2024-cü il Cənubiamerikan Kubokunun “Rasinq” (Avelyaneda) – “Kruzeyro” final oyununda qeyri-adi hadisə yaşanıb.
Arena.az məlumat verir ki, “Rasinq”in 3:1 hesabı ilə qalib gəldiyi oyunda Argentina klubunun azarkeşi babasının kəllə sümüyünü özü ilə stadiona gətirərək, bu barədə müsahibə də verib:
“Bu, mənim babam Valentin Agileradır, “Rasinq”in sadiq tərəfdarıdır. “Rasinq” mənim məhəbbətimdir, o da mənim məhəbbətimdir – mənim babam”, – “Daily Mail” nəvənin sözlərini sitat gətirir.
Mətbuatda o da bildirilir ki, hələ 2019-cu ildə, Cənubiamerikan Kubokunun final oyununda həmin azarkeşə oxşayan Qabriel Aranda adlı şəxsin 2018/2019-cu illər mövsümünün Argentina çempionatında “Rasinq”in qələbəsi xatirəsinə Valentin adlı babasının kəllə sümüyünü qazıb çıxarması ilə bağlı xəbərlər yayılmışdı.
Cənubiamerikan Kubokunun finalında “Kruzeyro” üzərində qalibiyyət “Rasinq”ə müvafiq yarışda ilk qəniməti qazandırıb.
