“Rusiya müharibəyə son qoymalı və hazırda Dünya Bankının 486 milyard dollar dəyərində qiymətləndirdiyi Ukraynaya dəymiş ziyanı ödəməlidir.”
Yeniavaz.com xəbər verir ki, bu barədə Yeddilik Qrupu (G7) ölkələrinin liderlərinin İtaliyada keçirilən sammitdə qəbul edilmiş bəyanatında deyilir.
“Rusiyanın beynəlxalq hüquq çərçivəsində vurduğu zərərin ödənilməsi ilə bağlı öhdəlikləri aydındır və buna görə də biz Rusiya Federasiyasının bu öhdəlikləri yerinə yetirməyə məcbur edilməsinin bütün mümkün hüquqi yollarını nəzərdən keçirməyə davam edirik”, - bəyanatda deyilir.
G7 liderləri bildiriblər ki, Rusiya müharibəni bitirənə və zərəri bərpa edənə qədər ölkədən kənarda saxlanılan Rusiya aktivləri dondurulub.
Liderlər təsdiqləyiblər ki, onlar Rusiya Federasiyasının dondurulmuş aktivlərindən əldə edilən gəlirləri Ukraynaya verilmiş kreditlərə xidmət etmək və ödəmək üçün istifadə etmək niyyətindədirlər. Xüsusilə, 2024-cü ilin sonuna qədər G7 ölkələri Kiyevə 50 milyard dollar kredit verəcəklərini vəd ediblər.
Sammit iştirakçıları həmçinin Rusiyaya Ukraynada nüvə və ya digər kütləvi qırğın silahlarından istifadə etməmək barədə xəbərdarlıq ediblər:
“Biz Rusiyanın məsuliyyətsiz nüvə ritorikasından dərin narahatıq. Nüvə, kimyəvi, bioloji və ya radioloji silahlardan istənilən istifadənin ciddi nəticələri olacağını vurğulayırıq”.

• Rusiya
• Ukrayna
• Müharibə
• G7
• Ziyan
• Dünya Bankı
• Ödəmə