Aprel ayında başlayan demarkasiya fonunda Ermənistan rəhbərliyi yerli sakinlərə təhlükəsizlik vəd edib. Nikol Paşinyan şəxsən Tavuşa səfəri zamanı bəyan edib ki, əgər Azərbaycanın Tavuşda tələb etdiklərini verməsələr, bir həftədən sonra müharibə başlayacaq, versələr, Azərbaycanın hücum riskləri azalacaq.
Təbii ki, Ermənistan rəhbərliyi Azərbaycanın tələbini yerinə yetirdi, lakin təhlükəsizlik riskləri azalmadı, əksinə artdı. Azərbaycan sərhədçiləri dinc yaşayış məntəqələrinə yaxınlaşıblar.
KONKRET.az xəbər verir ki, keçmiş hərbçi Aşot Sevyan israr edir ki, belə davam edərsə, Ermənistanın digər ərazilərində də oxşar vəziyyət yaşanacaq.
“Qısa və konkret desəm, indi bizim təhlükəsizliyimiz yoxdur, hər şey Azərbaycanın şıltaqlığından asılıdır, istəsələr, yaşadacaqlar, istəməsələr vuracaqlar. Ölkəmizin təslim olması dövlət miqyasında baş verir, bəs biz təhlükəsiz yaşayacağımızı nə gözləyirdiniz?
Bir şeyi dəqiq bilin ki, hökumət gücü çatdığı qədər Azərbaycana qarşı getməyəcək, hakimiyyətini saxlamaq və ayaqda qalmaq üçün təhlükəsizlik məsələlərini qulağın arxasına qoyacaq”.
A.Sevyan deyir ki, “O, yaxşı heç nə gözləmir, çünki Azərbaycan Ermənistanı işğal etmək planını həyata keçirir, Ermənistanın indiki hakimiyyəti isə öz kreslosunu saxlamaqla məşğuldur, xalqın əksəriyyəti isə başını aşağı, həlim və itaətkarlıqla yaşayır. Və bütün bunların nəticəsində minilliklər tarixi olan erməni milləti məqsədsiz xalqa çevrilir.
Belə olan təqdirdə ermənilər azərbaycanlılarla, türklərlə assimilyasiya edəcək. Mən millətimi gözdən salmaq istəmirəm, amma millət bu təhlükə qarşısında belə davranmamalıdır.
İnanın ki, belə davam etsə, 10 min kvadratmetr sahəmiz belə olmayacaq. Bilmirəm, bəlkə bizim İrəvan filialımız olacaq, o da Azərbaycana tabe olacaq. Gürcüstan da öz növbəsində Lorini tələb edəcək. Nikol Paşinyan isə kənd icra başçısı olacaq və o, Azərbaycanla işbirliyində yaşayacaq, o vəzifəyə uyğunlaşacaq. Mən əlbəttə pis proqnozlardan danışıram, amma belə davam etsə, mənzərə dediyim kimi olacaq”, – Aşot Sevyan vurğulayıb.
“Qədim Romada qullara çörək və tamaşa verirdilər, Nikol Paşinyan da burada belə edir, camaatı dondurma və konsertlərlə yedizdirir.
Bu hakimiyyətin “qırmızı xətti” yoxdur. Düşünürəm ki, millət nəhayət bütün bunları dərk etməli və adekvat addımlar atmalıdır. Hələ ki gec deyil”, – deyə Aşot Sevyan fikrini yekunlaşdırıb.
Natiq Səlim,
KONKRET.az
