<p>Mədən Hasilatı üzrə Şəffaflıq Təşəbbüsünün tətbiqində pilot ölkə olmaqla Azərbaycan Respublikası hasilat sənayesində şəffaflıq və hesabatlılıq üzrə beynəlxalq səyləri daim dəstəkləyib. Ölkəmiz hasilat sənayesində şəffaflığı ən yüksək səviyyədə təşviq edərək 2003-cü ildə “Mədən Hasilatı üzrə Şəffaflıq Təşəbbüsü”nə qoşulub, 2005-ci ildə dünyada ilk dəfə şəffaflıq təşəbbüsü üzrə hesabat açıqlayıb. Hasilat sənayesi üzrə şəffaflıq məsələlərinə ölkə Prezidenti İlham Əliyev tərəfindən daim xüsusi önəm verilib, bu barədə müvafiq fərman və sərəncamlar imzalanıb. </p><p><a href="https://azertag.az" target="_blank" class="azertac-link">AZƏRTAC</a> xəbər verir ki, bu fikirləri Dövlət Statistika Komitəsinin sədri Tahir Budaqov oktyabrın 19-da keçirilən “Hasilat Sənayesində Şəffaflıq” Portalının təqdimat mərasimi zamanı jurnalistlərə açıqlamasında deyib.</p><p>Tahir Budaqov bildirib ki, dövlətimizin başçısının “Hasilat sənayesində şəffaflığın və hesabatlılığın artırılması ilə bağlı əlavə tədbirlər haqqında” 2017-ci il 5 aprel tarixli Fərmanı ilə aidiyyəti dövlət qurumlarının yüksəkvəzifəli şəxslərindən ibarət Hasilat Sənayesində Şəffaflıq üzrə Komissiya yaradılıb. Fəaliyyət göstərdiyi müddət ərzində Dövlət Statistika Komitəsinin nümayəndəsinin də iştirak etdiyi Komissiya hasilat sənayesi üzrə şəffaflığın təmin edilməsi məqsədilə lazımi tədbirləri həyata keçirib və bu sahədə hazırlanmış hesabatları mütəmadi dərc edərək ictimaiyyəti məlumatlandırıb.</p><p>Komitə sədri qeyd edib ki, “Hasilat sənayesində şəffaflıq üzrə hesabatlılığın tətbiqi ilə bağlı əlavə tədbirlər haqqında” Azərbaycan Respublikası Prezidentinin 2020-ci il 28 iyul tarixli Fərmanı ilə hasilat sənayesində şəffaflıq üzrə hesabatlılığı və bu sahədə dövlət orqanlarının fəaliyyətini əlaqələndirmək, ölkəmizdə hasilat sənayesində şəffaflıq üzrə hesabatların davamlı toplanmasını və toplanmış hesabatlar əsasında statistika məlumatlarının ictimaiyyətə açıqlanmasını təmin etmək Dövlət Statistika Komitəsinə həvalə edilib.</p><p>Onun sözlərinə görə, ötən dövr ərzində Dövlət Statistika Komitəsi hasilat sənayesində şəffaflıq üzrə hesabatların toplanması və ictimaiyyətə açıqlanmasını təmin etmək məqsədilə bir sıra tədbirlər həyata keçirib: “Görülmüş işlərin yekunu olaraq bu gün təqdim olunan “Hasilat Sənayesində Şəffaflıq” Portalının hazırlanması təmin edilib. Hesab edirəm ki, hazırlanmış bu portal son dövrlərdə statistika potensialının artırılması sahəsində görülən işlərin növbəti bir nümunəsidir. Bu gün təqdim edilən portal Dövlət Statistika Komitəsinin digər informasiya ehtiyatları ilə uzlaşdırılıb və düşünürəm ki, portal hasilat sənayesində statistik məlumatlarla ictimaiyyəti, o cümlədən dövlət qurumlarını, özəl sektoru, elm və təhsil müəssisələrini, vətəndaş cəmiyyəti institutlarını, kütləvi informasiya vasitələrini, regional və beynəlxalq təşkilatları təmin etmək üçün əlverişli informasiya mühiti yaradacaq. Portal, həmçinin hasilat sənayesinin səmərəli idarə edilməsində, bu sahədə davamlı və uzunmüddətli şəffaflıq mexanizmlərinin qurulmasında, habelə yüksək hesabatlılığın təmin edilməsində əhəmiyyətli rol oynayacaq”.</p><p> </p>
<p>Oktyabrın 18-19-da Çin Xalq Respublikasının Çindao şəhərində hibrid formatda 2-ci “Kəmər və Yol Energetika Nazirləri Konfransı” keçirilib. Müxtəlif ölkələrin yüksək vəzifəli şəxslərinin iştirak etdiyi tədbirin açılış mərasimində energetika naziri Pərviz Şahbazov onlayn formatda çıxış edib.</p><p>Energetika Nazirliyindən <a href="https://azertag.az" target="_blank" class="azertac-link">AZƏRTAC</a>-a bildirilib ki, nazir Qədim İpək Yolu üzərində yerləşən Azərbaycanın Bakı-Tbilisi-Qars dəmiryolu xətti, Bakı Beynəlxalq Dəniz Ticarət Limanı, “Şimal-Cənub” Beynəlxalq Nəqliyyat Dəhlizi və Transxəzər Beynəlxalq Nəqliyyat Marşrutu vasitəsilə Çin ilə Avropa arasında “mühüm körpü” rolunu oynadığını qeyd edib. Bildirilib ki, Azərbaycanın təşəbbüskarı olduğu yeni Zəngəzur dəhlizi perspektivdə “Kəmər və Yol” layihəsinin strateji əhəmiyyətini daha da artıracaq. Nazir qlobal əhəmiyyətli enerji xətləri, şaxələndirilmiş enerji resursları və Avropanın enerji təhlükəsizliyinin təminatındakı rolu və əlverişli investisiya imkanları ilə Azərbaycanın bu dəhlizdə enerji əməkdaşlığının inkişafında vacib tərəfdaş olduğunu bildirib.</p><p>“Hazırda iqlim dəyişiklikləri ilə bağlı çağırışlar enerji sektorunu kəskin dəyişikliklərlə üz-üzə qoyub və bu prosesdə çoxtərəfli əməkdaşlıq heç vaxt olmadığı qədər həlledici rol oynayır. Qlobal enerji istehlakının strukturundakı təsirli mövqeyi, dünyada bərpa olunan enerji üzrə ən böyük qoyuluş gücünə malik ölkələrdən biri olması və 2060-cı ilə qədər sıfır karbon emissiyası ilə bağlı hədəfi Çinin təşəbbüsü ilə “Kəmər və Yol”un “yaşıl enerji” üzrə də effektli əməkdaşlıq platformasına çevrilməsinə təminat yaradır”, - deyə nazir qeyd edib.</p><p>Nazir, həmçinin bərpa olunan enerji mənbələrinin inkişafı, enerji səmərəliliyi sahəsində ölkəmizdə aparılan islahatlar, həyata keçiriləcək layihələr, işğaldan azad edilmiş ərazilərdə “yaşıl enerji zonası”nın yaradılması istiqamətində görülən tədbirlərdən bəhs edib. Bərpa olunan enerji layihələri üzrə keçiriləcək hərracların, eləcə də Xəzər dənizinin Azərbaycan sektoru üzrə 157 QVt həcmində külək enerjisi potensialının investorlar, o cümlədən Çin ilə dayanıqlı enerji əməkdaşlığı üçün yeni imkanlar yaradacağını qeyd edib.</p><p>Energetika Nazirlərinin 2-ci Konfransında yaşıl enerji sənaye zəncirinin qurulması, yaşıl enerjiyə keçid sahəsində ölkələr arasında əlaqələndirmənin artırılması, bu istiqamətdə inkişaf proqramlarının işlənməsi, karbon neytrallığı, yaşıl enerji sərmayələri üçün bazar mühitinin yaradılması, enerji keçidinin sürətləndirilməsi, yeni texnologiya və innovasiyaların tətbiqi mövzularında müzakirələr aparılıb.</p>
