<p>ABŞ-ın sabiq dövlət katibi Kolin Pauell bu gün 84 yaşında vəfat edib. Ailəsi onun yeni növ koronavirusdan (COVID-19) dünyasını dəyişdiyini bildirib.</p> <p> </p> <p>Kolin Lüter Pauell 1937-ci ildə Nyu-Yorkun Harlem şəhərində yamaykalı mühacir cütlüyün ailəsində anadan olub. Vyetnamda döyüşən dörd ulduzlu general 1990-cı illərdə Küveytin işğalından sonra İraqa qarşı Birinci Körfəz Müharibəsində mühüm rol oynayıb və Baş Qərargah rəisi vəzifəsinə qədər yüksəlib.</p> <p> </p> <p>Ordudan təqaüdə çıxdıqdan sonra Respublikaçılar Partiyasında siyasətə girən Pauell Corc Buşun administrasiyasında dövlət katibi vəzifəsini tutub. ABŞ-ın 65-ci dövlət katibi olan Kolin Pauell eyni zamanda bu vəzifəyə təyin olunan ilk afroamerikalı şəxs idi.</p> <p> </p> <p>O, ABŞ-da bir neçə idarənin hərbi müşaviri olaraq çalışıb və 2003-cü ildə Birləşmiş Millətlər Təşkilatının (BMT) Təhlükəsizlik Şurasındakı çıxışı ilə ictimaiyyəti İraqın kütləvi qırğın silahlarına sahib olduğuna inandırmaqda əhəmiyyətli rol oynayıb.</p> <p> </p> <p>Kolin Pauell Nyu Yorkda Şəhər Kollecində geologiya təhsili alarkən gələcək potensial hərbi liderləri müəyyənləşdirmək üçün nəzərdə tutulan Ehtiyat Zabit Təlim Korpusu (ROTC) adlı kadr akademiyasına daxil olub. O, 1958-ci ildə məzun olduqdan sonra ABŞ Ordusunda leytenant kimi xidmətə başlayıb.</p> <p> </p> <p>Sabiq dövlət katibi 1962-ci ildə Prezident Kennedinin Cənubi Vyetnam ordusuna məsləhət vermək üçün göndərdiyi minlərlə zabitdən biri idi. O, Vyetnamda partizanlar tərəfindən qurulan tələyə düşərək yaralanmışdı. Pauell 1968-ci ildə Vyetnamdan qayıdanda qəzaya uğrayan helikoptrdən sağ çıxaraq yanan dağıntılar altından daha üç əsgəri xilas etdiyi üçün şücaət medalı ilə təltif edilib.</p> <p> </p> <p>Vyetnamdan qayıtdıqdan sonra Pouell Vaşinqtonda Corctaun Universitetində magistr təhsili alıb. Bir müddət Cənubi Koreyada general-leytenant rütbəsi altında xidmət etdikdən sonra qərargah zabiti olaraq ABŞ Müdafiə Nazirliyinə (Pentaqon) qayıdıb. Müxtəlif prezidentlərin dövründə Pentaqonda bir çox vəzifə tutub və 1987-ci ildə Milli Təhlükəsizlik Müşaviri olub.</p> <p> </p> <p>Corc Buş 1989-cu ildə prezident seçiləndə Pauelli ölkənin Baş Qərargah rəisi təyin edib. O, 52 yaşında bu vəzifəni tutan ən gənc zabit və ilk afroamerikalı idi.</p> <p> </p> <p>Pauell ilk böhranla 1989-cu ilin dekabrında ABŞ-ın Panamaya müdaxilə edərək diktator General Norieqanı devirdiyi zaman üzləşib. Bu müdaxilə Birləşmiş Millətlər Təşkilatı tərəfindən şiddətlə qınanılıb.</p> <p> </p> <p>1990-cı ildə ilk Körfəz Müharibəsində Pauell Doktrinası adlı strategiya həyata keçirildi. Pauell hesab edirdi ki, Birləşmiş Ştatlar yalnız bütün diplomatik, siyasi və iqtisadi yollar uğursuz olduqdan sonra İraqa qarşı hərbi güc tətbiq etməlidir. Ancaq hərbi əməliyyatlar başlayanda düşməni tez bir zamanda məğlub etmək və itkiləri minimuma endirmək üçün maksimum güc istifadə ediləcəkdi. O, geniş ictimai dəstək almağı da vacib hesab edirdi.