<p>Ölkənin ən məşhur mobil tətbiqi olan “BirBank” daha bir yeniliklə xidmət çeşidini genişləndirib. Belə ki, artıq “Zolotaya Korona” sürətli pul köçürməsi ilə gələn vəsaiti banka getmədən, “BirBank” üzərindən “Kapital Bank”ın ödəniş kartları ilə əldə etmək olar. Köçürmə haqqında məlumatları tətbiqə daxil etməklə həmin vəsaiti ödəniş kartına köçürüb, həm nağd, həm də nağdsız şəkildə istifadə etmək mümkündür.</p><p>Qeyd edək ki, “BirBank” tətbiqinin istifadəçiləri POS-terminal, internet və “BirBank” vasitəsilə ödənişlər edərək “Ürəklər” qismində olan bonuslar qazana bilərlər. Sonra həmin bonusları toplayıb, müxtəlif hədiyyələrə dəyişmək mümkündür. “BirBank” vasitəsilə “Kapital Bank”a aid olan kartlarla yanaşı, digər istənilən bankların kartları ilə də ödənişlər edib, bu proqrama qoşularaq hədiyyələr qazanmaq mümkündür. Bonusların hesablanması qaydası ilə saytdan tanış ola bilərsiniz – <a href="http://www.kapitalbank.az/tariffs" target="_blank">www.kapitalbank.az/tariffs</a>. </p><p>Xatırladaq ki, ölkə üzrə ən məşhur olan “BirBank” tətbiqinin 2 milyondan çox istifadəçisi var. “iOS” və “Android” əməliyyat sistemlərinin istifadəçiləri 1 dəqiqə vaxt sərf edərək onlayn qeydiyyatdan keçməklə xidmətdən yararlana bilərlər. Tətbiqin bir sıra üstünlükləri var: rahat qeydiyyat, tətbiqə istənilən bankların ödəniş kartlarını əlavə etmək imkanı, əməliyyatlara və hesaba bağlı bonusların idarə edilməsi və sair. </p><p>Ətraflı məlumat üçün “<a href="https://www.birbank.az/home/non-user" target="_blank">www.birbank.az</a>” və ya 196 Məlumat mərkəzinə müraciət edə bilərsiniz.</p>
<p> Azərbaycan Respublikasının işğaldan azad edilmiş ərazilərində məsələlərin mərkəzləşdirilmiş qaydada həll edilməsi üçün yaradılmış Əlaqələndirmə Qərargahının nəzdində fəaliyyət göstərən İdarələrarası Mərkəzin Ekoloji məsələlər üzrə İşçi Qrupunun növbəti iclası keçirilib.</p><p><a href="https://azertag.az" target="_blank" class="azertac-link">AZƏRTAC</a> xəbər verir ki, azad edilmiş torpaqlarda ekoloji məsələlərin təşkili işlərinin əlaqələndirilməsi məqsədilə aidiyyəti dövlət orqanlarının nümayəndələrinin cəlb olunduğu Ekoloji məsələlər üzrə İşçi Qrup işğaldan azad olunan ərazilərdə ətraf mühitə və təbii sərvətlərə vurulan zərərin ilkin qiymətləndirilməsi, bioloji müxtəlifliyin bərpası, su ehtiyatlarının idarə edilməsi, ətraf mühitin monitorinqinin aparılması, hidrometeoroloji şəbəkənin bərpası, mövcud mineral xammal resurslarının monitorinqi və ehtiyatlarının yenidən qiymətləndirilməsi, müvafiq tematik və topoqrafik xəritələrin hazırlanması, faktiki əkin altında olan ərazilərin müəyyənləşdirilməsi, deqradasiya olunmuş torpaqların bərpası, kənd təsərrüfatı sahələri üçün müvafiq resursların planlaşdırılması, işğaldan azad edilmiş ərazilərdə ərzaq və qida təhlükəsizliyi məsələlərinin təmin edilməsi üzərində işləyir.</p><p>Aidiyyəti qurumlar tərəfindən Qrupun sahəvi tədbirlər planının icrasına başlanılıb. Belə ki, ekoloji vəziyyətin qiymətləndirilməsi üçün işğaldan azad edilmiş rayonlarda kompleks monitorinqlər aparılır və transsərhəd çaylara nəzarət edilir. </p><p>Zəngilan rayonunda yerləşən Bəsitçay Dövlət Təbiət Qoruğunda qiymətləndirmə və bərpa işlərinin planlaşdırılması üçün Azərbaycan Milli Elmlər Akademiyasının mütəxəssislərinin iştirakı ilə ərazidə monitorinqlər aparılır.</p><p>İşğaldan azad olunmuş ərazilərdə radioloji və radioekoloji vəziyyətin öyrənilməsi məqsədilə aidiyyəti dövlət orqanları ilə birgə plan-proqram hazırlanıb və sahəvi plana əlavə olunub.</p><p>Kəlbəcər rayonu ərazisində mövcud olan termal-mineral su yataqlarının vəziyyətinin qiymətləndirilməsi məqsədilə hidrokimyəvi monitorinq işləri aparılıb və monitorinq nəticələri işğaldan əvvəlki dövrün məlumatları nəzərə alınmaqla təhlil olunub.</p><p>Ağdam, Füzuli, Cəbrayıl və Zəngilan rayonlarında filiz və qeyri-filiz, inşaat materialları yataqlarında geoloji-axtarış və qiymətləndirmə işləri, Kəlbəcər və Şuşa rayonlarında yeraltı şirin su və termal-mineral suların monitorinq və qiymətləndirmə işləri üzrə layihələr hazırlanıb və hazırda sahə işləri planlaşdırılır.</p><p>Qarabağ iqtisadi rayonu üzrə 13 filiz yatağının fond məlumatları əsasında xəritələri hazırlanıb. </p><p>İşğaldan azad olunmuş rayonların topoqrafik xəritələrin hazırlanması işləri davam etdirilir.</p><p>İşğaldan azad edilmiş ərazilərin bərpa olunan enerji mənbələri potensialının ölçülməsi məqsədilə Energetika Nazirliyi yanında Bərpa Olunan Enerji Mənbələri Dövlət Agentliyinin əməkdaşları tərəfindən Füzuli, Cəbrayıl, Zəngilan, Qubadlı və Laçın rayonlarında potensial günəş enerjisi ərazilərinə baxış keçirilib və Zəngilan rayonunda ölçmə-müşahidə stansiyası quraşdırılıb. </p><p>Hidroenerji potensialından səmərəli istifadə ilə bağlı İşçi Qrupun aidiyyəti qurumları tərəfindən müvafiq işlər aparılır.