<p>Bu gün Azərbaycanda müvafiq hüquqi bazanın yaradılması, müxtəlif proqramların icrası, dövlət idarəçiliyində informasiya-kommunikasiya texnologiyalarının tətbiqi, informasiyanın əldə edilməsində əlçatanlığın genişləndirilməsi, ictimai iştirakçıların artırılması və vətəndaş cəmiyyəti təsisatları ilə əməkdaşlığın gücləndirilməsi tədbirləri davam etdirilir.</p><p><a href="https://azertag.az" target="_blank" class="azertac-link">AZƏRTAC</a> xəbər verir ki, bu sözləri oktyabrın 19-da Dövlət Statistika Komitəsində “Hasilat Sənayesində Şəffaflıq” portalının təqdimatı mərasimində çıxış edən energetika naziri Pərviz Şahbazov deyib.</p><p>Nazir qeyd edib ki, faydalı qazıntılarla zəngin olan və dövlət gəlirlərinin bir hissəsini həmin sərvətlərin istismarından əldə edən ölkəmizdə hasilat sənayesində davamlı və uzunmüddətli şəffaflıq mexanizmlərinin qurulması, habelə yüksək hesabatlılığın təmin edilməsi böyük əhəmiyyət kəsb edir.</p><p>P.Şahbazov bildirib ki, Dövlət Statistika Komitəsi tərəfindən təqdim edilən portala müvafiq sahələr üzrə fəaliyyət göstərən müəssisələrdən 145 göstərici, o cümlədən hasilat, ixracın həcmi və dəyəri, məhsul növləri üzrə dövlətə ödənişlər, neft və qaz sazişləri çərçivəsində əməliyyat xərcləri və onların strukturu, sosial məqsədlərə çəkilən xərclər, aktivlər, əsas kapitala yönəldilən investisiyalar, işçilərin sayı və əməkhaqları üzrə məlumatlar, eləcə də ölkə üzrə enerji balansı, enerji tutumu və digər məlumatlar daxil ediləcək.</p><p>Nazir bu məlumatların bütün istifadəçilər üçün zəruri və qiymətli məlumat bazası olacağına əminliyini ifadə edib.</p><p> </p>
<p>Nyu-York qanunvericiləri ABŞ-ın əsasını qoyanlardan biri olan Tomas Ceffersonun heykəlinin şəhər administrasiyası binasından götürülməsinə səs verib. </p><p><a href="https://azertag.az" target="_blank" class="azertac-link">AZƏRTAC</a> NBC News telekanalına istinadla xəbər verir ki, heykəlin götürülməsi barədə qərar Ceffersonun quldarlıq keçmişi səbəbindən qəbul olunub. Şəhər administrasıyasının üzvləri buna neçə illərdən sonra nail olublar. Belə ki, heykəl azlıqların bir neçə qrupu üçün təhqir sayıla bilər. </p><p>Heykəlin sökülməsinə Afrika əsilli Corc Floydun ağdərili polis tərəfindən hay-küylü qətli təkan verib. Heykəl Nyu-Yorkun tarix-elm muzeyinə qoyulacaq. </p><p>Son vaxtlar ABŞ-ın bir çox şəhərlərində 1861-1865-ci illərdə vətəndaş müharibəsi zamanı şimallılarla döyüşmüş cənublu konfederatların xatirəsinə ucaldılmış bir çox abidələr sökülüb. </p>
<p>Oktyabrın 19-da İqtisadiyyat Nazirliyinin dəstəyi, Azərbaycanda İxracın və İnvestisiyaların Təşviqi Fondunun (AZPROMO) və Slovakiyanın İnvestisiya və Ticarətin Təşviqi Agentliyinin (SARİO) təşkilatçılığı ilə Bakıda Azərbaycan-Slovakiya biznes forumu keçirilib.</p><p>Tədbirdə rəsmi şəxslərlə yanaşı, hər iki tərəfdən İKT, tikinti, qida və sair sahələrdə fəaliyyət göstərən 50-dək iş adamı iştirak edib. </p><p><a href="https://azertag.az" target="_blank" class="azertac-link">AZƏRTAC</a> xəbər verir ki, iqtisadiyyat nazirinin müavini Niyazi Səfərov Azərbaycan-Slovakiya əlaqələrinin uğurla inkişaf etdiyini, iki ölkə arasında əməkdaşlığın genişləndirilməsi üçün böyük potensialın olduğunu vurğulayıb. Bildirilib ki, Slovakiya şirkətləri ölkəmizdə sənaye, tikinti və xidmət sahələrində uğurla fəaliyyət göstərir. Ölkələrimiz arasında enerji, humanitar, turizm və sair sahələrdə də tərəfdaşlıq inkişaf edir.</p><p>Nazir müavini Azərbaycan iqtisadiyyatı, ölkəmizdə sahibkarlıq, biznes və investisiya mühitinin yaxşılaşdırılması sahəsində aparılan islahatlar barədə məlumat verib, slovakiyalı iş adamlarını Azərbaycanda yaradılmış əlverişli biznes və investisiya mühitindən yararlanmağa, müxtəlif sahələrə investisiya yatırmağa dəvət edib.</p><p>Slovakiyanın xarici işlər və Avropa naziri İvan Korçok Azərbaycana səfərindən məmnunluğunu bildirib, ölkəsinin Azərbaycanla iqtisadi-ticarət əlaqələrinin genişlənməsində maraqlı olduğunu vurğulayıb. İvan Korçok ölkəsinin iqtisadiyyatı barədə məlumat verib, sahibkarların iştirakı ilə keçirilən bu cür tədbirlərin işgüzar dairələr arasında əlaqələrin genişləndirilməsinə töhfə verəcəyini bildirib.</p><p>AZPROMO-nun rəhbəri vəzifəsini icra edən Yusif Abdullayev xarici investisiyaların təşviqi məqsədilə rəhbərlik etdiyi qurum tərəfindən görülən işlər və həyata keçirilən tədbirlər barədə danışıb.</p><p>Kiçik və Orta Biznesin İnkişafı Agentliyinin (KOBİA) İdarə Heyətinin sədri Orxan Məmmədov qurumun fəaliyyəti, sahibkarlara göstərilən dəstək və xidmətlər barədə məlumat verib, KOBİA-nın xarici iş adamlarına və investorlara ölkəmizdə müvafiq qurumlarla əlaqələndirmə, yerli tərəfdaşların tapılması və digər istiqamətlərdə dəstək göstərə biləcəyini diqqətə çatdırıb.</p><p>Biznes forum iş adamları arasında ikitərəfli görüşlərlə davam etdirilib.</p>