</p> <p> </p> <p>Pauell əvvəlcə Körfəzdəki hərbi əməliyyatlara etiraz edirdi. Lakin sonradan “Səhrada Tufan” və digər əməliyyatlar ABŞ hədəfləri baxımından uğurlu oldu və Pauellin adı bu savaşlar vasitəsilə beynəlxalq aləmdə tanındı.</p> <p> </p> <p>O, ölkənin yeni prezident Bill Klintonla eynicinslilərin orduya girməsinə icazə verilməsi mövzusunda mübahisə edirdi və o zaman ABŞ-ın BMT-dəki rəsmi nümayəndəsi olan Madeleyn Olbraytla Bosniyaya hərbi müdaxilə səbəbiylə açıq şəkildə qarşıdurma yaşadı. Pauell ABŞ-ın yalnız öz maraqlarına təhlükə olduğu təqdirdə hərbi güc tətbiq etməli olduğuna inanırdı.</p> <p> </p> <p>Pauell 1993-cü ildə ordudan təqaüdə çıxdı və xeyriyyə təşkilatlarında çalışmağa başladı. Daha sonra siyasətlə də maraqlanırdı. ABŞ-ın hər iki partiyasına simpatiyası vardı və 1996-cı il seçkilərindən əvvəl həm Demokratlar, həm də Respublikaçıların vitse-prezidentl postuna namizədlər arasında adı çəkilirdi. Hətta Bill Klintona qarşı prezidentliyə namizəd ola biləcəyi barədə söhbətlər də vardı, amma Pauell siyasətdə yüksəlmək ambisiyasına malik olmadığına qərar vermişdi.</p> <p> </p> <p>2000-ci ildə Corc Buş onu dövlət katibi təyin etdi. 11 Sentyabr hücumlarından sonra Paull öz doktrinasına sadiq idi və ABŞ-ın İraqa girməsini istəmirdi, lakin daha sonra Buşa dəstək verməyi qəbul etdi.</p> <p> </p> <p>Bir çox müşahidəçi onun BMT Təhlükəsizlik Şurasının 2003-cü ildə İraqla müharibəyə getməsində vacib rol oynadığını düşünür. 18 ay sonra, Səddam Hüseyn devriləndə Pauell İraq liderinin “kütləvi qırğın silahlarına sahib olduğu” barədə kəşfiyyat məlumatlarının demək olar ki, yalan olduğunu etiraf edib.</p> <p> </p> <p><strong>Akif İsmayılov</strong></p>
<p>İranın Rusiyaya səfər edən Baş Qərargah rəisi Məhəmməd Baqeri Moskva ilə qırıcı və helikopter alınması barədə danışıqlar aparır.</p> <p> </p> <p><strong>Modern.az </strong>xəbər verir ki, bu barədə Baqrei “Fars” agentliyinə açıqlamasında məlumat verib.</p> <p> </p> <p>O qeyd edib ki, hava vasitələrinin alınması barədə müqavilələr BMT-nin İrana tətbiq etdiyi silah embarqosunun sona çatmasından sonra imzalanacaq.</p> <p> </p> <p>Baqeri hansı növ təyyarə və helikopter alınması barədə məlumat verməyib.</p> <p> </p> <p>Akif İsmayılov</p>
<p>“Azərbaycan Xəzər Dəniz Gəmiçiliyi” QSC (ASCO) xarici sularda fəaliyyətinin genişləndirilməsi və bir bazardan asılılığın aradan qaldırılmasına yönəlik davamlı tədbirlər həyata keçirir. Bu istiqamətdə işlərin Prezident İlham Əliyevin tapşırığı ilə Gəmiçiliyin Strateji inkişaf planına əsasən gerçəkləşdirilməsi nəzərdə tutulur.</p> <p> </p> <p>Bu barədə <strong>Modern.az-</strong>a ASCO-dan bildirilib.</p> <p> </p> <p>Məlumata deyilir ki, ASCO artıq 7 ildir, fasiləsiz olaraq Xəzərdən kənar beynəlxalq sularda da gəmilərin istismarı ilə məşğuldur. Məhz, 2014-cü ildə ilk dəfə “Natəvan” və “Üzeyir Hacıbəyli” quru yük gəmilərinin istifadəyə verilməsi ilə xarici sularda fəaliyyət bərpa olunub, sonrakı illərdə bu gəmilərin sıraları genişləndirilib. Hazırda Qara və Aralıq dənizi hövzələrində ASCO-ya məxsus həm quru yük, həm də tanker gəmiləri yükdaşımalar həyata keçirirlər.