Avrozonada Sənaye və Xidmət Sektorlarında Kompozit Biznes Aktivliyi İndeksinin (PMI) dərc olunması ərəfəsində avronun dollar qarşısında dəyəri yüksəlir. Belə ki, EUR/USD valyuta cütlüyü ötən günü 1.0699 səviyyəsində başa vursa da, hal-hazırda 1.0718 səviyyəsində ticarət olunur. Eyni zamanda GBP/USD və USD/JPY məzənnələri müvafiq olaraq 1.2662 və 158.860 səviyyələrində ticarət olunurlar. Dollar indeksi isə (ABŞ-ın ticarət tərəfdaşı olan altı ölkənin valyuta səbətinə nisbətdə məzənnə) 0.02% azalaraq 105.57 bənd təşkil edir.
Cümə axşamı günü İngiltərə Mərkəzi Bankı (BoE) iclasının sonunda uçot faiz dərəcəsini illik 5.25% səviyyəsində saxladığını bildirdi. Qərar analitiklərin proqnozları ilə üst-üstə düşüb. Tənzimləyici qurum əlavə edib ki, orta müddətli dövrdə inflyasiyanın davamlı şəkildə 2%-lik hədəfə qaytarılması üçün monetar siyasəti kifayət qədər uzun müddət daralma şəraitində saxlamaq lazımdır.
Həmçinin, ABŞ-da 15 iyunda sona çatan həftə üzrə İşsizlik Müavinəti üçün Müraciətlərin Sayı öncəki həftə ilə müqayisədə 5 min artaraq 238 min təşkil edib. Yaponiyada isə istehlak qiymətləri öncəki ay 2.5% artdıqdan sonra may ayının sonunda illik ifadədə 2.8% artıb.
Dünya birjalarında neftin qiyməti ötən gün əhəmiyyətli dərəcədə bahalaşdıqdan sonra bir qədər ucuzlaşıb. ABŞ-ın Enerji Departamentinin Enerji İnformasiya İdarəsinin məlumatına əsasən, ölkədə kommersiya məqsədli neft ehtiyatları (strateji ehtiyatlar istisna olmaqla) iyunun 14-də başa çatan həftədə 2.5 milyon barrel və ya 0.6% azalaraq 457.1 milyon barrelə enib. Eyni zamanda, ABŞ-da benzin ehtiyatları 2.3 milyon barrel (1%) azalaraq 231.2 milyon barrel təşkil eib.
Bugün Bakı vaxtı ilə saat 12:00-da Avrozonada sənaye və xidmət sektorlarında Biznes Aktivliyi İndeksi (PMI) göstəricilərinin dərc ediləcəyi gözlənilir. Analitiklər müvafiq olaraq 48 və 53.5 bənd səviyyələrinə qədər artım proqnozlaşdırırlar. Eləcə də, gün ərzində Almaniyada, Böyük Britaniyada və ABŞ-da Biznes Aktivliyi İndeksi göstəriciləri dərc olunacaq. Həmçinin, Birləşmiş Krallıqda açıqlanacaq pərakəndə satış dövriyyəsi göstəriciləri də investorların diqqət mərkəzində olacaq məlumatlardır.
Məlumat İnvest-AZ İnvestisiya Şirkətinin analitikləri tərəfindən hazırlanıb.