</p><p>Regionda balıqçılığın inkişaf etdirilməsi məqsədilə balıqçılıq təsərrüfatlarının yaradılması üçün münasib ərazilərin müəyyən edilməsi, həmçinin mövcud olmuş və dağıdılmış təsərrüfatların bərpası üçün işlər aparılır. </p><p>Sahəvi Tədbirlər Planına uyğun olaraq işğaldan azad edilmiş ərazilərdə hərbi əməliyyatlar nəticəsində torpaqlarda baş vermiş deqradasiyanın peyk təsvirləri əsasında ilkin qiymətləndirilməsi və xəritələşdirilməsi işləri aparılır. Deqradasiya olunmuş torpaqların bərpası üçün qrupun aidiyyəti elmi institutları tərəfindən qiymətləndirmə işləri aparılır. İşğaldan azad edilmiş rayonlarda kənd təsərrüfatı fəaliyyətinin bərpası və təşkili məqsədilə peyk təsvirləri əsasında potensial əkin sahələri müəyyən olunmuş və xəritələşdirilmişdir.</p><p>Qrup fəaliyyətini İdarələrarası Mərkəzin digər İşçi qrupları ilə sıx əlaqə və məlumat mübadiləsi formatında həyata keçirməkdədir.</p><p>Azərbaycan Respublikası Prezidentinin 2020-ci il 24 noyabr tarixli Sərəncamı ilə yaradılmış Əlaqələndirmə Qərargahına Prezident Administrasiyasının rəhbəri Samir Nuriyev rəhbərlik edir.</p>
<p>Bu gündən aprelin 5-i saat 06:00-dək bütün ölkə ərazisində ictimai nəqliyyatın fəaliyyəti dayandırılıb.</p><p><a href="https://azertag.az" target="_blank" class="azertac-link">AZƏRTAC</a> xəbər verir ki, Nazirlər Kabineti yanında Operativ Qərargahın qərarına əsasən, bütün ölkə ərazisində şənbə və bazar günləri ictimai nəqliyyatın fəaliyyəti qadağan edilib.</p><p> </p>
<p>Dünya özünü COVID-19-dan qorumağa çalışır. </p><p><a href="https://azertag.az" target="_blank" class="azertac-link">AZƏRTAC</a> xəbər verir ki, cəmi üç ay ərzində dünyada 596 milyon doza vaksin tətbiq olunub. Bu da 100 nəfərə nisbətdə 7,7 doza təşkil edir. Əhalinin daha çox peyvənd edildiyi ölkələrdən biri olan İsraildə bu rəqəm hər 100 nəfərə nisbətdə 116 dozaya yüksəlib.</p><p>Aİ-nin əksər ölkələrində, o cümlədən İspaniya və İtaliyada bu göstərici 17 doza təşkil edir. Dünya əhalisinin ən azı 2 faizi immunlaşdırılıb. Amma ölkələr arasında vaksinləmə səviyyəsi qeyri-bərabərdir. İsraildə əhalinin 55 faizi artıq iki dəfə peyvənd olunub. Bu siyahıda daha sonra Çili (18 faiz), ABŞ (16 faiz) ölkələri gəlir.</p><p>İspaniya, Danimarka, İslandiya, Yunanıstan, İtaliya, Almaniya kimi əhalinin təxminən 6 faizinin peyvənd olunduğu ikinci qrupa daxildir. “Pfizer-BioNTech” və “AstraZeneca” şirkətlərinin vaksinlərinin üstünlük təşkil etdiyi Avropa İttifaqında əhalinin 5,7 faizi artıq peyvənd olunub. </p><p>İspaniya və Avropada yanvar ayından etibarən vaksinləmə prosesi gözlənilmədən sürətlənir. İspaniyada fevral ayının sonunda gündə yalnız 2 min doza tətbiq olunub. Bu həftə isə, vaksinləmə prosesi rekord həddə, hər bir milyon nəfərə nisbətdə 4 min dozaya çatıb. </p><p>Latın Amerikasında qonşu ölkələrə nisbətən dörd və ya beş dəfə çox gündəlik dozalar təqdim edən Çili xüsusilə fərqlənir. Burda əhalinin 18 faizi artıq tamamilə immunlaşdırıılıb. Çili tibb işçilərinin immunizasiyası üçün Çinin “Sinovac” şirkətinin 60 milyon dozalıq “CoronoVac” vaksinini alıb. Çilinin vaksinləmə strategiyası iyun ayının sonuna qədər bütün yaşlıların immunlaşdırılmasını nəzərdə tutur.</p><p>Argentina lap əvvəldən Rusiyanın “Sputnik V” vaksininə üstünlük verib. Daha əvvəl isə Meksika Rusiyadan 24 milyon dozalıq “Sputnik V” vaksini alıb. </p><p>Vaksinləmə prosesi ilk növbədə qocalar evlərindəki yaşlı insanları, daha sonra isə bütün yaşlı əhalini peyvənd etməyi nəzərdə tutur. Bu qrupdan olan insanlar daha həssas olduğundan onlara üstünlük verilir. III Karlos adına Sağlamlıq İnstitutunun məlumatlarına görə, İspaniyada COVID-19-dan ölüm hallarının 65 faizini yaşı 80-dən yuxarı olanlar təşkil edir. </p><p>Yeni məlumatlara görə, İspaniyada yaşı 71-dən yuxarı olan insanların 80 faizi ən azı bir dəfə peyvənd olunub. Bu, Səhiyyə naziri Karolina Darias tərəfindən təsdiqlənmiş vaksinləmə layihəsinin mart ayında 80 faizinin yerinə yetirilməməsi deməkdir. Bu, Xəstəliklərin İdarə Edilməsi və Qarşısının Alınması üzrə Avropa Mərkəzinin (ECDC) məlumatına görə, təxminən 60 faiz təşkil edir. Bu yaşda olan insanların əksəriyyəti artıq müəyyən immunitetə malik olur və onlar, bir neçə həftə keçəndən sonra peyvənd olunacaq. </p><p>Ən yaşlı insanların peyvənd edilməsində İspaniya 10-cu yerdədir. 25-49 yaş qrupunda isə, peyvənd edilmiş əhalinin ən yüksək faizi (10 faiz) ilə İspaniya üçüncü yerdədir. İspaniyada COVID-19-dan hər beşinci ölüm hadisəsi yaşı 70 və daha çox olan insanların payına düşür.</p><p><em><strong>Nigar Cəfərli</strong></em></p><p><em><strong><a href="https://azertag.az" target="_blank" class="azertac-link">AZƏRTAC</a>-ın xüsusi müxbiri</strong></em></p><p><em><strong>Madrid </strong></em></p>