</p> <p> </p> <p>ASCO-nun Xəzərdən kənarda fəaliyyətinin genişləndirilməsi məqsədilə beynəlxalq bazarlar mütəmadi öyrənilir və potensial fəaliyyət istiqamətləri qiymətləndirilir. Bu çərçivədə 2020-ci ildə beynəlxalq aparıcı məsləhətçi şirkət “McKinsey” ilə birgə ASCO-nun 2030-cu ilə qədər dövrü əhatə edən Xəzərdən kənar hövzələrdə fəaliyyətin genişləndirilməsi strategiyası hazırlanıb.</p> <p> </p> <p>Strategiyaya əsasən, ASCO Qara və Aralıq dənizi hövzələrindən əlavə, Baltik və Şimal dənizlərində də yükdaşıma fəaliyyəti göstərməyə hazırlaşır. Bu məqsədlə həmin bazarlar, orada yükdaşımalara cəlb edilməsi mümkün olan gəmi tipləri, sözügedən hövzələrdə fəaliyyət göstərmək üçün gəmilərə qoyulan tələblər və digər mühüm aspektlər ətraflı təhlil olunub.</p> <p> </p> <p>Bu bazarlara daxil olmaq üçün həmin hövzələrdə təsnifat cəmiyyətləri, gəmilərin daxil olacağı limanlar və digər aidiyyatı tənzimləyici qurumların sərt tələbləri, o cümlədən bayraq tələbləri mövcuddur. Hazırda ASCO tərəfindən bu istiqamətdə işlər davam etdirilir və bir bazardan asılılığın azaldılması siyasətinə uyğun bir neçə gəminin həmin hövzələrə çıxarılması planlaşdırılır. Həmin bazarlarda ASCO-nun rəqabət qabiliyyətinin təmin edilməsi, əməliyyat xərclərinin optimallaşdırılması, yarana biləcək hər hansı məhdudiyyətlərin aradan qaldırılması məqsədilə tələblərə, o cümlədən bayraq tələblərinə uyğun hazırlıq işləri aparılır. Gəmilərin istismarı zamanı üstünlük şərtlərindən asılı olaraq, bu gəmilər Avropa (Portuqaliya, Malta və s.) və ya beynəlxalq gəmiçilik təcrübəsinə əsasən gəmi qeydiyyatı üçün cəlbedici şərait yaradılan digər zonalarda istismara veriləcək.</p> <p> </p> <p>Xəzərdən kənar hövzələrdə fəaliyyətin genişləndirilməsi və bununla da, yerli gəmiçilik xidmətlərinin ixracı ilə ölkəyə kənardan daxilolmalara töhfə verilməsi ASCO-nun əsas hədəflərindən biridir.</p>
<p>Cenevrədəki “Sotheby's” hərrac evi Oktyabr inqilabı ərəfəsində Rusiyadan gizli şəkildə çıxarılan Romanovlar ailəsinin yaşadığı evin zinət əşyalarını satışa çıxaracaq.</p> <p> </p> <p><strong>Modern.az </strong>xəbər verir ki, bu barədə bu barədə hərrac evinin mətbuat xidməti məlumat yayıb.</p> <p> </p> <p>Hərracda 300-500 min ABŞ dolları dəyərində olan sapfir və brilyantdan ibarət bir dəst broş və bir cüt sırğa satılacaq.</p> <p> </p> <p>Broş və sırğaların İmperator II Nikolayın xalası Mariya Pavlovnaya aid olduğu bildirilir. Hərrac noyabrın 10-da keçiriləcək.</p> <p> </p> <p><strong>Akif İsmayılov</strong></p>
