Azərbaycanlı kinoprodüser beynəlxalq kino forumunda

Bakı Beynəlxalq Qısametrajlı Filmlər Festivalının direktoru, kinoprodüser Fehruz Şamıyev martın 29-dan aprelin 1-dək Qırğızıstanda keçiriləcək “Umut” XI Beynəlxalq Gənc Kino Forumunda münsiflər heyətinin tərkibinə daxil edilib.

Kulis.az xəbər verir ki, kino forumu çərçivəsində Çingiz Aytmatov adına Kino evində azərbaycanlı kinoprodüser Bakı Beynəlxalq Qısametrajlı Filmlər Festivalı haqqında məlumat verəcək və laureat filmlərin proqramını təqdim edəcək. Bu filmlərin arasında Türkan Hüseynin “Son fotoşəkil”, Qulu Əsgərovun “Hasar”, Amil Məmibəylinin “Titrəmə” filmləri var.

“Umut” Gənc Kino Forumu 2013-cü ildən keçirilən beynəlxalq kinematoqrafiya tədbiridir. Bu, gənc və yaşlı nəsillərə mənsub rejissorlar arasında ünsiyyət üçün yaradıcı və təhsil platformasıdır. Forumun məqsədi istedadlı gənclərin yaradıcılığını dəstəkləmək, yeni adları ortaya çıxarmaq, gənc kinorejissorların peşəkar inkişafını təşviq etməkdir.

Bu il forum Qırğızıstan Respublikasının Xalq artisti, sənədli filmlər rejissoru Bekeş Abdıldayevin 90 illik yubileyinə həsr olunub və “Tələb olunan nəslə sevgi ilə” şüarı altında keçiriləcək.