Azərbaycan çempionu “Qarabağ”ın hücumçusu Olavio Juninyo UEFA Çempionlar Liqasının (ÇL) təsnifat mərhələsində 6-cı qolunu vurub.
Arena.az xəbər verir ki, braziliyalı futbolçu ÇL-in 3-cü təsnifat mərhələsində Bolqarıstan “Ludoqorets”i ilə səfər oyununda da fərqlənib.
Komandasının 7:2 hesablı qələbəyə sevindiyi oyunda hesabı məhz Olavio açıb. Bununla da o, ÇL-in təsnifat mərhələsinin bombardirləri siyahısında liderliyi ələ alıb.
Juninyo 6 qolu 4 oyunda vurub. Cənubi amerikalı cari mövsüm avrokubok matçlarını qolsuz tərk etmir. Juninyo “Linkoln”a (2:0, 5:0) əvvəl 1, sonra 3, “Lüdoqorets”ə (1:2, 7:2) isə hər iki görüşdə 1 top vurub.
Bombardirlər siyahısında ikinci yeri “Klaksvik”dən (Farer adaları) Arni Frederiksberq (5 qol) tutur. Üçüncü-dördüncü yeri hərəyə 4 qolla “Fənərbaxça”dan (Türkiyə) Edin Dzeko və “Styaua”dan (Rumıniya) Darius Olaru bölüşdürürlər.
TOP-5-i isə “Qarabağ”ın digər oyunçusu Yassin Benzya qapayır. Onun hesabında 3 qol var.
Xatırladaq ki, Olavio Juninyo “Qarabağ”a 2023-cü ilin iyul ayında Portuqaliyanın “Şaveş” klubundan 450 min avro müqabilində keçib. 27 yaşlı forvardın Ağdam klubu ilə 2026-cı ilin 30 iyununa kimi müqaviləsi var. O, Azərbaycan çempionunun heyətində indiyə qədər 61 oyuna çıxıb, 38 qol vurub və 12 məhsuldar ötürmə müəllifi olub.
Tam adı Olavio Vieyra dos Santos Junior olan Juninyo karyerası ərzində “Fiqeyrense”, “Brazil Pelotas”, “Eştoril”, “Novorizontino”, “Atletiko Paranaense”, “Vila Nova” və “Portimonense” kimi klubların da formasını geyinib.