<p style="text-align:;" justify;">AMEA-nın Naxçıvan Bölməsinin sədri, akademik İsmayıl Hacıyevin “Naxçıvan Muxtar Respublikasının sosial-iqtisadi və mədəni inkişafı” kitabının Babək rayon gənclərinə təqdimatı olub. </p><p>Naxçıvan Muxtar Respublikası Gənclər və İdman Nazirliyinin mətbuat xidmətindən <a href="https://azertag.az" target="_blank" class="azertac-link">AZƏRTAC</a>-ın Naxçıvan bürosuna bildirilib ki, Babək Rayon Mədəniyyət Sarayında keçirilən tədbirdə çıxış edən Babək Rayon İcra Hakimiyyəti başçısının müavini Səbinə Abbasova və Gənclər və İdman nazirinin müavini Məcid Seyidov muxtar respublikada gənclərin təhsili, inkişafı üçün yaradılan şəraitdən bəhs ediblər. </p><p>Bildirilib ki, Naxçıvan hər zaman kitaba və elmə xüsusi qayğının ünvanı olub. Qədim diyarın tarixi elmə və ədəbiyyata önəmli töhfələr verən şəxsiyyətlərlə, elm adamları və ədiblərlə zəngindir. Mədəniyyət, quruculuq, yaradıcılıq və əzmkarlıqdan ibarət qürurlu tarixi yazmaq ənənəsi günümüzdə daha dinamik şəkildə davam edir. Bu ənənənin yaşadılmasında gənclərin önəmli rolu nəzərə alınaraq mütəmadi olaraq muxtar respublikanın tanınmış yazıçılarının, elm nümayəndələrinin və gənclərin iştirakı ilə kitab təqdimatları, oxunması zəruri olan kitabların müzakirələri təşkil edilir. </p><p>Vurğulanıb ki, “Naxçıvan Muxtar Respublikasının sosial-iqtisadi və mədəni inkişafı” kitabı gənclərin muxtar respublikada gedən inkişaf prosesləri ilə daha yaxından tanış olmaları üçün önəmli mənbədir. Belə ki, bu monoqrafiya muxtar respublikanın 1995-2019-cu illər ərzində sosial-iqtisadi və mədəni həyatının bütün sahələrini əhatə edən fundamental tədqiqat əsəridir. </p><p>Daha sonra akademik İsmayıl Hacıyev çıxış edərək muxtar respublikanın keçdiyi inkişaf yolundan, həyata keçirilən layihələr və qazanılan nailiyyətlərdən geniş bəhs edeb. Akademik bildirib ki, monoqrafiyada muxtar respublikada məqsədyönlü islahatların aparılması, mühüm əhəmiyyətə malik Dövlət proqramlarının reallaşdırılması nəticəsində Naxçıvanın sosial-iqtisadi inkişaf baxımından ölkəmizdə liderliyini qoruması faktı təhlil edilib, demoqrafik proseslər və məşğulluq problemlərinin həlli, səhiyyə sisteminin inkişafı və əhalinin sağlamlığının qorunması məsələləri araşdırılıb. Həmçinin Naxçıvan Muxtar Respublikası Ali Məclisinin Sədri yanında Bilik Fondunun və Elmin İnkişafı Fondunun yaradılması haqqında, eləcə də digər tarixi sərəncamların əhəmiyyətindən, muxtar respublikada elm və təhsilin inkişafı, bu sahədə yüksəkixtisaslı kadrların hazırlanması, onlara qayğı göstərilməsi, cəmiyyətdə alimlərin, elm və təhsil işçilərinin nüfuzunun artırılması və elmi nəticələrin xaricdə tanıdılması istiqamətində atılan mühüm addımlardan ətraflı bəhs olunub. Nəşrdə tarixi irsin qorunması, turizmin inkişafı ilə bağlı həyata keçirilən tədbirlər geniş şərh edilib. Kitabda Naxçıvan Muxtar Respublikasının “Caspian European Club”un ölkəmizdə həyata keçirilən iqtisadi islahatların və sosial siyasətin nəticələrini əks etdirən Azərbaycan Respublikası regionlarının illik investisiya reytinqinin qalibi olması faktı da öz əksini tapıb. Monoqrafiyada Vətənimizin ayrılmaz parçası olan Naxçıvanda Heydər Əliyev ideyalarına dərin sədaqət, uğurlu idarəetmə sayəsində bütün sahələrdəki intibah təhlil edilir, gələcək müvəffəqiyyətlər proqnozlaşdırılır.</p><p>Sonda İsmayıl Hacıyev gənclərin suallarını cavablandırıb.</p>
<p>Azərbaycan Prezidenti, Silahlı Qüvvələrin Ali Baş Komandanı İlham Əliyevin göstərişinə əsasən Azərbaycan Ordusunun döyüş qabiliyyətinin artırılması istiqamətində fəaliyyətlər davam edir.</p><p>Müdafiə Nazirliyinin mətbuat xidmətindən <a href="https://azertag.az" target="_blank" class="azertac-link">AZƏRTAC</a>-a bildirilib ki, oktyabrın 19-da müdafiə naziri general-polkovnik Zakir Həsənov və nazirliyin digər rəhbər heyəti yeni yaradılmış əməliyyat (komando) hərbi hissəsində olub.</p><p>Açılış mərasiminə dəvət olunan Vətən müharibəsi qaziləri ilə görüşən müdafiə naziri onların problemləri və istəkləri ilə maraqlanıb.</p><p>Sonra Türkiyədə uzunmüddətli “Komando hazırlığı kursu” keçmiş şəxsi heyətə beretlərin təqdim edilməsi mərasimi keçirilib.</p><p>Vətən müharibəsində əldə edilən təcrübə nəzərə alınmaqla hazırlanmış hərbi qulluqçulara beretlər təqdim olunub.</p><p>Mərasimdə çıxış edən müdafiə naziri Azərbaycan Ordusunun hərbi qulluqçularının peşəkarlığının daha da yüksəldilməsinə böyük töhfə verən bu kimi kursların davam etdiriləcəyini qeyd edib.</p><p>Hərbi hissənin ərazisindəki təlim mərkəzinə baxış keçirən nazir komandoların nümunəvi çıxışlarını izləyib.</p><p>Sonda Müdafiə Nazirliyinin rəhbərliyi şəxsi heyətlə birgə nahar edib.</p>
<p>Bəhreynin “Əl Əyam” və ingiliscə nəşr edilən “The Daily Tribune - News of Bahrain” qəzetlərində Azərbaycanın Səudiyyə Ərəbistanındakı səfiri Şahin Abdullayevin “Azərbaycan xalqı müstəqilliyinin bərpasının 30-cü ildönümünü qeyd edir” sərlövhəli məqaləsi dərc edilib. </p><p><a href="https://azertag.az" target="_blank" class="azertac-link">AZƏRTAC</a> xəbər verir ki, məqalədə müstəqillik illərində ölkə həyatının müxtəlif sahələrində köklü dəyişikliklərin baş verdiyi, onların ən əsasının isə torpaqların işğaldan azad edilməsi olduğu vurğulanıb. Müəllif qeyd edib ki, dövlət müstəqilliyinin ilk illərində Azərbaycan böyük çətinliklərlə üzləşib və ərazilərinin 20 faizi işğalçı Ermənistan tərəfindən zəbt edilib. Sovet İttifaqının süqutundan sonra ölkəmizdə siyasi, iqtisadi, sosial və mənəvi böhran başlayıb, düşmən ərazilərimizdə etnik təmizləmə siyasəti həyata keçirib. Belə şəraitdə xalq öz xilaskarını təkidlə hakimiyyətə dəvət edib. Məhz ümummilli lider Heydər Əliyevin çoxillik dövlətçilik təcrübəsinə əsaslanan müdrik siyasi kursu nəticəsində Azərbaycan qısa müddətdə dərin böhrandan çıxıb və inkişaf yoluna qədəm qoyub. Dahi siyasi xadimin 1994-cü ildə transmilli enerji şirkətləri ilə imzaladığı “Əsrin müqaviləsi” Azərbaycana böyük sərmayə xaınını təmin edib və gələcək nəhəng neft-qaz layihələrinin əsasını qoyub. Yeni Azərbaycan dövlətini quran Heydər Əliyev bəyan etmişdi: “Azərbaycanın dövlət müstəqilliyi əbədidir, sarsılmazdır, dönməzdir”. </p><p>Məqalədə Azərbaycanın beynəlxalq nüfuzunun artması sahəsində görülmüş işlər, BMT, Avropa Şurası, İslam Əməkdaşlıq Təşkilatı və digər beynəlxalq təşkilatlara qoşulması, xüsusən İslam ölkələri ilə sıx əməkdaşlıq və dostluq əlaqələrinin qurulmasından bəhs olunub.