<p>Xristian Demokrat İttifaqı və Xristian Sosial İttifaqı liderləri ölkənin sosial sferasında yaranmış maliyyə problemlərini özünəməxsus qaydada həll etmək istəyirlər.</p><p><a href="https://azertag.az" target="_blank" class="azertac-link">AZƏRTAC</a> xəbər verir ki, təşəbbüsün müəllifləri pensiyaya yaşını 67 yaşadək artırmağı təklif edirlər. Almaniyanın “Bild” qəzetində dərc olunan məqalə cəmiyyətdə, xüsusən də tezliklə pensiyaya yollanmağa hazırlaşanlar arasında ciddi narazılığa səbəb olub. Əgər təklif Bundestaqda təsdiqlənərsə onlar daha çox işləməli olacaqlar. </p><p>Təklifin təşəbbüskarları isə hesab edirlər ki, pensiya yaşının indiki formada qalması belə davam edə bilməz. Təşəbbüsdə pensiya yaşının tənzimlənməsi təklif edilir. Belə ki, 63 yaşında təqaüdə çıxmağı onlar səhv hesab edirlər.</p><p><em><strong>Vüqar Seyidov</strong></em></p><p><em><strong><a href="https://azertag.az" target="_blank" class="azertac-link">AZƏRTAC</a>-ın xüsusi müxbiri</strong></em></p><p><em><strong>Berlin</strong></em> </p>
<p>Xalqımız Prezident, Müzəffər Ali Baş Komandan İlham Əliyevin rəhbərliyi ilə qüdrətli və yenilməz Ordumuzun əldə etdiyi möhtəşəm Qələbənin sonsuz sevinc və qürur hisslərini yaşayır. Qələbənin qazanılması, işğal altındakı torpaqlarımızın azad olunması münasibətilə qurbanlar kəsilir, şəhid ailələri və müharibə əlilləri ziyarət edilərək, qurban payları verilir. </p><p><a href="https://azertag.az" target="_blank" class="azertac-link">AZƏRTAC</a>-ın bölgə müxbiri xəbər verir ki, Beyləqan rayonunda fərdi təsərrüfat sahibi 100 baş qoyun kəsərək şəhid ailələrinə və müharibə əlillərinə paylayıb. Təsərrüfat sahibi Fərid Qəhrəmanov bildirib ki, torpaqlarımızın azad olunması ən byük arzusu olub: "Əhd eləmişdim ki, torpaqlar azad olunanda 100 baş qoyun qurban kəsəcəyəm. Ali Baş Komandanın və qüdrətli ordumuzun sayəsində torpaqlarımız işğaldan azad olundu. Biz də bu gün 100 baş qoyun qurban kəsdik. Rayon ərazisində yaşayan şəhid ailələrinə, Qarabağ müharibəsi əlillərinin ailələrinə paylayacağıq. Bir neçə gündən sonra əsgər qardaşlarımıza da qurban payları göndərəcəyik". </p><p>Müharibədən əvvəl Beyləqan rayonunda saxlanılan mal-qaranın yay aylarında Laçın və Kəlbəcər rayonlarındakı yaylaqlara aparıldığını deyən təsərrüfat sahibi tezliklə bu arzularının da reallaşacağına əminliyini ifadə edib. "30 ilə yaxın idi ki, fermerlər sürülərini yaylaqlara apara bilmirdilər. Artıq bu arzumuz da reallaşır. Torpaqlarımız azad edildiyindən təsərrüfatlarımızı Laçın və Kəlbəcər rayonlarında inkişaf etdirə biləcəyik" - deyə, F.Qəhrəmanov əlavə edib.</p>
<p>Azərbaycanın COVID-19-la mübarizədə atdığı addımları dəyərləndirərkən, nə qədər böyük işlər görüldüyünün şahidi oluruq. Ümumdünya Səhiyyə Təşkilatı tərəfindən pandemiya elan olduqdan sonra ölkəmiz bu xəstəliklə bağlı ciddi və əməli tədbirlər görməyə başladı. Halbuki bir çox ölkələr COVID-19-la mübarizədə passivlik göstərirdilər. Azərbaycan xəstəliklə mübarizəyə ilk qoşulan ölkələrdən biridir və ölkəmizdə dövlət səviyyəsində preventiv və qabaqcıl tədbirlər həyata keçirildi. Görülən qabaqlayıcı tədbirlər nəticəsində ölkəmiz istər iqtisadiyyatı, istərsə də əhalisi pandemiyanın dağıdıcı təsirinə ən az məruz qalmış ölkələr sırasında yer aldı. Azərbaycan gözlənilən ikinci və üçüncü dalğanın qarşısının alınması istiqamətində də mühüm işlər gördü. </p><p>Bunu <a href="https://azertag.az" target="_blank" class="azertac-link">AZƏRTAC</a>-a açıqlamasında Milli Məclisin Səhiyyə komitəsinin sədr müavini, tibb elmləri doktoru, professor Rəşad Mahmudov deyib. </p><p>R.Mahmudov vurğulayıb ki, koronavirusla mübarizədə infrastrukturun qurulmasının əhəmiyyəti böyükdür. Onun sözlərinə görə, laboratoriyaların gücünün artırılması həm texniki, həm də insan resursları baxımından xüsusi əhəmiyyət kəsb edirdi. Modul tipli xəstəxanaların istifadəyə verilməsi, onların tibbi ləvazimatlarla təmin olunması, çarpayıların bu istiqamətdə istifadəsinin artırılması, dərman preparatlarının vaxtında ölkəyə gətirilməsi və digər tədbirlər ölkəmizin və cəmiyyətimizin bu xəstəlikdən az zərərlə çıxmasında mühüm rol oynadı. </p><p>Deputat belə çətin məqamda Azərbaycanın digər ölkələrə də yardım etdiyini vurğulayıb. “Azərbaycan koronavirusla mübarizədə yüksək fəallıq göstərərək dost ölkələrə də yardım əlini uzatdı. Ümumilikdə, 30-dək ölkəyə yardım edildi. Ölkəmiz ÜST-ün tövsiyələrinə uyğun olaraq, iqtisadi cəhətdən zəif olan ölkələrdən də köməyini əsirgəmədi. Azərbaycan Qoşulmama Hərəkatının sədri kimi dünya ölkələrini bu amansız xəstəliklə mübarizəyə çağırdı. Azərbaycan həm ÜST, həm də BMT səviyyəsində, bir sözlə beynəlxalq müstəvidə koronavirusla mübarizədə həmrəyliyə, birliyə çağıran təşəbbüskar ölkə kimi tarixə düşdü. Azərbaycan Prezidentinin təşəbbüsü və sədrliyi ilə Türkdilli Dövlətlərin Əməkdaşlıq Şurasının, habelə Qoşulmama Hərəkatının Təmas Qrupu formatında Zirvə görüşlərinin keçirilməsi bu Hərəkata və Ümumdünya Səhiyyə Təşkilatına üzv olan yardıma ehtiyacı olan dövlətlərə maddi yardım göstərilməsi Azərbaycanın beynəlxalq arenada etibarlı tərəfdaş ölkə olmasının bariz nümunəsidir. Prezident İlham Əliyev çıxışlarında ümumbəşəri bəlaya çevrilən bu virusa qarşı mübarizədə insanların sağlamlığının və sosial müdafiəsinin təmin edilməsinin vacibliyini vurğuladı və bütün üzv dövlətləri birgə əməkdaşlığa, qarşılıqlı dəstəyə çağırdı. Dövlətimizin başçısı COVID-19-la mübarizədə dünya birliyini vahid mövqedən çıxış etməyə səslədi. Vaksinlərin bölüşdürülməsinə nəzarət edən COVAX-ı ədalətli olmağa səsləyən də məhz Prezident İlham Əliyev idi”, - deyə Rəşad Mahmudov bildirib. O, diqqətə çatdırıb ki, koronovirusla mübarizədə “qızıl açar” rolunu oynayan vaksinlərin ölkəyə vaxtında gətirilməsi təqdirəlayiqdir. Ölkəmizdə peyvəndləmə işinə Avropanın qabaqcıl ölkələri ilə birlikdə start verildi. Azərbaycan həm də Cənubi Qafqazda xəstəliklə mübarizədə peyvənd prosesinə ilk başlayan ölkədir. Təsadüfi deyil ki, Azərbaycan peyvənd olunmuş əhalinin faizinə görə MDB regionunda liderdir.