Yardımlı rayonunda Vətən, torpaq naminə canını fəda edən şəhidlərin xatirəsi həmişə əziz tutulur, böyük ehtiramla yad edilir. Dağlar diyarında bu günlər keçirilən sərbəst güləş üzrə U-15 kiçik yaşlı yeniyetmələr arasında açıq rayon birinciliyi də Vətən şəhidlərin xatirəsinə həsr olunmuşdu.
Yardımlı Rayon İcra Hakimiyyətinin, Yardımlı İdman Kompleksinin təşkilatçılığı, Polis Şöbəsinin rəisi, polis polkovniki Rauf Babaşovun dəstəyi sayəsində Yardımlı İdman Kompleksində baş tutan yarışın açılış mərasimində əvvəlcə dövlət himni oxundu, Vətən şəhidlərin əziz xatirəsi bir dəqiqəlik sükutla anıldı.
Rayon İcra Hakimiyyətinin başçısı Ayaz Əsgərovun, Polis Şöbəsinin rəisi, polis polkovniki Rauf Babaşovun, Dövlət Təhlükəsizliyi Xidmətinin (DTX) Yardımlı rayon şöbəsinin rəisi İlqar Məmmədovun, Azərbaycan İdman Jurnalistləri Assosiasiyasının vitse-prezidenti, "Olimp sport” jurnalının baş redaktoru Ramin Allahverdiyevin, şəhid valideynlərinin, müharibə veteranlarının və rayon ziyalıların qatıldığı birinclikdə ilk söz alan rayon rəhbəri yarış iştirakçılarını salamlayaraq dedi:- Ölkəmizdə idmana böyük diqqət və qayğı göstərilir. Bu yarış də təkcə idman hadisəsi kimi deyil, həm də mənəvi əhəmiyyət kəsb edən bir tədbir kimi mühüm əhəmiyyət daşıyır. Yarışın təşkilində əsas məqsəd isə Vətənin azadlığı, xoşbəxt gələcəyimiz naminə qan töküb tarix yazan şəhidlərin əziz ruhunu yad etməkdən ibarətdir.
Yarışın təşəbbüskarı, polis polkovniki Rauf Babaşov çıxış edərək şəhidlik zirvəsinin müqəddəsliyindən danışıb və turnirin əhəmiyyətinə yüksək qiymət verməklə belə yarışların bölgə idmançılarının inkişafı üçün əhəmiyyətini xüsusi olaraq vurğuladılar. Şəhid atası Ədalət Qarayev və şəhid anası Rəsmiyə xanım öz növbəsində yarışın təşkilatçılarına minnətdarlığını bildiriblər, Vətən torpaqlarının azadlığı və dövlətimizin suverenliyi uğrunda döyüşmüş qəhrəmanların gələcək nəslə tanıdılmasında bu cür yarışların müstəsna rol oynadığını dedilər.
Çıxışlardan sonra yarışın baş hakimi, güləş üzrə beynəlxalq dərəcəli hakim, Yardımlı rayon Polis Şöbəsinin rəis müavini Tural Əliyev birinciliyə start verdi. Lənkəran, Cəlilabad, Astara, Masallı, Biləsuvar və AİJA güləş komandasını təmsil edən 100-ə yaxın idmançı qələbə uğrunda mübarizəyə başladılar. Gərgin və maraqlı keçən yarışın yekununda 10 çəki dərəcəsi üzrə ilk üç yeri tutan idmançılar diplom, medal və qiymətli hədiyyələrlə təltif edildilər.
Zəfər Orucoğlu,
Azərbaycan Jurnalistlər Birliyinin üzvü