</p><p>Ş.Abdullayev vurğulayıb ki, 2003-cü ildə hakimiyyətə gələn Prezident İlham Əliyev iqtisadiyyatın inkişafı, yeni transmilli enerji layihələrinin həyata keçirilməsi, ölkədə işsizliyin və yoxsulluğun azaldılması sahələrində böyük işlər görüb. Onun ardıcıl və məqsədyönlü fəaliyyəti nəticəsində Azərbaycan regionun lider dövlətinə çevrilib. Dövlətimizin başçısı, həmçinin Ulu Öndərin İslam aləmi, o cümlədən ərəb ölkələri ilə dostluq əlaqələrinin möhkəmlənməsi və əməkdaşlığın inkişafı siyasətini uğurla davam etdirib. </p><p>Məqalədə Azərbaycanın humanitar, mədəni sahədə əldə etdiyi uğurlardan, dövlətimizin tolerantlıq, dinlər və sivilzasiyalararası dialoq təşəbbüslərindən bəhs olunub. </p><p>Sonda vurğulanıb ki, Azərbaycan Prezidenti ümummilli lider Heydər Əliyevin vəsiyyətini yerinə yetirərək Ali Baş Komandanı olduğu Ordunun Qələbəsini 44 gün ərzində təmin edib, rəşadətli əsgərlərimiz torpaqlarımızı düşməndən azad edib və ərazi bütövlüyümüz bərpa olunub. Hazırda işğaldan azad edilmiş ərazilərdə geniş bərpa-quruculuq işləri aparılır, keçmiş məcburi köçkünlərin tezliklə öz doğma yurdlarına qayıtması istiqamətində tədbirlər həyata keçirilir.</p><p> </p><p><em><strong>Oqtay Bayramov</strong></em></p><p><em><strong><a href="https://azertag.az" target="_blank" class="azertac-link">AZƏRTAC</a>-ın xüsusi müxbiri</strong></em></p><p><em><strong>Qahirə</strong></em></p>
<p>Çoxdan gözlənilən sərgi – “Rebuild Karabakh” - Azərbaycan Beynəlxalq “Qarabağın Bərpa, Yenidənqurma və İnkişafı” sərgisi 2021-ci il oktyabrın 20-22-də Bakı Ekspo Mərkəzində keçiriləcək. Eyni tarixlərdə, 26-cı Azərbaycan Beynəlxalq İnşaat Sərgisi “BakuBuild 2021” və 13-cü Beynəlxalq “İstilik, Havalandırma, Kondisionerləşdirmə, Su Təchizatı, Santexnika və Üzgüçülük Hovuzu” “Aquatherm Baku 2021” sərgisini özündə birləşdirən ənənəvi Xəzər İnşaat Həftəsi başlayır. Üç gün ərzində sərgiyə gələn ziyarətçilər dünyanın 17 ölkəsindən 279 şirkətin məhsulları ilə tanış ola biləcəklər.</p><p><a href="https://azertag.az" target="_blank" class="azertac-link">AZƏRTAC</a> xəbər verir ki, bu barədə 1-ci Azərbaycan Beynəlxalq “Qarabağın Bərpa, Yenidənqurma və İnkişafı” - “Rebuild Karabakh” və 26-cı Azərbaycan Beynəlxalq İnşaat “BakuBuild” Sərgilərinin açılışına həsr olunmuş mətbuat konfransında deyilib.</p><p>Qeyd edilib ki, 30 ildir gözlənilən birinci “Rebuild Karabakh” sərgisini Azərbaycan Beynəlxalq “Qarabağın Bərpa, Yenidənqurma və İnkişafı” sərgisi kimi adlandırmaq olar. Azərbaycan Respublikasının Prezidenti, Müzəffər Ali Baş Komandan İlham Əliyevin rəhbərliyi ilə 44 günlük Vətən Müharibəsində igid Azərbaycan Ordusunun qazandığı tarixi Zəfərdən sonra azad edilmiş torpaqların bərpası prioritet vəzifədir. İşğaldan azad edilmiş ərazilərin bərpası və yenidən qurulması prosesinin effektivliyini artırmaq, bu istiqamətdə özəl-dövlət tərəfdaşlığını möhkəmləndirmək, bölgənin inkişafı üçün ən cəlbedici və səmərəli məhsul, layihə və həlləri nümayiş etdirmək məqsədilə “Rebuild Karabakh” sərgisi təşkil edilib.</p><p>Sevindirici haldır ki, sərgi həm yerli, həm də xarici şirkət və strukturların marağını cəlb edib. Almaniya, Gürcüstan, İsrail, Macarıstan və Türkiyədən 5 milli pavilyon 1-ci “Rebuild Karabakh” sərgisində iştirak edir. Milli pavilyonlar ölkələrinin ticarət və sənaye palatasının dəstəyi ilə təşkil edilir. İştirakçılar arasında bir çox Azərbaycan dövlət strukturları və özəl şirkətlər var.</p><p>Sərginin ekspozisiyasına təhlükəsizlik, hasilat sənayesi, səhiyyə, informasiya texnologiyaları, təhsil, qida sənayesi, kənd təsərrüfatı, inşaat, yol tikintisi və infrastruktur, nəqliyyat, turizm və mədəni irs, enerji, ekologiya sahələri daxildir. Sərgidə “yaşıl enerji”, “ağıllı kənd” layihələri, işğaldan azad edilmiş ərazilərdə yerləşən su və su qurğuları, onların bərpası, mühafizəsi və səmərəli istifadəsi üçün planlaşdırılan layihələr, yeni hava limanları və bir çox başqa layihələr də yer alır.</p><p>“Caspian Event Organisers” şirkəti və Qarabağ Dirçəliş Fondu arasında imzalanan anlaşma memorandumu çox böyük əhəmiyyət kəsb edir. Memoranduma əsasən, “Rebuild Karabakh” sərgisində iştirak edən şirkətlərin qeydiyyat haqlarının bir hissəsi azad edilmiş ərazilərin bərpası üzrə işlərin həyata keçirilməsi üçün Fonda yönləndiriləcək. Fonda ediləcək ianə işğaldan azad edilmiş ərazilərin bərpası və yenidənqurması ilə bağlı vəzifələrin həyata keçirilməsi istiqamətində görüləcək işlərə əlavə dəstək olacaq.</p><p>Ənənəvi “BakuBuild” sərgisi pandemiya səbəbiylə bir illik fasilədən sonra daimi iştirakçılarını itirərək deyil, həm də yeni şirkətlər əlavə edərək fəaliyyətinə start verir. İstehsalçılar, distribüterlər, konsaltinq şirkətləri və inşaat sektorunda xidmət göstərən şirkətlər də daxil olmaqla Azərbaycan şirkətləri sərgi iştirakçılarının 40 faizini təşkil edir. Qeydiyyat sponsoru sərginin daimi iştirakçısı “NB Group”dur (Corella markası). Tikinti sərgisinin vizit kartı milli pavilyonlardır və bu il Belarus, İran, Çexiya, BƏƏ, Türkiyədən 5 milli pavilyon, habelə Rusiya Federasiyasından 8 regional qrup, Bryansk, Lipetsk, Novosibirsk, Rostov, Yaroslavl, Stavropol, Tatarıstan, Çuvaşiya regional qrupları iştirak edir.</p><p>Sərgi geniş çeşiddə yenilikçi tikinti materiallarını təqdim edir, bunlara daxildir: dam örtüyü və izolyasiya, interyer, bitirmə materialları, dizayn, boyalar, laklar və döşəmə örtükləri, landşaft memarlığı və dizaynı, fasadlar, qranit və mərmər, keramika, qapı və pəncərələr, işıqlandırma və elektrik məhsulları, tikinti texnikası və sair. İştirakçılar sərginin peşəkar ziyarətçilərinə tikinti sənayesinin ən son yeniliklərini və nailiyyətlərini əyani şəkildə nümayiş etdirəcək və sərgiyə gələnlər birbaşa sərgidə təqdim olunan məhsulları sınaqdan keçirə biləcəklər.