</p><p>Səhiyyə komitəsinin sədr müavininin sözlərinə görə, cəmiyyətimizin dövlətimizə həmrəylik göstərməsi ölkəmizi tibbi, iqtisadi və sosial nöqteyi-nəzərdən müəyyən mənada qorumuş oldu. İnanırıq ki, bundan sonra da dövlət və cəmiyyət arasındakı həmrəylik meydana çıxan problemlərin həllində və yeni uğurların həll edilməsində öz müsbət rolunu oynayacaq. Əhalinin xeyli hissəsi artıq peyvənd olunub və insanlar bunun faydasını anlayırlar. Vaksinasiya işi davam edir və Azərbaycan qalan əhalinin də peyvənd olunması üçün bütün mümkün tədbirlərdən istifadə edir. Yaxın bir il ərzində əhalinin yetmiş faizinin peyvənd olunması qarşıda duran vacib məsələdir. Bu, bizim sağlam və təhlükəsiz həyatımızın təmin olunması deməkdir. </p><p>Tibb elmləri doktoru vaksinasiyanın faydasından da danışıb: “Vaksin olunan insanlar ay yarımdan sonra orqanizmdə yaranan immunitet və anticisimlər səbəbindən özünü gələcəkdə baş verəcək ağırlaşma halına qarşı hazırlayır. Yəni, həm tibbi nöqteyi-nəzərdən, həm də psixoloji cəhətdən insan buna hazır olur. Digər tərəfdən, peyvənd olunan şəxslər gələcəkdə xarici ölkələrə səfər zamanı heç bir problemlə üzləşməyəcəklər. Peyvənd olunan insanların sayının artması təbii ki, xəstəliklə mübarizədə təhlükəsizliyin təminatıdır”, - deyə o qeyd edib. </p><p>Rəşad Mahmudov vurğulayıb ki, bəziləri elə düşünürlər, peyvənd olundunsa, koronavirusa yoluxa bilməzsən. Əslində, vaksinasiya yoluxmanın deyil, təhlükənin qarşısını almağa xidmət edir. Professor insanlarımızı vaksinasiya prosesində fəal iştirak etməyə çağırıb. </p>
<p>Şarlar və işıqlarla bəzədilmiş foyedə uşaqlar və valideynlər toplaşmışdı. Onlar autizm sindromlu gənc rəssamların əl işlərinə tamaşa edir, öz istedad və bacarığını nümayiş etdirən uşaqların məharətini izləyirdilər.</p><p><a href="https://azertag.az" target="_blank" class="azertac-link">AZƏRTAC</a> xəbər verir ki, Dövlət Tibbi-Sosial Ekspertiza və Reabilitasiya Agentliyinin tabeliyindəki 1 saylı Uşaq Bərpa Mərkəzində Ümumdünya Autizm Məlumatlandırma Günü ilə əlaqədar keçirilən tədbir iştirakçıları maraqlı bir gün yaşayıblar.</p><p>Mərkəzin direktoru Nərgiz Əliyeva qeyd edib ki, flaşmob formasında keçirilən tədbirdə autizm sindromunda reabilitasiya olunmuş Xanlar Qəhrəmanovun 25 rəsm əsəri nümayiş olunub. Onun verdiyi məlumata görə, mərkəzdə həmin sindromdan əziyyət çəkən 18 uşaq reabilitasiya prosesi keçir. Onların bərpa prosesi keçməsi və cəmiyyətə inteqrasiya olunması üçün hər cür tədbirlər görülür və bugünkü tədbir də cəmiyyətin diqqətini həmin kateqoriyadan olanların problemlərinə cəlb etməkdir.</p><p>Tədbirdə məlumat verilib ki, autizm sindromlu sağlamlıq imkanları məhdud uşaqlar ölkəmizdə xüsusi reabilitasiya prosesinə cəlb olunurlar. Ötən il autizm sindromlu 788 uşağa sağlamlıq imkanları məhdudluq təyinatı aparılıb. Əmək və Əhalinin Sosial Müdafiəsi Nazirliyinin tabeliyindəki 1 və 2 saylı Uşaq Bərpa Mərkəzlərində onlara müasir və sınanmış metodlar əsasında tibbi-sosial reabilitasiya xidmətləri göstərilir. Hər iki reabilitasiya müəssisəsində autizm sindromlu uşaqlar mütəmadi olaraq tibbi-sosial reabilitasiya və təlim prosesinə cəlb edilirlər. Həmin kateqoriyadan olan uşaqların səmərəli reabilitasiyası üçün müasir şərait yaradılıb, onlara peşəkar psixoloq, əmək terapevti, özünəqulluq və loqoped xidmətləri təqdim olunur. Bununla yanaşı, nazirliyin sifarişləri əsasında icra olunan reabilitasiyayönümlü sosial xidmət layihələrinin bir istiqaməti də autizm xəstəliyi olan uşaqları əhatə edir. Hazırda autizmlə yanaşı, digər səbəblərdən sağlamlıq imkanları məhdudluq təyin edilmiş uşaqların reabilitasiya infrastrukturu genişləndirilir. Bu il Qəbələ və Şəmkir rayonlarında tikilən Uşaq Reabilitasiya Mərkəzlərinin istifadəyə verilməsi nəzərdə tutulub.</p><p>Mərkəzdə keçirilən tədbirdən autizm sindromlu uşaqlar və onların valideynləri xoş təəssüratla ayrılıblar.</p>