<p>Ankarada Gürcüstan, Azərbaycan və Türkiyə parlamentlərinin xarici əlaqələr komitələri rəhbərlərinin IX üçtərəfli görüşü keçirilib.</p> <p> </p> <p><strong>Modern.az </strong>xəbər verir ki, bu barədə Gürcüstan parlamentinin mətbuat xidməti məlumat yayıb.</p> <p> </p> <p>Toplantıda əsas müzakirə mövzuları regional əməkdaşlığıq, Qara dəniz bölgəsində mövcud problemlər və onların həlli yolları, parlamentlərarası əlaqələrin gücləndirilməsi və üçtərəfli əməkdaşlığı möhkəmləndirəcək yeni təşəbübslər olub.</p> <p> </p> <p>İclas çərçivəsində Gürcüstan parlamentinin üzvləri Türkiyə Böyük Millət Məclisində Dostluq Qrupunun üzvləri ilə görüş keçiriblər. Tərəflər Gürcüstanın işğal altında olan ərazilərində vəziyyət, iqtisadi əlaqələrin dərinləşdirilməsi imkanları və Türkiyənin Gürcüstanı NATO-ya inteqrasiya yolunda dəstəkləməsi məsələləri nəzərdən keçirilib.</p>
<p>Bu gün futzal üzrə Avropa çempionatının final mərhələsinin püşkü atılıb.</p> <p> </p> <p><strong>Modern.az</strong> xəbər verir ki, Niderlandın Zeist şəhərində təşkil olunan püşkatma mərasimində Azərbaycan millisinin rəqibləri müəyyənləşib.</p> <p> </p> <p>Joze Alesionun baş məşqçi olduğu kollektiv İspaniya, Gürcüstan və Bosniya və Herseqovina yığmaları ilə birlikdə D qrupunda mübarizə aparacaq.</p> <p> </p> <p>Qeyd edək ki, 19 yanvar - 6 fevralda Niderlandda keçiriləcək Avropa çempionatı ilk dəfə 16 komandanın iştirakı ilə baş tutacaq.</p>
<p>Daha 1245 nəfər koronavirusa yoluxub, 13 nəfər vəfat edib</p> <p> </p> <p>Azərbaycan Respublikasında koronavirus infeksiyasına 1 245 yeni yoluxma faktı qeydə alınıb, 409 nəfər müalicə olunaraq sağalıb.</p> <p> </p> <p>Nazirlər Kabineti yanında Operativ Qərargahdan <strong>Modern.az</strong>-a verilən məlumata görə, COVID-19 üçün götürülən analiz nümunələri müsbət çıxmış 13 nəfər vəfat edib.</p>
<p>Azərbaycanda son sutkada koronavirus əleyhinə 591 vaksin vurulub.</p> <p> </p> <p>Nazirlər Kabineti yanında Operativ Qərargahdan <strong>Modern.az</strong>-a verilən məlumata görə, bir gündə birinci mərhələ üzrə vaksinasiya olunanların sayı 190, ikinci mərhələ üzrə vaksinasiya olunanların sayı 401 nəfərdir.</p> <p> </p> <p>Ölkədə vurulan vaksinlərin ümumi sayı 9 195 023, birinci mərhələ üzrə vaksinasiya olunanların ümumi sayı 4 964 341, ikinci mərhələ üzrə vaksinasiya olunanların sayı isə 4 230 682 təşkil edir.</p> <p> </p> <p> </p> <p> </p>
<p>Azərbaycanın xarici işlər naziri Ceyhun Bayramov Beynəlxalq Qırmızı Xaç Komitəsinin (BQXK) vitse-prezidenti Qil Karbonyenin rəhbərlik etdiyi nümayəndə heyətini qəbul edib.</p> <p> </p> <p>XİN-dən <strong>Modern.az-</strong>a verilən məlumata görə, görüşdə C.Bayramov ölkəmizin BQXK ilə faydalı əməkdaşlığı yüksək qiymətləndirdiyini qeyd edib. Son bir il ərzində qarşı tərəflə bir sıra görüşlərin, o cümlədən BQXK-nın Cenevrə ofisində, habelə beynəlxalq platformalar çərçivəsində keçirilmiş görüşlərin bunun bariz nümunəsi olduğunu bildirib. Ölkəmizin BQXK-nın beynəlxalq hüquqa və müvafiq BMT qətnaməsinə uyğun olaraq Azərbaycan ərazisindəki humanitar missiyasının həyata keçirilməsinə hər zaman dəstək verdiyi vurğulanıb və bu xüsusda, qarşı tərəflə dialoqun davam etdirilməsinin əhəmiyyəti səsləndirilib.