</p><p>Beləliklə, uzun illər təşkil olunan “BakuBuild” sərgisi müasir biznesin inkişaf meylləri ilə ayaqlaşaraq qısa müddətdə hədəf auditoriya ilə üz-üzə görüşlər keçirməyi, yerində və dərhal iş qurmağı mümkün edir.</p><p>Beynəlxalq “İstilik, Havalandırma, Kondisionerləşdirilmə, Su Təchizatı, Santexnika və Üzgüçülük Hovuzu” sərgisi 13 ildir ki, istilik, havalandırma, hovuzlar, sauna, SPA, kondisioner (HVAC), avadanlıqlar sahəsində bölgənin aparıcı peşəkar sərgisi mövqeyini qoruyur. Sərgidə hava təmizləyiciləri, kondisionerlər, radiatorlar, ventilyasiya sistemləri, istilik sistemləri, istilik izolyasiya materialları, hamam və jakuzi, saunalar, hovuzlar, qızdırıcılar, kompressorlar, soyuducular, ətraf mühitin mühafizəsi texnologiyaları, filtrlər, fitinqlər, boru kəmərləri, nasoslar, soyuducular, günəş enerjisi və sair kimi sektorlar təqdim olunur.</p><p>İştirakçılar və ziyarətçiləri 3 gün ərzində “Azpromo”nun dəstəyi və iştirakı ilə təşkil edilən zəngin mədəni və işgüzar tədbirlər proqramı gözləyir.</p><p>“Rebuild Karabakh” sərgisinin proqramına Azərbaycanda yaradılmış biznes mühiti və investisiya imkanları, işğaldan azad olunmuş ərazilərin iqtisadi, investisiya və turizm potensialı, Qarabağda həyata keçirilməsi təklif olunan layihələr, “Made in Karabakh” əmtəə nişanına dair təqdimatlar, Qarabağın enerji potensialı – azad olunmuş bölgələrdə “yaşıl energetika”nın inkişaf imkanları, regionun müharibə sonrası bərpası, “Rəqəmsal iqtisadiyyat” mövzusunda təqdimatlar, Dördüncü Sənaye İnqilabı üzrə Azərbaycanda yeniliklər mövzularında təqdimatlar daxildir.</p><p>İşgüzar proqramda əsas hadisələrindən biri sərgilərdə yeni işgüzar əlaqələrin qurulması və mövcud əlaqələrin möhkəmləndirilməsi üçün əlavə platforma - ikitərəfli görüşlər (B2B) olacaq. Bu görüşlər oktyabrın 20-si və 21-də sərgi iştirakçıları, yerli istehsalçılar və distribüterlər arasında keçiriləcək.</p><p>İştirakçılar arasında ilk dəfə olaraq, oktyabrın 21-i və 22-də Türkiyə Kondisioner İstehsalçıları Birliyi, Bakı Ekspo Mərkəzində şirkətlər ilə maraqlı B2B görüşlər təşkil edəcək.</p><p>“Dubai Industries & Export” tərəfindən təşkil edilən BƏƏ-dən işgüzar nümayəndə heyəti, inşaat sektorunda və Qarabağ bölgəsində investisiya imkanları ilə tanış olmaq üçün sərgiyə səfər edəcək. </p><p>Oktyabrın 20-də Rusiyanın “Kraspan” şirkətinin seminarı, oktyabrın 22-də isə Naxçıvan Sement Zavodu “Naxçıvan Muxtar Respublikasında istehsal olunan tikinti materialları” mövzusunda seminar keçiriləcək.</p><p>Proqram haqqında daha ətraflı məlumatı veb-saytdan əldə edə bilərsiniz - “<a href="https://rebuildkarabakh.az/az-programme/" target="_blank">https://rebuildkarabakh.az/az-programme/</a>”.</p><p>Mədəni proqram çərçivəsində sərginin bütün günlərində xüsusi olaraq təşkil edilmiş “Qarabağ inciləri” zonasındakı foyedə Qarabağ bölgəsinin zəngin musiqi irsini əks etdirən müxtəlif tədbirlər keçiriləcək. Burada uşaqlar üçün Qarabağ haqqında kitablar, Qarabağ bölgəsinin geyimləri, “Qarabağ” şahmat fiqurları, Qarabağ xalçaları, Qarabağ mənzərələri fonunda şəkil çəkdirib və dərhal sosial şəbəkələrdə paylaşa biləcəyiniz “360 video spinner” görə biləcəksiniz. </p><p>Qarabağ Dirçəliş Fondu Qarabağ haqqında “Əvvəl və sonra” adlı fotoşəkillərdən ibarət sərgi təşkil edəcək.</p><p>Azərbaycan Respublikası Mədəniyyət Nazirliyi dəstəyi ilə sərginin üçüncü günündə foyedə “Mədəniyyət naminə sülh” Qlobal Kampaniyası mədəni bir proqram təşkil olunacaq. </p><p>1-ci “Rebuild Karabakh” sərgisi bir çox dövlət qurumlarından dəstək alıb. Sərgi İqtisadiyyat, Kənd Təsərrüfatı, Energetika, Ekologiya və Təbii Sərvətlər, Fövqəladə Hallar nazirlikləri, Kiçik və Orta Biznesin İnkişafı Agentliyi (KOBİA), İxracın və İnvestisiyaların Təşviqi Fondu (Azpromo), Dövlət Şəhərsalma və Arxitektura Komitəsi, Dövlət Mənzil İnşaatı Agentliyi, Qarabağ Dirçəliş Fondu, Sahibkarlar (İşəgötürənlər) Təşkilatları Milli Konfederasiyası (ASK) tərəfindən dəstəklənir.</p><p>“BakuBuild” sərgisi isə İqtisadiyyat Nazirliyi, Dövlət Şəhərsalma və Arxitektura Komitəsi, Dövlət Mənzil İnşaatı Agentliyi, Azərbaycan Memarlar İttifaqı, eləcə də həm “BakuBuild”, həm də “Aquatherm Baku” sərgiləri KOBİA, Azpromo və ASK tərəfindən dəstəklənir.</p><p>2021-ci il sərgilərinin ortaqları arasında tur operator “Greenwich Travel Club” da yer alır. Sərginin təşkilatçıları qismində “Caspian Event Organisers” və tərəfdaşlar “Iteca Caspian”, “Caspian Event Management FZ-LLC”, “ICA Eurasia FZ-LLC” və sair çıxış edir.</p><p>Xüsusilə sərgilərin rəsmi saytlarında sərgi iştirakçıları üçün “Azərbaycana Giriş Qaydaları” bölməsi açılıb. Bu məlumatlar dərhal yenilənir və bunun sayəsində əcnəbi iştirakçılar ölkəyə gəlmək ehtimalını öyrənə bilərlər. Qarabağ müharibəsi veteranları üçün növbədən kənar keçid üçün ayrıca qeydiyyat təşkil edilib.</p><p>Beləliklə, sərgilərin keçiriləcəyi 3 gün ərzində minlərlə mütəxəssis tikinti sənayesinin yenilikləri ilə tanış ola, müqavilələr bağlaya, sənayenin aparıcı istehsalçıları və distribüterlərin ortağı ola və sürətlə inkişaf edən ən son texnologiyaları tətbiq edə biləcəklər. </p><p>Canlı təşkil olunan tədbirlərin təhlükəsiz keçirilməsi üzrə qaydalar Nazirlər Kabineti yanında Operativ Qərargahın, eləcə də Ümumdünya Sərgi Sənayesi Assosiasiyasının (UFI) tövsiyələrinə (sosial məsafə, maska rejimi, antiseptik / təmizləyici vasitələrin tətbiqi, bədən hərarətinin yoxlanılması və ərazinin müntəzəm dezinfeksiya edilməsinə) əsaslanır.</p><p>“Rebuild Karabakh”, “BakuBuild”, “Aquatherm Baku” sərgilərindən ən son xəbərlər dərhal sərgi saytlarında və sosial şəbəkələrdə yerləşdiriləcək. Uzun illər yerli istehsalçılar üçün tikinti sektorunda işgüzar təmasların naviqatoru olan sərgilər üçün sərgi iştirakçılarının rəsmi kataloqu yerləşdirilib.</p>