<p>Azərbaycan Respublikasının Prezidenti İlham Əliyev, Ermənistan Respublikasının Baş naziri Nikol Paşinyan və Rusiya Federasiyasının Prezidenti Vladimir Putin Bəyanat imzalayıblar. </p><p> <a href="https://azertag.az" target="_blank" class="azertac-link">AZƏRTAC</a> bəyanatı təqdim edir.</p><div style="padding-left:;" 210px;">“Azərbaycan Respublikası Prezidentinin,</div><div style="padding-left:;" 210px;">Ermənistan Respublikası Baş nazirinin və</div><div style="padding-left:;" 210px;">Rusiya Federasiyası Prezidentinin Bəyanatı</div><div style="padding-left:;" 210px;"> 11 yanvar 2021-ci il</div><p style="text-align:;" justify;">Biz, Azərbaycan Respublikasının Prezidenti İ.H.Əliyev, Ermənistan Respublikasının Baş naziri N.V.Paşinyan və Rusiya Federasiyasının Prezidenti V.V.Putin aşağıdakıları bəyan edirik: </p><p>1. 2020-ci il 9 noyabr tarixli Bəyanatın 9-cu bəndinin regionda bütün iqtisadi və nəqliyyat əlaqələrinin bərpası ilə bağlı hissəsinin reallaşdırılması məqsədilə Rusiya Federasiyasının Prezidenti V.V.Putinin Azərbaycan Respublikasının, Ermənistan Respublikasının baş nazirləri müavinlərinin və Rusiya Federasiyası Hökumətinin sədr müavininin birgə həmsədrliyi ilə üçtərəfli İşçi qrupu yaradılması barədə təklifi dəstəklənir. </p><p>2. İşçi qrupu 2021-ci il yanvarın 30-sək ilk iclasını keçirəcək, bu iclasın nəticələrinə görə Bəyanatın 9-cu bəndinin reallaşdırılmasından irəli gələn işlərin əsas istiqamətlərinin siyahısını formalaşdıracaq, prioritet qismində dəmir yolu və avtomobil yollarını müəyyən edəcək, həmçinin bundan sonra Tərəflər adlanacaq Azərbaycan Respublikası, Ermənistan Respublikası və Rusiya Federasiyası arasında razılaşma əsasında digər istiqamətləri müəyyən edəcəkdir. </p><p>3. Fəaliyyətin əsas istiqamətlərinin reallaşdırılması məqsədilə İşçi qrupunun həmsədrləri bu istiqamətlər üzrə Tərəflərin səlahiyyətli hakimiyyət orqanları və təşkilatlarının vəzifəli şəxslərindən ibarət ekspert yarımqruplarının tərkibini təsdiq edəcəklər. Ekspert yarımqrupları işçi qrupunun iclasından sonra bir ay müddətində layihələrin siyahısını təqdim edəcək, onların reallaşdırılması və Tərəflərin yüksək səviyyədə təsdiq etməsi üçün zəruri resursları və tədbirləri əsaslandıracaqlar. </p><p>4. İşçi qrupu 2021-ci il martın 1-dək Azərbaycan Respublikası və Ermənistan Respublikası ərazisindən həyata keçirilən beynəlxalq daşımaların, həmçinin Azərbaycan Respublikası və Ermənistan Respublikası tərəfindən həyata keçirilən, yerinə yetirilməsi zamanı Azərbaycan Respublikasının və Ermənistan Respublikasının ərazilərinin kəsişməsi tələb olunan daşımaların təşkili, yerinə yetirilməsi və təhlükəsizliyinin təmin edilməsi üçün zəruri olan yeni nəqliyyat infrastrukturu obyektlərinin bərpasını və tikilməsini nəzərdə tutan tədbirlərin siyahısını və reallaşdırılması qrafikini Tərəflərin yüksək səviyyədə təsdiqləməsi üçün təqdim edəcək.</p><div>Azərbaycan Respublikasının Prezidenti</div><div>İ.H.Əliyev</div><div> </div><div>Ermənistan Respublikasının baş naziri</div><div>N.V.Paşinyan</div><div> </div><div>Rusiya Federasiyasının Prezidenti</div><div>V.V.Putin”.</div>
<p>İtaliya polisi bir gəmi kapitanı və bir rus diplomatı casusluqda şübhəli bilərək saxlayıb.</p><p><a href="https://azertag.az" target="_blank" class="azertac-link">AZƏRTAC</a> xəbər verir ki, ”casusluq və dövlət təhlükəsizliyi ilə bağlı ağır cinayət” törətməkdə ittiham olunan və adları açıqlanmayan şəxslər məxfi məlumatların ötürülməsi zamanı saxlanılıblar. Hadisə ilə əlaqədar İtaliya Hərbi Dəniz Qüvvələrinin kapitanı və Rusiyanın Romadakı səfirliyinin diplomatı saxlanılıblar. Səfirliyin digər əməkdaşı və saxlanılan diplomatın tezliklə İtaliyadan çıxarılacağı bildirilir. </p><p>İtaliya polisinin (karabinieri) verdiyi açıqlamada İtaliyanın əks-kəşfiyyat xidmətinin (AİSİ) apardığı uzunmüddətli təhqiqatları nəticəsində hərbi donanmadakı casusluq hadisəsinin aşkarlandığı qeyd edilib.</p><p>İtaliyanın Xarici İşlər Nazirliyi məsələ ilə bağlı Rusiyanın İtaliyadakı səfiri Sergey Rasovun nazirliyə dəvət olunduğunu açıqlayıb. Səfirliyin açıqlamasında isə bu hadisə barədə əlavə şərh verməkdən imtina edilib, iki ölkə arasındakı münasibətlərə xələl gəlməyəcəyinə ümid ifadə olunub.</p><p>Qeyd edilməlidir ki, bu hadisə Avropa ölkələrinin Rusiyaya qarşı iddia etdikləri casus qalmaqalları içərisində ən son hadisədir. Bundan öncə isə Bolqarıstan altı vətəndaşına qarşı casusluqla bağlı ittiham irəli sürmüşdü. Ötən ilə isə Niderland Krallığı iki rus diplomatını casusluq ehtimalı ilə ölkədən çıxarmışdı.</p><p><em><strong>Elgün Niftəli</strong></em></p><p><em><strong><a href="https://azertag.az" target="_blank" class="azertac-link">AZƏRTAC</a>-ın xüsusi müxbiri</strong></em></p><p><em><strong>Roma</strong></em></p>
<p>Azərbaycan Premyer Liqasının XXIII turunun "Səbail"lə səfər matçının 26-cı dəqiqəsində ciddi zədə alan "Qarabağ"ın qapıçısı Şahruddin Məhəmmədəliyev dərhal xəstəxanaya aparılıb.</p><p><a href="https://azertag.az" target="_blank" class="azertac-link">AZƏRTAC</a> klubun rəsmi saytına istinadən xəbər verir ki, burun, üz və kəllə nahiyəsindən xəsarət alan 27 yaşlı qolkiperə 25 tikiş qoyulub.</p><p>İlkin müayinədən sonra Məhəmmədəliyevin ən azı 2-3 həftə yaşıl meydanlardan kənarda qalacağı dəqiqləşib.</p><p>Qeyd edək ki, "Səbail" - "Qarabağ" oyunu 1:1 hesabı ilə başa çatıb.</p><p> </p>
