Bir neçə gün öncə Şüvəlanda əvvəllər dəfələrlə məhkum olunmuş Rövşən Allahverdiyevin üç polis əməkdaşı və bir mülki şəxsi güllələyərək qətlə yetirməsi, daha sonra onun özünün zərərsizləşdirilməsi ilə bağlı xəbər icəmiyyətdə böyük əks-səda doğurdu.
Çünki Azərbaycan belə hadisələrə nadir hallarda rast gəlinir. Görünür, elə buna görədir ki, hadisə ilə bağlı sosial şəbəkələrdə müzakirələr hələ də davam edir, müxtəlif mülahizələr irəli sürülür, hətta çox vaxt reallıqdan tamamilə uzaq versiyalar dövriyyəyə buraxılır.
Hadisə əslində necə baş verib? Rövşən Allahverdiyev kimdir və hansı dələduzluq əməllərinə görə axtarışa verilib? O, 3 polis əməkdaşı və 1 mülki şəxsi hansı şəraitdə qətlə yetirib?
Bakupost.az bu suallara aydınlıq gətirən məlumatları təqdim edir.
Öncə qeyd edək ki, Rövşən Oqtay oğlu Allahverdiyev çoxsaylı vətəndaşı aldadaraq, onlara torpaq sahələrini özəlləşdirilməyə, bəzilərinə isə müxtəlif dövlət orqanlarda işə düzəlməyə kömək edəcəyini vəd edib. O, bu üsulla vətandaşların külli miqdarda pullarını mənimsəyib. 2023-cü ilin mart ayında isə R.Allahverdiyev Türkiyəyə qaçmağa cəhd göstərərkən saxlanılıb və istintaq orqanlarına təhvil verilib.
İndisə onun dələduzluq əməlləri barədə faktlara diqqət edək. Əldə etdiyimiz məlumata görə, Rövşən Allahverdiyev vətəndaş Z.A.-ya məxsus torpaq sahəsini özəlləşdirmək adı ilə onun 320 000 manatını ələ keçirib. Bu faktı üzrə DİN-in istintaq qurumlarında Cinayət Məcəlləsinin 178.3.2-ci (dələduzluq-külli miqdarda ziyan vurmaqla törədildikdə) maddəsi ilə cinayət işi başlanılıb. Bununla əlaqədar 30 mart 2023-cü il tarixdə məhkəmənin qərarı ilə Rövşən Allahverdiyevin barəsində həbs qətimkan tədbiri seçilib.
Eyni zamanda aydın olub ki, Rövşən Allahverdiyev torpaq sahəsini özəlləşdirmək adı ilə digər vətəndaş F.A.-nın 139 000 manat pulunu dələduzluq yolu ilə ələ keçirib. Bu faktı üzrə 25 mart 2023-cü il tarixdə CM-in 178.2.4-cü maddəsi ilə cinayət işi başlanılıb və bu iş onun barəsində istintaq edilən digər cinayət işi ilə bir icraatda birləşdirilib.
İstintaq prosesi davam edib və 29 avqust 2023-cü ildə Rövşən Allahverdiyevin barəsində seçilmiş həbs qətimkan tədbiri müdafiə tərəfinin vəsatəti ilə Bakı şəhəri Nərimanov Rayon Məhkəməsi tərəfindən ev dustaqlığı qətimkan tədbiri ilə əvəz edilib. Beləliklə, o, həbsdən azad edilib.
İstintaq müddətində, Rövşən Allahverdiyevin vətəndaş K.Ə.-ni Dövlət Gömrük Komitəsinə işə düzəltmək adı ilə aldadaraq 20 000 manat pulunu dələduzluq yolu ilə ələ keçirdiyi də ortaya çıxıb. Bu faktla bağlı 28 iyun 2023-cü il tarixdə CM-in 178.2.4-cü maddəsi ilə cinayət işi başlanııb. Bundan sonra onun vətəndaş M.E.-ni də aldadaraq torpaq sahəsini özəlləşdirmək adı ilə 1 141 500 manat pulunu dələduzluq yolu ilə ələ keçirməsi müəyyən edilib. Onun bu əməli CM-in 178.4-cü maddəsinə tövsif edilib. 9 sentyabr 2023-cü il tarixdə onun barəsində Səbail Rayon Məhkəməsinin qərarı ilə yenidən həbs qətimkan tədbiri seçilib.
Ancaq nədənsə 6 gün sonra - 15 sentyabr 2023-cü ildə Bakı Apellyasiya Məhkəməsi təqsirləndirilən Rövşən Allahverdiyevin barəsində Səbail Rayon Məhkəməsinin həbs qətimkan tədbirini ləğv edib və o, yenidən həbsdən azad olunub.
Qeyd olunan faktlarla bağlı DİN-in istintaq qurumlarında aparılan cinayət işinin ibtidai istintaqı zamanı təqsirləndirilən şəxs Rövşən Allahverdiyev istintaq orqanından gizlənib. Bu səbəbdən 30 oktyabr 2023-cü il tarixdə onun barəsində axtarış elan edilib.
Nəhayət, bu il iyunun 24-nə keçən gecə polisə onun yaşadığı ünvana gələcəyi barədə məlumat daxil olub. Bundan sonra onun yaşadığı ünvana əlavə qüvvələr, eləcə də ərazidə xidmət aparan post-patrul naryadları göndərilib. Hadisə yerinə ilk gələn post-patrul əməkdaşı ilə əməliyyat xidmətinin əməkdaşı Rövşən Allahverdiyevi yaşadığı ünvanın qarşısında saxlayıblar.
O, səkkiz aya yaxın azyaşlı övladlarını görmədiyini bildirib və onlarla vidalaşmasına icazə verilməsini xahiş edib. Eyni xahişlə onun anası da polis əməkdaşlarına müraciət edib. Onların israrından sonra polis əməkdaşları humanizm naminə R.Allahverdiyevin qolundan qandalı açıb yaşadığı mənzilə daxil olmasına şərait yaradıb.
Qanlı hadisə də elə bundan sonra baş verib. Belə ki, Rövşən Allahverdiyev evə daxil olduqdan sonra "Kalaşnikov" avtomatı əsasında hazırlanan, bir neçə hədəfi qısa müddətə məhv etmək imkanına malik olan "Lancaster" markalı ov silahı ilə ailə üzvləri - anası, həyat yoldaşı, uşaqları ilə bayıra çıxaraq qəfil atəş açıb və polis əməkdaşlarını qətlə yetirib. O, həmçinin yaxınlıqda yaşayan, səs-küyü eşidib həmin ünvana gələn Səfər Pirvəli oğlu Piriyevi də polis zənn edib və onu da qətlə yetirib.
Bundan sonra, hadisə yerinə gələn əməliyyat qrupu təslim olması barədə Rövşən Allahverdiyevi dəfələrlə xəbərdar etsələr də, sonuncu buna məhəl qoymayaraq müqavimət göstərdiyi üçün zərərsizləşdirilib.
Zaur
BakuPost