<p>Qazaxıstanın paytaxtı Nur-Sultanda Azərbaycan Respublikasının müstəqilliyinin bərpasının 30-cu ildönümünə həsr edilmiş tədbir keçirilib.</p><p><a href="https://azertag.az" target="_blank" class="azertac-link">AZƏRTAC</a> xəbər verir ki, ölkəmizin Qazaxıstandakı səfirliyinin təşkilatçılığı ilə keçirilən tədbirdə ziyalılar, yerli ictimaiyyətin tanınmış nümayəndələri, gənclər və KİV nümayəndələri iştirak ediblər.</p><p>Ölkəmizin Qazaxıstandakı səfiri Ağalar Atamoğlanov ölkəmizin müstəqillik uğrunda keçdiyi şərəfli yoldan, müasir Azərbaycan dövlətinin banisi Heydər Əliyevin müstəqilliyimizin bərpası və qorunması istiqamətində yorulmaz fəaliyyətindən, onun ölkəmizdə həyata keçirdiyi dövlət quruculuğu və inkişaf siyasətindən danışıb. Bu siyasətin hazırda Azərbaycan Prezidenti İlham Əliyev tərəfindən uğurla davam etdirildiyi, ölkəmizin beynəlxalq arenada nüfuzunun artdığı, 44 günlük Vətən müharibəsi nəticəsində Azərbaycanın ərazi bütövlüyünü bərpa etdiyi bildirilib. </p><p>Diplomat qeyd edib ki, ümummilli lider Heydər Əliyevin apardığı uğurlu siyasət bu gün Azərbaycan Prezidenti İlham Əliyev tərəfindən uğurla davam etdirilir. Vurğulanıb ki, dövlətimizin başçısı İlham Əliyevin apardığı uğurlu diplomatiya son 18 ildə Azərbaycana bölgədə və dünyada layiqli yer qazandırıb.</p><p>Qeyd edilib ki, 44 günlük Vətən müharibəsi 30 ilə yaxın davam edən Ermənistanın işğalçılıq siyasətinə son qoyub, Azərbaycan ərazi bütövlüyünü, bir milyona yaxın azərbaycanlının fundamental hüquqlarını bərpa edib. Azərbaycanın BMT Təhlükəsizlik Şurasının 1993 -cü il tarixli müvafiq qətnamələrinin icrasını təkbaşına təmin edib. </p><p>Qazaxıstanın L. Qumilyov adına Avrasiya Milli Universitetinin prorektoru Gülnar Merzadinova iki ölkənin ali təhsil ocaqları arasında əməkdaşlıq münasibətlərdən bəs edərək bildirib ki, hazırda akademik mobillik, elmi-araşdırma sahələrində təcrübələr aparılır. G. Merzadinova Azərbaycan Prezidentinin 2010-cu ildə L.Qumilyov adına Avrasiya Milli Universitetinin fəxri professoru adına layiq görülməsindən qürur duyduğunu bildirib. Qeyd etdi ki, bu ali təhsil ocağında Azərbaycan xalqının ümummilli lideri Heydər Əliyev adına auditoriyanın yaradılması iki ölkə arasında əlaqələrin inkişafında vacib addım oldu.</p><p>Politoloq Arman Süleymenov və “Elsan” Fondunun prezidenti Serik Yerqali çıxışlarında Azərbaycanla Qazaxıstan dostluq münasibətlərinin əsasının ulu öndər Heydər Əliyevlə elbaşı Nursultan Nazarbayev tərəfindən qoyulduğunu, bu dostluq, qardaşlıq ənənəsinin müstəqillik illərində daha da inkişaf etdirildiyini vurğulayıblar. Natiqlər xalqlarımız və ölkələrimiz arasında dostluğa, tərəfdaşlığa, yaxın qonşuluğa və qarşılıqlı hörmətə əsaslanan əməkdaşlığın davam etdiriləcəyini və bütün bunların Azərbaycan-Qazaxıstan dostluğunun daha da möhkəmlənməsində mühüm rol oynayacağını bildiriblər. Serik Yerqali Azərbaycanın Qələbəsinin bütün türk dünyasının zəfəri olduğunu vurğulayıb. Eyni zamanda, qeyd edib ki, Azərbaycan xalqı nümunə 30 il ərzində işğal altında olan torpaqları qaytarmağın mümkünlüyünü sübut edib. </p><p>Tədbir çərçivəsində Azərbaycanın müstəqilliyinin bərpasının 30-cu ildönümündən və 44 günlük Vətən müharibəsindən bəhs edən videoçarx nümayiş etdirilib.</p>
<p>Azərbaycanla Slovakiya arasında olan münasibətlərin həm ikitərəfli formatda, həm də Avropa İttifaqı ilə əməkdaşlıq çərçivəsində inkişafına önəm veririk.</p><p><a href="https://azertag.az" target="_blank" class="azertac-link">AZƏRTAC</a> xəbər verir ki, bu barədə iqtisadiyyat nazirinin müavini Niyazi Səfərov oktyabrın 20-də Bakıda keçirilən Azərbaycan-Slovakiya biznes forumunda deyib.</p><p>Nazir müavini qeyd edib ki, Azərbaycanla Slovakiya arasında tərəfdaşlığın genişləndirilməsində böyük potensial var. Biznes forum tərəfdaşlıq üçün əlverişli imkanlar yaradır. Hazırkı dövrdə ticarət əlaqələrinin artırılması və şaxələndirilməsi əsas hədəflərimizdən biridir. Bugünkü biznes forumda informasiya texnologiyaları, telekommunikasiya xidmətləri, bank, ticarət və investisiya, qida sənayesi və digər sahələrdə fəaliyyət göstərən dövlət və özəl qurumların nümayəndələri iştirak edirlər.</p><p> </p>
<p style="text-align:;" justify;">2006-2007-ci il təvəllüdlü oğlan və qız atletləri arasında keçirilən kross qaçışı üzrə muxtar respublika birinciliyinə yekun vurulub. Naxçıvan Muxtar Respublikası Gənclər və İdman Nazirliyi ilə Atletika Federasiyasının birgə təşkil etdiyi birincilikdə 100-ə yaxın atlet qüvvəsini sınayıb. </p><p>Naxçıvan Muxtar Respublikası Gənclər və İdman Nazirliyinin mətbuat xidmətindən <a href="https://azertag.az" target="_blank" class="azertac-link">AZƏRTAC</a>-ın Naxçıvan bürosuna bildirilib ki, birinciliyin mükafatlandırma mərasimində çıxış edən Naxçıvan Muxtar Respublikası Atletika Federasiyasının sədri Rəhman Məmmədov muxtar respublikada idmanın inkişafına göstərilən diqqət və qayğıdan danışıb. Bildirib ki, bu gün muxtar respublikanın bütün ali təhsil ocaqlarında uşaq, yeniyetmə və gənclərin bu sahə ilə məşğul olmaları üçün hər bir şərait yaradılıb. Bunun nəticəsidir ki, idmançılarımız keçirilən ölkədaxili birinciliklərdə uğurla çıxış edərək böyük nailiyyətlər qazanırlar.</p><p>Gənclər və idman naziri Ramil Hacı çıxışında vurğulayıb ki, muxtar respublikanın bütün şəhər və rayonları ilə yanaşı, kəndlərində də idman zallarının, obyektlərinin fəaliyyət göstərməsi, həm də uşaq, yeniyetmə və gənclərin asudə vaxtlarını səmərəli təşkil olunmasına imkan verir. Atletika idman növünə marağın yüksək olması federasiyanın şəhər və rayonlardakı bölmələrinin uğurlu fəaliyyətinin nəticəsidir. </p><p>Çıxış edənlər yaradılan şəraitə görə muxtar respublika rəhbərinə minnətdarlıqlarını bildirib, qalib idmançıları təbrik edib, onlara gələcək karyeralarında uğurlar arzulayıblar. </p><p>Yarışın yekun nəticəsinə əsasən, 2 kilometr məsafədə Sədərək idmançıları Aysu Abbasova, Zeynəb Babayeva və Nurşən Abbasova yarışı ilk üç pillədə başa vurublar. Oğlanların 5 kilometrlik yarışında qalib adını Kəngərli idmançısı Suad Eyvazov qazanıb. Şərur idmançısı Emil Cəfərzadə ikinci, Naxçıvan şəhərinin təmsilçisi Əliabbas Səfərov isə üçüncü olub. Ümumilikdə, ilk 10 pillədə yer alan idmançılar adlarını qaliblər siyahısına yazdırıblar. </p><p>Sonda qalib idmançılar təşkilatçılar tərəfindən diplom və hədiyyələrlə mükafatlandırılıblar.</p><p> </p>