<p>Alimlər zəncəfil və sarımsaqdan istifadənin insanı qocaldan soyuqdəymə prosesinin qarşısının alınmasında müsbət təsirini təsdiqləyirlər. </p><p><a href="https://azertag.az" target="_blank" class="azertac-link">AZƏRTAC</a> “MedikForum” saytına istinadla xəbər verir ki, araşdırmalara görə, yaşlaşma insan bədəninin fizioloji funksiyalarının pisləşməsi ilə xarakterizə olunur və bəzi xəstəliklərlə: ürək-damar, nevroloji, xərçəng, maddələr mübadiləsinin pozulması ilə əlaqələndirilir. Oksidləşdirici stress və iltihab yaşlaşmanın inkişafına kömək edir. Aparılan tədqiqatlara istinad edən “Express” nəşriyyatı zəncəfil və sarımsaqdan istifadənin bu proseslərə müqavimətini artırdığını bildirir. </p><p>Sarımsaq. Tokioda Yakut şirkətinin təşkil etdiyi qocalma problemlərinə həsr olunmuş tədqiqat konfransında təqdim edilən nəticələrə görə, sarımsaqdan istifadənin bağırsaqların fəaliyyətini yaxşlaşdırması ömrün uzanmasına müsbət təsir göstərir. Alimlər ədviyyəli tərəvəzin bağırsaq üçün faydasını sarımsağın tərkibindəki “yaxşı” bakteriyaları artıran çoxmiqdarlı liflərlə əlaqələndirirlər. Bu mikroorqanizmlər xərçəng, kəmağıllıq, piylənmə və psixi xəstəliklərin yaranmasına təsir göstərə biləcək toksinləri ifraz edən zərərli bağırsaq bakteriyaları ilə mübarizə aparır. </p><p>Zəncəfil. ABŞ-ın Milli Tibb Kitabxanası zəncəfilin ürək-damar sisteminin vəziyyətinin göstəricilərini yaxşılaşdırmaq qabiliyyətini təsdiq edən məlumatları dərc edib: onun sayəsində triqliseridlərin və Aşağı Sıxlıqlı Lipoproteinlərdəki (ASL) “pis” xolesterinin səviyyəsi azalır.</p><p>“Express” həmçinin xəbər verir ki, zəncəfil neyrodegenerativ və metabolik pozulmalarla (şəkərli diabet, piylənmə) əlaqəli xəstəliklər də daxil olmaqla bəzi patoloji prosesləri boğmağa və tənzimləməyə qadirdir.</p><p>Zəncəfil və sarımsaq. “Sift Deck Research Page” dərc olunan tədqiqatın nəticələri antioksidan və iltihab əleyhinə təsirlərin sürətli qocalmadan qoruduğunu təsdiqləyir. </p><p>“Əvvəlki işlər, sarımsaqdan istifadənin orqanizmdə oksidləşdirici stressi azaldan qlutation kimi daxili antioksidanların səviyyəsini artırdığığını göstərir. Öz növbəsində zəncəfil də iltihab əleyhinə təsir göstərir, və bu xüsusiyyətlər qocalma prosesini ləngidir”, - deyə elmi ekspertlər vurğulayır.</p><p>Alimlər zəncəfil və sarımsağın ömrün uzanmasına təsirini çoxsaylı bioloji aktiv birləşmənin tərkibi ilə izah edirlər.</p>
<p>Türkdilli ölkələrin dövlət müstəqilliyinin bərpasının otuzuncu ildönümü şərəfinə Türkiyənin Hatay şəhərində rəsm sərgisi açılıb.</p><p><a href="https://azertag.az" target="_blank" class="azertac-link">AZƏRTAC</a> xəbər verir ki, bu münasibətlə Azərbaycan, Qazaxıstan, Özbəkistan, Qırğızıstan və Türkmənistanın Türkiyədəki səfirləri, eləcə də Beynəlxalq Türk Mədəniyyəti Təşkilatının (TÜRKSOY) rəhbər şəxsləri açılış mərasimində iştirak ediblər.</p><p>Qonaqları və iştirakçıları səmimiyyətlə salamlayan vali Rahmi Doğan və Hatay böyükşəhər bələdiyyəsinin sədri Lütfü Savaş türkdilli ölkələrin səfirlərinin və TÜRKSOY-un Baş katibinin bu bölgəni birgə ziyarət etməsini birlik və qardaşlıq rəmzi kimi dəyərləndiriblər.</p><p>Ötən otuz ildə türkdilli ölkələrin birliyi və inteqrasiyası istiqamətində görülən işləri yüksək dəyərləndirən baş katibi Düsen Kaseinov əminliklə bildirib ki, TÜRKSOY-un ortaq mədəniyyət layihələri tarixi bağlarımızı daha da möhkəmləndirəcək. </p><p>Hataya növbəti səfərinin Azərbaycanın 44 günlük Vətən savaşının qələbəsi əsasında zəfər müjdəli olduğunu xatırladan ölkəmizin Türkiyədəki səfiri Xəzər İbrahim “Bir millət, iki dövlət!” ifadəsinin mövcud dostluq, qardaşlıq və həmrəylik münasibətləri ilə həyat gerçəyinə çevrilməsindən məmnunluğunu ifadə edib.</p><p><em><strong>Sabir Şahtaxtı</strong></em></p><p><em><strong><a href="https://azertag.az" target="_blank" class="azertac-link">AZƏRTAC</a>-ın xüsusi müxbiri</strong></em></p><p><em><strong>Ankara</strong></em></p>
<p>Çox vaxt Avroməhkəmə adlandırılan Avropa Məhkəməsi bundan əvvəl Macarıstanda reklama təyin etdiyi mütərəqqi vergi qərarı ilə bağlı Avropa Komissiyası tərəfindən edilən şikayəti rədd edib. </p><p><a href="https://azertag.az" target="_blank" class="azertac-link">AZƏRTAC</a>-ın verdiyi xəbərə görə, Avropa Məhkəməsi hesab edir ki, Avropa İttifaqında vergi qanunvericiliyinin modernləşdirildiyi indiki şəraitdə Aİ-yə üzv dövlətlər ölkələrində özlərinə uyğun hesab etdikləri, amma ayrı-seçki elementləri olmayan vergi sistemi tətbiq etmək hüququna malikdirlər.</p><p>Hazırda Macarıstanda reklam vergisi şirkətlərin gəlirindən asılıdır. İki il əvvəl Avropa Məhkəməsi Avropa Komissiyasının Macarıstanda verginin “dövlət yardımı” olması və bunun, guya Avropa reklam bazarının qaydaları ilə “uyğunlaşmaması” barədə qərarını əsassız hesab edib.</p><p><em><strong>Pərvanə Qarayeva</strong></em></p><p><em><strong><a href="https://azertag.az" target="_blank" class="azertac-link">AZƏRTAC</a>-ın xüsusi müxbiri</strong></em></p><p><em><strong>Budapeşt </strong></em></p>
