Qazaxıstanlı jurnalist Aydos Sadıkov Kiyevdə vəfat edib.
Editor.az bildirir ki, bu barədə onun həyat yoldaşı Natalya Sadıkova öz Facebook səhifəsində məlumat verib. Jurnalist 13 gün reanimasiyada olub. İyunun 18-də onun həyatına qəsd edilib: “Mənim sevimli ərim, üç övladımızın atası, qazax xalqının böyük oğlu.
Aidos Qazaxıstan üçün canını verdi, qatillərin əlində şəhid oldu. Aidos on üç gün reanimasiyada həyat uğrunda mübarizə aparsa da, heç bir möcüzə baş vermədi. Onun ölümü Tokayevin vicdanındadır”, – jurnalistin həyat yoldaşı yazıb.
Xatırladaq ki, iyunun 18-də naməlum şəxs həmin an həyat yoldaşı ilə avtomobildə olan jurnalistə bir neçə dəfə atəş açıb. Onun həyat yoldaşı xəsarət almayıb.
İyunun 21-də Ukrayna Baş Prokurorluğu Qazaxıstan vətəndaşları Altay Jakanbayev və Meyram Karataevin qazaxıstanlı jurnalistin həyatına sui-qəsddə şübhəli bilindiyini bildirib. İstintaqın məlumatına görə, onlar Kiyevə Polşadan gəliblər. İyunun 22-də Altay Cakanbayev Ukrayna polisinə təslim olub. Qazaxıstan Baş Prokurorluğu bildirib ki, ikinci şübhəlinin yerinin müəyyən edilməsi istiqamətində əməliyyat-istintaq tədbirləri həyata keçirilir. Bu barədə Qazaxıstan Prezidenti Kasım-Jomart Tokayev sərəncam verib.
Natalya Sadıkova şübhəlilərdən birinin polis əməkdaşı olduğunu yazıb. Qazaxıstan Daxili İşlər Nazirliyi bildirib ki, Meyram Karataev 2019-cu ilin yanvarında daxili işlər orqanlarından istefaya göndərilib. Aydos Sadıkovun Ukraynada qaçqın statusu var idi. 2023-cü ilin oktyabrında o, nifrət yaydığına görə Qazaxıstanda axtarışa verilib. Jurnalist həyat yoldaşı ilə birlikdə “Base” YouTube kanalını idarə edirdi. Onlar orada Qazaxıstan hakimiyyətinin hərəkətlərini tənqid ediblər. 2022-ci ilin yanvar etirazlarını da dəstəkləyiblər. “Başe” kanalının 1 milyondan çox abunəçisi var. Jurnalistin həyatına sui-qəsd edildiyi gün, iyunun 18-də “Qazaxıstan prezidenti Rusiyanın təsir agentlərinin marionetinə çevrilib” başlıqlı video yayımlanıb.
//Samir Qurbanov, Editor.az
