PSJ-nin fransalı mərkəz hücumçusu Randal Kolo Muani qarşıdakı qış transfer pəncərəsində klubu tərk edə biləcəyi ilə bağlı sualı cavabalyıb.
Arena.az “France Info” dərgisinə istinadən, fransalı futbolçunun bu barədə cavabını təqdim edir:
“Xeyr, mən heç vaxt yanvarda PSJ-dən ayrılmağı düşünməmişəm. Mən işləməyə davam etməliyəm, nəyə qadir olduğumu göstərməli və güc-qüvvəmi ortaya tamamilə qoymalıyam ki, Enrike mənə etimad göstərsin”, deyə Kolo Muani bildirib.
Randal Kolo Muani yeniyetməlik illərində “Vilpent”, “Tramble” və “Torsi” klublarında çıxış etdikdən sonra, “Nant”a yol tapıb və “bülbüllər”in heyətində böyük futbolda debüt edib. Ardınca “Bulyon”da icarə əsasında çıxış etmiş Kolo Muani daha sonra Frankfut “Ayntraxt”ının heyətində çıxışı ilə diqqət cəlb edib. PSJ 2023-cü iln sentyabr ayında fransalı futbolçunun 95 milyon avro məbləğ müqavilində “Ayntraxt”dan Paris klubunun düşərgəsinə qatıb. Kolo Muaninin Fransa nəhəngi ilə müqaviləsinin müddəti 2028-ci iliin iyun ayının sonuna qədər qüvvədədir.
Cari mövsümdə Kolo Muani PSJ üçün bütün yarışlarda 12 oyun keçirib, 2 qol vurub.
Kolo Muaninin PSJ-nin heyətində çıxışının ümumi mənzərəsi 52 oyun, 11 qol və 6 məhsuldar ötürmədən ibarətdir.
Kolo Muani 2022-ci ilin sentyabrında debüt etdiyi Fransa yığmasının heyətində 27 oyun keçirib, 8 qol vurub və 4 məhsuldar ötürmə verib.
Kolo Muaninin qənimətlər muzeyində PSJ ilə 2023/2024-cü illər mövsümündə qazandığı Fransa Liqa 1 çempionluğu, Fransa Kuboku və Fransa Super Kuboku var. Kolo Muani həmçinin “Nant”la Fransa Kubokunun (2021/2022) qalibi olub.
Transfermarkt internet-portalı 25 yaşlı fransalı mərkəz hücumçusu Randal Kolo Muaninin transfer dəyərini 40 milyon avro məbləğində qiymətləndirir.