<p>Azərbaycan Respublikasının Mədəniyyət Nazirliyi və Azərbaycan Dövlət Rəsm Qalereyasının təşkilatçılığı ilə “Digitalart-lab” layihəsi çərçivəsində <a target="_blank" href="https://busy.az/professions/qrafik-dizayner">qrafik dizayner</a> və illüstrator Mahir Qafarovun "Rəqəmsal karikatura sənəti" mövzusunda ustad dərsi baş tutacaq. </p><p><a href="https://azertag.az" target="_blank" class="azertac-link">AZƏRTAC</a> xəbər verir ki, ustad dərsi rəqəmsal karikatura sənətinin inkişaf tendensiyaları, bu sahədə istifadə edilən müasir alətlər və metodların tətbiqini göstərmək, həmçinin bu istiqamətdə çalışan rəssamların yaradıcılığını dəstəkləmək məqsədilə keçiriləcək.</p><p>Ölkənin mədəni həyatında özünəməxsus yeri olan, milli ənənələrə söykənən Azərbaycan karikatura sənətinin müasir inkişafı yeni tendenisyalardan da yan keçmir. Belə ki, digital incəsənətin bir növü olan rəqəmsal karikatura sənəti rəssam və dizaynerlərin yaradıcılığında yeni yanaşmaların təsiri ilə inkişaf edir. </p><p>Ustad dərsinin bu gün “Zoom” proqramı vasitəsilə “Digitalart-lab” layihəsi iştirakçıları üçün nəzərdə tutulan proqrama əsasən keçirilməsi nəzərdə tutulur. Dərsi Azərbaycan Dövlət Rəsm Qalereyasının rəsmi saytı və sosial media hesablarından yayımlanacaq videomaterialdan izləmək mümkün olacaq. </p>
<p>Yaponiyanın Azərbaycandakı səfirliyi 2022-ci ildə Yaponiya ilə Azərbaycan arasında diplomatik münasibətlərin əsasının qoyulmasının 30-cu ildönümü münasibətilə silsilə tədbirlər keçirməyi planlaşdırır. Səfirlik “2022-ci il Yaponiya-Azərbaycan Dostluq İli”nin planlaşdırılmasında artıq ilkin addımları ataraq, həmin ili təcəssüm etdirəcək sloqan və loqo yarışmasını həyata keçirib.</p><p><a href="https://azertag.az" target="_blank" class="azertac-link">AZƏRTAC</a> xəbər verir ki, “Dostluq İli”nin əsas atributları olacaq sloqan və loqo təsdiqlənib və bu münasibətlə qaliblər təltif edilib.</p><p> Sloqan müsabiqəsinin qalibi Ramazan Ağayev və loqo müsabiqəsinin qalibi Tofiq Sarıyevə Yaponiyanın Azərbaycandakı səfiri Vada Cüniçi tərəfindən sertifikat təqdim olunub.</p><p>Görüş zamanı səfir hər iki qalibi təbrik edib və “Dostluq İli” layihəsinə əvəzsiz töhfələri üçün minnətdarlığını bildirib. Vada Cüniçi hər iki qalibdən bundan sonra da ikitərəfli münasibətlərin daha da inkişafı üçün “Dostluq İli” ilə bağlı tədbirlərin təbliğ olunması və tədbirlərdə aktiv iştiraklarını gözlədiyini bildirib.</p><p> Qeyd edək ki, seçilmiş sloqan və loqo bu ildən başlayaraq 2022-ci ilin sonunadək iki ölkə arasında həyata keçiriləcək müxtəlif mədəniyyət tədbirləri və ya təbliğat materiallarında istifadə olunacaq. </p>
<p> Yazıda Xocalı soyqırımının XX əsrin ən dəhşətli faciələrindən biri olduğu bildirilir, erməni cəlladları və onların havadarları olan keçmiş sovet ordusunun 366-cı motoatıcı alayı tərəfindən törədilən vəhşiliklər, meyitlərin təhqir edilməsi, əsirlərimizə amansız işgəncələr verilməsi barədə danışılır. </p><p> Məqalədə bildirilir ki, bu soyqırımı ХХ əsrin Xolokost, Xatın, Lidisa, Oradur və Sonqmi kimi qanlı faciələri ilə müqayisə oluna bilər. Bu faciə təsadüfi hadisə deyil. Ermənilər aylarla bu soyqırımına hazırlaşıblar. Bu faciəni törətməklə ermənilər Azərbaycan xalqını qorxutmaq məqsədi güdüblər, işğal olunan tarixi ərazilərimizin itirilməsi ilə xalqın barışmağını istəyiblər. Ancaq ermənilər bunu edə bilmədilər, Azərbaycan xalqı bu müddətdə daha da gücləndi və 44 gün ərzində torpaqlarını işğaldan azad etdi. </p><p> Məqalədə Qarabağ münaqişəsinin tarixi, ermənilərin “Dənizdən dənizə” xülyaları, digər qonşu dövlətlərə torpaq iddiaları haqqında da məlumat verilir. </p><p><em><strong>Qulu Kəngərli</strong></em></p><p><em><strong><a href="https://azertag.az" target="_blank" class="azertac-link">AZƏRTAC</a>-ın xüsusi müxbiri</strong></em></p><p><em><strong>Daşkənd</strong></em></p>
<p>Milli Hidrometeorologiya Xidmətinin məlumatına görə, Bakıda və Abşeron yarımadasında fevralın 23-ü axşamdan 25-i səhərədək havanın arabir yağıntılı olacağı, sulu qar, qar yağacağı gözlənilir.</p><p>Xidmətdən <a href="https://azertag.az" target="_blank" class="azertac-link">AZƏRTAC</a>-a bildiriblər ki, şimal-qərb küləyi əsəcək, sürəti saniyədə 15-20, arabir 23-28 metr olacaq, fevralın 24-də yarımadanın bəzi yerlərində arabir 30 metrədək güclənəcək. </p><p>Fevralın 24-25-də havanın temperaturunun ötən günlərlə müqayisədə tədricən 5-8° enəcəyi, 0-3° şaxta olacağı gözlənilir.</p><p>Azərbaycanın rayonlarında fevralın 23-ü axşam şimal və şərq rayonlarından başlayaraq 25-i səhərədək ölkə ərazisində hava şəraitinin arabir yağıntılı olacağı, sulu qar, qar yağacağı proqnozlaşdırılır. Əsasən dağlıq və dağətəyi rayonlarda intensiv və güclü olacağı ehtimalı var. Qərb küləyi əsəcək, arabir 18-23 metr/saniyə olacaq, ayrı-ayrı yerlərdə arabir 28-32 metr/saniyəyədək güclənəcək. Havanın temperaturu ötən günlərlə müqayisədə tədricən 5-8° enəcək. Yolların buz bağlayacağı ehtimal olunur.</p>
