Naxçıvanda süni mayalanma ilə doğulan buzovlar üçün fermerlərə çatacaq məbləğ mənimsənilir. Bu məbləğ hər doğuş üçün 100 manat nəzərdə tutulub. Muxtar respublika hər il on minlərlə buzovun bu yolla doğulduğunu nəzərə alsaq, söhbət milyonlarla manatdan gedir.
Hurriyyet.az xəbər verir ki, yerli fermerlərin “Gündəlik Naxçıvan”a verdikləri məlumata görə, bu pullar iki ilə yaxındır ki ödənmir.
Şərur rayonundan olan fermer Cavad Qasımov deyir ki, ötən ildən bəri 7 inəyi bu yolla bala versə də, yerli Kənd Təsərrüfatı Nariyliyindən pulunu ala bilmir:
“Ötən ildən bəri təkcə Şərur rayonundan olan fermerlərə süni mayalanma ilə doğulan minlərlə buzova görə ödəniləcək pullar mənimsənib. Həmin pullar kənd təsərrüfatın inkişafına dəstək məqsədi ilə ödənilməlidir. Biz hər süni mayalanma üçün baytarlara 40 manat pul ödəyirik. Qanunla doğuşdan sonra nazirlik hər buzov başına 100 manat ödəməlidir. Biz buzovların doğulması ilə bağlı sənədləri nazirliyə təqdim etsək də, pulumuzu vermirlər. 2022-ci ilə kim bu pullar vaxtlı-vaxtında ödənirdi. Naxçıvanda hakimiyyət dəyişdikdən sonra mənimsəyirlər pullarımızı. Kimə şikayət ediriksə, xeyri yoxdur”.
Babək rayonundan olan digər fermer Nüsrət Hüseynov da sünü mayalanmadan doğulan 5 buzova görə nazirlikdən pul ala bilməməsindən gileylənir:
“Təkcə bu il 8 buzovum doğulub. Süni mayalanmaya görə baytarlara 240 manat ödəmişəm. Lakin, nazirlik bizə çatacaq pulları vermir. Dəfələrlə nazirlikdə olmuşuq, bizi başlarından edirlər. Bizə çatacaq milyonlar mənimsənilir”.
Naxçıvanda Süni Mayalanma Mərkəzi 2020-ci ildən fəaliyyət göstərir.