<p style="text-align:;" justify;">Elmi-Tədqiqat Ağciyər Xəstəlikləri İnstitutunda həkim-laborant işləyən Əsədli Aynur Azad qızının intihara cəhd etməsi barədə vətəndaş müraciəti əsasında hazırda Nizami Rayon Prokurorluğunda araşdırma aparılır.</p><p><a href="https://azertag.az" target="_blank" class="azertac-link">AZƏRTAC</a> xəbər verir ki, bu barədə kütləvi informasiya vasitələrindən daxil olmuş sorğulara cavab olaraq Baş Prokurorluğun mətbuat xidməti məlumat yayıb. </p>
<p>Azərbaycan Banklar Assosiasiyası (ABA) Rəyasət Heyətinin sədri Zakir Nuriyev Türkiyə Banklar Birliyi Rəyasət Heyətinin sədri Alpaslan Çakar ilə görüşüb.</p><p>ABA-dan <a href="https://azertag.az" target="_blank" class="azertac-link">AZƏRTAC</a>-a bildirilib ki, Türkiyədə keçirilən görüşdə tərəflər arasında perspektiv və bankların region iqtisadiyyatının inkişafında payı müzakirə edilib. 18 Oktyabr - Müstəqilliyin Bərpası Günü münasibətilə təbriklərini çatdıran Çakar, iki ölkənin bank sektorları arasında əməkdaşlığın daha da inkişaf etdirilməsi üçün hər cür dəstəyi verməyə hazır olduqlarını söyləyib. O, eyni zamanda, yay ayları ərzində Türkiyədə baş verən yanğın fəlakətləri nəticəsində zərər görmüş meşələrin bərpası üçün ağac tingləri bağışlayan Azərbaycan Banklar Assosiasiyasına da təşəkkür edib.</p><p>Xatırladaq ki, ABA-ya üzv təşkilatların (26 bank və 5 bank olmayan kredit təşkilatı) əməkdaşları adından Türkiyənin yanğından zərər çəkmiş meşə fondunun bərpası və yanğının fəsadlarının aradan qaldırılması məqsədilə Türkiyə Banklar Birliyi vasitəsilə Türkiyənin “Ormancılığı Geliştirme ve Orman Yangınları ile Mücadele Hizmetlerini Destekleme Vakfı”na ümumilikdə 102 min 846 ədəd ağac tingi olmaqla 122 min dollar məbləğində vəsait köçürülüb.</p><p>Zakir Nuriyev Azərbaycan Banklar Assosiasiyası və Türkiyə Banklar Birliyi arasında qarşılıqlı əməkdaşlığın uğurla davam etdiyini vurğulayıb və Alpaslan Çakarı Bakıya dəvət edib.</p>
<p>Qida Təhlükəsizliyi Agentliyi başqa ölkələrdən respublikamızın ərazisinə keçə biləcək yoluxucu heyvan xəstəliklərindən qorunmaq məqsədilə Ümumdünya Heyvan Sağlamlığı Təşkilatından (OIE) daxil olan məlumatlar əsasında dünyadakı epizootik vəziyyətə uyğun olaraq müvafiq tədbirlər həyata keçirir.</p><p>Agentliyin İnformasiya təminatı və innovativ həllər şöbəsindən <a href="https://azertag.az" target="_blank" class="azertac-link">AZƏRTAC</a>-a bildiriblər ki, Ümumdünya Heyvan Sağlamlığı Təşkilatının məlumatına əsasən, Almaniya Federativ Respublikasının Bavariya vilayətinin Mühldorf-am-İnn inzibati ərazi vahidində süngərvari ensefalopatiya xəstəliyi, İsrail Dövlətinin Şimal dairəsində və Laos Xalq Demokratik Respublikasının Siangxuang əyalətində yüksək patogen quş qripi xəstəliyi qeydə alınıb.</p><p>Respublika ərazisinin başqa ölkələrdən keçə biləcək yoluxucu heyvan xəstəliklərindən qorunması məqsədilə həmin inzibati ərazi vahidlərindən bütün növ diri iribuynuzlu <a target="_blank" href="https://kayzen.az/blog/k%C9%99nd-t%C9%99s%C9%99rr%C3%BCfat%C4%B1/">kənd təsərrüfatı</a> heyvanları və onlara aid məhsulların, o cümlədən genetik materialların, tərkibinə heyvan mənşəli zülal və sümük unu əlavə olunan yemlərin, OIE-nin “Quruda yaşayan heyvanların sağlamlıq Məcəlləsi”nə əsasən, zonalaşma prinsipi nəzərə alınmaqla, bütün növ diri quş, quş əti və damazlıq yumurtanın idxalına müvəqqəti məhdudiyyət tətbiq olunub.</p><p>Eyni zamanda, nəzarət tədbirlərinin gücləndirilməsi məqsədilə Almaniya, İsrail və Laosdan gələn, yaxud tranzitlə keçən nəqliyyat vasitələri ilə bağlı müvafiq tədbirlərin görülməsi üçün Dövlət Gömrük Komitəsinə müraciət edilib.</p>
<p>Bu il noyabrın 30-dan dekabrın 3-dək Rusiya Federasiyasının Pereslavl-Zalesskiy şəhərində “X Milli Superkompüter Forumu” (НСКФ-2021) keçiriləcək. Tədbir çərçivəsində “Elektron idarəetmədə bulud və paylanmış hesablama sistemləri” mövzusunda konfrans təşkil olunacaq. Təşkilatçılardan biri də AMEA İnformasiya Texnologiyaları İnstitutudur.</p><p>İnstitutdan <a href="https://azertag.az" target="_blank" class="azertac-link">AZƏRTAC</a>-a bildirilib ki, konfrans elektron idarəetmə konsepsiyasının həyata keçirilməsi üçün ixtisaslaşdırılmış hibrid hesablama sistemlərində böyük həcmli məlumatların riyazi modelləşdirilməsi və analizi metodlarının inkişaf etdirilməsinə yönəldilib.</p><p>Tədbirin seksiya iclaslarında İnformasiya Texnologiyaları İnstitutunun alim və mütəxəssisləri elmi məruzələrlə çıxış edəcəklər.</p><p>Qeyd edək ki, AMEA-nın vitse-prezidenti, institutun baş direktoru akademik Rasim Əliquliyev beynəlxalq konfransın proqram komitəsinin üzvüdür.</p>
