobil (elektromobil) istehsalçısı BYD 2024-cü ildə satışlarını 20 faiz artırmağı hədəfləyir.

Marja xəbər verir ki, Reuters-in mövzu ilə bağlı məlumatlı mənbələrə istinadən yaydığı məlumata görə, BYD 2024-cü il üçün 3,6 milyon ədəd satış hədəfi müəyyən edib. Bu rəqəm ötən ilin rekord satışı ilə müqayisədə 20 faiz artım deməkdir. BYD 2023-cü ildə 3 milyondan çox avtomobil satıb. 

Mənbələr həmçinin bildirib ki, BYD-nin sədri Vanq Çuanfu (Wang Chuanfu) çərşənbə günü investor yığıncağında etdiyi çıxışda dünyanın ən böyük elektrik avtomobil istehsalçısının bu il xaricə 500 min avtomobil satmağı hədəflədiyini və 2025-ci ildə bir milyona çatmaq istədiyini bildirib.

Vanq açıqlamaları, çərşənbə axşamı BYD-nin iki il ərzində ən yavaş rüblük mənfəət artımını bildirməsindən sonra edib.

BYD keçən ilin sonunda Teslanı keçərək dünyanın ən böyük elektrik avtomobil satıcısı olub. Bundan əlavə, şirkət rəqabət baxımından rəqiblərini narahat edən Avstraliya kimi xarici bazarlara aqressiv genişlənməyə başlamışdır.

Müstəqil marka qiymətləndirmə konsaltinq firması Brand Finance-in 2024-cü il hesabatına görə, BYD-nin marka dəyəri 20 faiz artıraraq 12,1 milyard dollara çatıb.

BYD 2023-cü ildəki performansı ilə, ümumi avtomobil satışlarında 10 qlobal marka arasına daxil olmağı bacarıb. 

2023-cü ildə 6 qitədə 70-dən çox ölkəyə genişlənən BYD qlobal bazarda ixracını 334 faizdən çox artıraraq təxminən 243 minə çatdırıb.