</p> <p> </p> <p>C.Bayramov qarşı tərəfə bölgədə münaqişə sonrası yaranmış yeni reallıqlar və Azərbaycan tərəfindən 10 noyabr 2020-ci il və 11 yanvar 2021-ci il tarixli üçtərəfli bəyanatların icrası ilə əlaqədar həyata keçirilən konkret addımlar barədə ətraflı məlumat verib.</p> <p> </p> <p>BQXK-nın vitse-prezidenti Qil Karbonye Azərbaycan hökuməti tərəfindən təşkilatın fəaliyyətinə göstərilən dəstəyə və əməkdaşlığa görə məmnunluğunu ifadə edib. Bölgədəki yeni reallıqları nəzərə alaraq mövcud humanitar prioritetlər əsasında qarşılıqlı fəaliyyətin davam etdirilməsinin vacibliyi vurğulanıb. Vitse-prezident hazırkı mərhələdə Azərbaycan tərəfi ilə erkən bərpa, sağlamlıq, tibb işçilərinin təlimi, habelə humanitar fəaliyyətə yeni texnologiyaların cəlb edilməsi və s. istiqamətlərdə fəaliyyətin həyata keçirilməsindən bəhs edib. O, həmçinin Yaxın Şərq bölgəsindən Azərbaycan əsilli vətəndaşlarının, xüsusilə qadın və uşaqların ölkəyə qaytarılması istiqamətində Azərbaycan tərəfindən görülən işlərin təqdirəlayiq olduğunu bildirib.</p> <p> </p> <p>C.Bayramov itkin düşmüş azərbaycanlılar barədə məlumatın əldə edilməsinin ölkəmiz üçün əhəmiyyət kəsb etdiyini söyləyib və bu xüsusda BQXK-nın hələ 1-ci Qarabağ müharibəsindən itkin düşmüş şəxslər barədə məlumatın toplanması istiqamətində gördüyü işlərin yüksək qiymətləndirildiyini qeyd edib.</p> <p> </p> <p>Tərəflər həmçinin BQXK-nın bölgədəki humanitar missiyası ətrafında fikir mübadiləsi aparıblar.</p>
<p>Bakı şəhərinin Qaradağ rayonunda mansarda tipli çoxmərtəbəli yaşayış binasının zirzəmisində elektrik lövhəsi, qoruyucu açar, 36 ədəd elektrik açarı, 36 ədəd elektrik sayğacı və şaxta boyunca 1260 p.m elektrik kabeli yanıb.</p> <p> </p> <p><strong>Modern.az </strong>xəbər verir ki, bu barədə Fövqəladə Hallar Nazirliyi (FHN) məlumat yayıb.</p> <p> </p> <p>Yanğın zamanı tüstülənən mənzillərdən 10 nəfər yanğınsöndürənlər tərəfindən təhlükəsiz əraziyə təxliyə olunub. Mənzillər və mansarda yanğından mühafizə olunub. Yanğın yanğından mühafizə bölmələri tərəfindən söndürülüb.</p>
<p>Oktyabrın 18-si saat 17 radələrində Tərtər rayonu Yuxarı Qapanlı kənd sakini 1986-cı il təvəllüdlü Murad Balacayevin öldürülməsi barədə rayon prokurorluğuna məlumat daxil olub.</p> <p> </p> <p>Tərtər Rayon Prokurorluğundan <strong>Modern.az-</strong>a verilən məlumata görə, aparılmış araşdırmalarla zərərçəkmişin həmkəndlisi 1995-ci il təvəllüdlü Ziyadxan Aslanovun aralarında yaranmış mübahisə zamanı Murad Balacayevə odlu silahdan atəş açaraq onu qəsdən öldürməsinə əsaslı şübhələr müəyyən edilib.</p> <p> </p> <p>Faktla bağlı Tərtər rayon prokurorluğunda Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanıb.</p> <p> </p> <p>Ziyadxan Aslanov şübhəli şəxs qismində tutularaq istintaqa cəlb olunub.</p> <p> </p> <p>Hazırda iş üzrə zəruri istintaq tədbirləri davam etdirilir.</p>