<p style="text-align:;" justify;">Oktyabrın 19-da Milli Məclisin Təbii ehtiyatlar, energetika və ekologiya komitəsinin sədri Sadiq Qurbanov Şimali-Xəzər və Qaraçaqanaq layihələrində hasilatın pay bölgüsünə dair Qazaxıstan hökumətinin səlahiyyətli orqanı olan “PSA” Səhmdar Cəmiyyətinin nümayəndə heyəti ilə görüşüb.</p><p>Milli Məclisin Mətbuat və ictimaiyyətlə əlaqələr şöbəsindən <a href="https://azertag.az" target="_blank" class="azertac-link">AZƏRTAC</a>-a bildirilib ki, komitə sədri qonaqları qalib Azərbaycanın parlamentində salamlamaqdan məmnunluğunu ifadə edib. Vətən müharibəsində Azərbaycanın Zəfərini türk dünyasının qələbəsi kimi qiymətləndirən Sadiq Qurbanov Qazaxıstan dövlətinin, siyasi və ictimai xadimlərinin haqq işimizə göstərdiyi dəstəyi minnətdarlıqla xatırlayıb.</p><p>O, Azərbaycanla Qazaxıstanı birləşdirən çoxəsrlik tarixi və mədəni əlaqələrdən, ortaq dəyərlərdən danışaraq ümummilli lider Heydər Əliyev və Qazaxıstanın birinci Prezidenti - elbası Nursultan Nazarbayev tərəfindən əsası qoyulan əməkdaşlığın dövlət başçılarımız tərəfindən hazırda da müvəffəqiyyətlə davam etdirildiyini vurğulayıb. O, beynəlxalq təşkilatlar, xüsusən də Türk Şurası çərçivəsində əməkdaşlığımızdan məmnunluğunu ifadə edib. Ölkələrimizin iqtisadi əlaqələri, xüsusən də neft-qaz hasilatındakı birgə fəaliyyəti və təcrübə mübadiləsinə toxunan komitə sədri bu ənənənin davam etdirilməsini yüksək dəyərləndirib.</p><p>Görüşdə iştirak edən Milli Məclisin Təbii ehtiyatlar, energetika və ekologiya komitəsinin üzvü İltizam Yusifov müasir dünyada enerji resurslarının rolundan, Azərbaycanın enerji təhlükəsizliyi siyasətindən bəhs edib, bu sahədə perspektiv imkanlardan danışıb.</p><p>“PSA” Səhmdar Cəmiyyətinin İdarə heyətinin sədri İzbastin Beket, səhmdar cəmiyyətin əməkdaşları Dias İbraşev, Ruslan Balıkbayev və Qazaxıstanın Azərbaycandakı səfiri Serjan Abdıkarimov ölkəmizin Vətən müharibəsindəki Qələbəsini ədalətin zəfəri kimi dəyərləndirib, təbriklərini çatdırıblar. Qonaqlar hasilatın pay bölgüsü layihələri üzrə idarəetmə metodları, yaranan mübahisələrin həlli yolları, bu sahə üzrə qanunvericilik bazası və onun təkmilləşdirilməsi kimi məsələlərlə bağlı Azərbaycanın təcrübəsi ilə maraqlanıblar.</p><p>Görüşdə Milli Məclisin deputatı Əliabbas Salahzadə, “PSA" Səhmdar Cəmiyyətinin əməkdaşı Baqdat Kujatov və digər rəsmi şəxslər də iştirak ediblər. </p>
<p style="text-align:;" justify;">Ankarada Azərbaycan, Türkiyə və Gürcüstan parlamentlərinin xarici əlaqələr komitələrinin üçtərəfli görüşü keçirilib.</p><p><a href="https://azertag.az" target="_blank" class="azertac-link">AZƏRTAC</a> xəbər verir ki, Azərbaycan nümayəndə heyətinə Milli Məclisin Beynəlxalq münasibətlər və parlamentlərarası əlaqələr komitəsinin sədri Səməd Seyidov, deputatlar Sevinc Fətəliyeva, Tural Gəncəliyev və Sahib Alıyev daxildir.</p><p>Türkiyə Böyük Millət Məclisində keçirilən görüşdə digər heyətlərə TBMM-nin komitə sədri Akif Çağatay Kılıç, Gürcüstan parlamentin komitə sədri Nikoloz Samkharadze rəhbərlik ediblər. </p><p>Komitələrin birgə toplantısında regional və parlamentlərarası əməkdaşlığın genişləndirilməsi, qanunvericilik sahəsində informasiya və təcrübə mübadiləsi, ölkələrimiz arasında siyasi, iqtisadi, humanitar, mədəni əlaqələrin inkişafı və digər məsələlər müzakirə olunub.</p><p>Sonda Azərbaycan, Türkiyə və Gürcüstanın parlament komitə sədrlərinin birgə mətbuat konfransı keçirilib.</p><p>Qeyd edək ki, Azərbaycanın parlament nümayəndə heyətinin Türkiyəyə səfəri oktyabrın 20-də başa çatacaq.</p><p><em><strong>Sabir Şahtaxtı</strong></em></p><p><em><strong><a href="https://azertag.az" target="_blank" class="azertac-link">AZƏRTAC</a>-ın xüsusi müxbiri</strong></em></p><p><em><strong>Ankara</strong></em></p>
<p>Dövlət Ekoloji Təhlükəsizlik Xidmətinin əməkdaşları tərəfindən keçirilən növbəti nəzarət tədbirləri zamanı Xəzər dənizi sahillərində və Mingəçevir su anbarında qanunsuz balıq ovlayan şəxslər saxlanılıb.</p><p>Xidmət rəsmisi Bəhruz Məhəmmədov <a href="https://azertag.az" target="_blank" class="azertac-link">AZƏRTAC</a>-a bildirib ki, araşdırma zamanı brakonyerlərin Astara rayon sakinləri Rasim Şəfəqqətov, Xanlar Babayev, Xaçmaz rayon sakinləri Layiq Səbzəliyev, Ehtibar Bəşirov, Bakı şəhər sakini Taleh İsmayılov və Yevlax rayon sakini Şəhriyar Hüseynov olduğu müəyyən edilib. Onlardan istifadəsi qadağan olunmuş ov alətləri götürülüb və 500 metrdən artıq sintetik tor yığışdırılıb. Faktla bağlı akt, protokol tərtib edilib və brakonyerlər ümumilikdə 4200 manat məbləğində cərimələnib. </p><p>B.Məhəmmədov onu da qeyd edib ki, keçirilən nəzarət tədbirləri zamanı ayrı-ayrı rayonların inzibati ərazisində qanunsuz ov edən Kəlbəcər rayon sakini Murğuz Mamedov, Astara şəhər sakini Namiq Əliyev, Bakı şəhər sakini Vilayət Əsgərov, Ağdaş rayon sakini Zimistan Hümmətov saxlanılıb və barələrində qanunamüvafiq tədbirlər görülüb.</p><p> </p>
<p style="text-align:;" justify;">Oktyabrın 19-da Azərbaycanda 31 min 60 nəfər yeni növ koronavirus (COVID-19) infeksiyası əleyhinə vaksinasiya olunub.</p><p>Nazirlər Kabineti yanında Operativ Qərargahdan <a href="https://azertag.az" target="_blank" class="azertac-link">AZƏRTAC</a>-a bildirilib ki, gün ərzində birinci mərhələ üzrə vaksinasiya olunanların sayı 12 min 604, ikinci mərhələ üzrə vaksinasiya olunanların sayı 18 min 456 nəfər təşkil edib.</p><p>Azərbaycanda bu günə qədər vurulan vaksinlərin ümumi sayı 9 milyon 226 min 83, birinci mərhələ üzrə peyvənd olunanların ümumi sayı 4 milyon 976 min 945, ikinci mərhələ üzrə vaksinasiya edilənlərin sayı 4 milyon 249 min 138 nəfər təşkil edir.</p>
<p>Sentyabr ayında Azərbaycandakı külək elektrik stansiyalarında (KES) 8,5 milyon kilovat/saat elektrik enerjisi istehsal olunub. </p><p><a href="https://azertag.az" target="_blank" class="azertac-link">AZƏRTAC</a> Dövlət Statistika Komitəsinin məlumatlarına istinadla xəbər verir ki, ötən ay ölkədəki günəş elektrik stansiyalarında (GES) isə 5,5 milyon kilovat/saat elektrik enerjisi istehsal edilib.</p>
