Kosovo Futbol Federasiyası (FFK) UEFA-dan İdman Arbitraj Məhkəməsinə (CAS) şikayət edəcəyini açıqlayıb.
Publika.az xəbər verir ki, buna səbəb qitənin ali futbol qurumunun Millətlər Liqasının 5-ci turunun Rumıniya ilə səfər oyununda meydanı tərk edən Kosovo millisinə texniki məğlubiyyət verilməsinə dair qərar qəbul etməsidir.
Noyabrın 15-də Buxarestdə baş tutan qarşılaşmanın əlavə vaxtında hesab 0:0 olarkən meydan sahiblərinin azarkeşləri Serbiyaya dəstək şüarları səsləndirib. Bu səbəbdən qonaq komandanın futbolçuları meydanı tərk ediblər. Nəticədə matç yekunlaşmayıb.
Ötən gün isə UEFA Kosovo millisinə 0:3 hesablı texniki məğlubiyyət verildiyini açıqlayıb.