<p>Son sutka ərzində dünyada koronavirusa yoluxanların sayı 384 mindən çox artıb.</p><p><a href="https://azertag.az" target="_blank" class="azertac-link">AZƏRTAC</a> TASS informasiya agentliyinə istinadla xəbər verir ki, bu barədə Ümumdünya Səhiyyə Təşkilatı məlumat yayıb.</p><p>Məlumata əsasən, ötən sutka ərzində 384 min 956 nəfər yeni koronavirusa yoluxub, 8 min 230 nəfər isə dünyasını dəyişib. Yoluxanların ümumi sayı 113 milyon 467 min 303, ölənlərin isə 2 milyon 520 min 550 nəfərə çatıb.</p><p>Qeyd edək ki, Ümumdünya Səhiyyə Təşkilatının hesabatı yalnız rəsmi göstəricilər əsasında hazırlanır.</p>
<p>İnkişaf və sabitlik məkanı olan Azərbaycan, eyni zamanda, bütün hüquq və azadlıqların təmin edildiyi demokratik ölkədir. Ölkəmizdə insan hüquqları və azadlıqları yüksək səviyyədə qorunur. Həmçinin Azərbaycan dövləti öz vətəndaşlarına qayğıkeş və humanist münasibət göstərir. Azadlıqdan məhrumetmə və azadlığın məhdudlaşdırılması cəzasına məhkum edilmiş şəxslərin əfv edilməsi ilə bağlı dövlət başçısı tərəfindən vaxtaşırı olaraq əfv sərəncamlarının imzalanması, eləcə də amnistiya aktlarının qəbul olunması da bu baxımdan xüsusi vurğulanmalıdır. </p><p><a href="https://azertag.az" target="_blank" class="azertac-link">AZƏRTAC</a> xəbər verir ki, bu fikirlər Milli Məclisin regional məsələlər komitəsinin sədri Siyavuş Novruzovun açıqlamasında yer alıb.</p><p style="text-align:;" center;"><strong>Bu müsbət ənənənin əsası ümummilli lider Heydər Əliyev tərəfindən qoyulub</strong></p><p>Bu müsbət ənənənin əsası Azərbaycan xalqının ümummilli lideri Heydər Əliyev tərəfindən qoyulub. Ulu Öndər 1993-cü ildə xalqın təkidli tələbi ilə ikinci dəfə siyasi hakimiyyətə gəldikdən sonra insan hüquqlarının təmin olunması istiqamətində mühüm addımlar atılıb, ölüm hökmünə moratorium qoyulub. O dövrdən etibarən Azərbaycanda heç kimə ölüm hökmü tətbiq olunmayıb və sonradan bu cəza növü ləğv edilib. Bununla yanaşı, Ümummilli Liderin ölkəmizə rəhbərliyi dövründə çoxsaylı əfv sərəncamları imzalanıb, amnistiya aktları qəbul edilib.</p><p>Vacib bir məqama xüsusi diqqət yetirmək lazımdır. Belə ki, Azərbaycanın müstəqilliyini bərpa etdiyi 1991-ci il oktyabrın 18-dən ümummilli lider Heydər Əliyevin hakimiyyətə gəldiyi dövrə qədər ölkəmizdə amnistiya və ya əfv haqqında hər hansı bir qərar və sərəncam olmayıb. Müstəqil respublikamızda 1996-cı ildən başlayaraq əfv sərəncamları imzalanıb, amnistiya haqqında qərarlar qəbul olunub.</p><p style="text-align:;" center;"><strong>Azərbaycan Prezidenti öz siyasətində humanizm prinsipini rəhbər tutur</strong></p><p>Xalqımızın Ümummilli Liderinin əsasını qoyduğu bu siyasət Prezident İlham Əliyev tərəfindən uğurla davam etdirilir. Ötən müddət ərzində Prezident İlham Əliyevin imzaladığı əfv sərəncamlarının və fərmanlarının icrası nəticəsində minlərlə məhkum azadlığa qovuşub və ya cəzaları qanunvericiliyə uyğun olaraq azaldılıb. Bu, dövlət başçısının öz siyasətində daim humanizm prinsipini rəhbər tutduğunu göstərən mühüm faktlardandır. Sonuncu Amnistiya Aktı isə Azərbaycan Respublikasının Birinci vitse-prezidenti Mehriban xanım Əliyevanın təşəbbüsü ilə həyata keçirilib, 10 mindən artıq insana şamil olunub. </p><p>Yeri gəlmişkən, martın 18-də Azərbaycan Respublikasının Prezidenti İlham Əliyevin “Məhkum edilmiş bir sıra şəxslərin əfv olunması haqqında” Sərəncam imzalaması vətəndaşlara verilən dəyərin, dövlətin humanist siyasətinin daha bir bariz nümunəsidir. Sərəncamda məhkum olunmuş bir sıra şəxslərin, onların ailə üzvlərinin, insan hüquqlarının müdafiəsi təşkilatlarının Azərbaycan Respublikasının Prezidentinə ünvanlanmış əfv haqqında müraciətlərinə baxaraq, məhkumların şəxsiyyətini, səhhətini, ailə vəziyyətini, törətdikləri cinayətlərin xarakterini və ictimai təhlükəlilik dərəcəsini, cəza çəkdikləri müddəti və həmin müddətdə davranışlarını nəzərə alaraq, humanizm prinsiplərinə əsaslandığı qeyd edilib. Sərəncama əsasən əfv olunanların əhatə dairəsi kifayət qədər genişdir. Belə ki, azadlıqdan məhrum etmə cəzasına məhkum olunmuş 475 nəfər cəzasının çəkilməmiş hissəsindən azad edilib. Bundan başqa, azadlıqdan məhrum etmə cəzasına məhkum edilmiş 98 nəfərin cəzasının çəkilməmiş hissəsi yarıyadək azaldılıb. Ömürlük azadlıqdan məhrum etmə cəzasına məhkum edilmiş üç nəfərin cəzası 25 il müddətə azadlıqdan məhrum etmə cəzası ilə əvəzlənib. Eləcə də azadlıqdan məhrumetmə cəzasına şərti olaraq məhkum edilmiş iki nəfər cəzadan azad ediliblər. Həmçinin azadlıqdan məhrum etmə cəzasına məhkum edilmiş və cəzasının çəkilməsi təxirə salınmış üç nəfər cəzadan azad olunublar. Azadlığın məhdudlaşdırılması cəzasına məhkum edilmiş 9 nəfər və islah işləri cəzasına məhkum olunmuş 12 nəfər cəzanın çəkilməmiş hissəsindən, cərimə cəzasına məhkum olunan 23 nəfər isə cəzadan azad ediliblər. Beləliklə, bütün bunlar Əfv Sərəncamının müxtəlif kateqoriyadan olan məhkumların dövlətin humanist münasibəti ilə əhatə olunduğunu göstərir.</p><p>Nəticədə dövlətimizin başçısının sözügedən Sərəncamı böyük sosial əhəmiyyətə malikdir. Təsadüfi deyil ki, bu addım Azərbaycan ictimaiyyətinin nümayəndələri tərəfindən çox yüksək qiymətləndirilir. Həmçinin ayrıca qeyd edilməlidir ki, əfv olunanlar dövlətin onlara inam və etibarını üzərlərində hiss edirlər ki, bu da onlara layiqli vətəndaş olmaq üçün stimul verir. </p>
