Naxçıvan Muxtar Respublikası Fövqəladə Hallar Nazirliyinin Mülki müdafiə alayı və Xüsusi Riskli Xilasetmə Xidmətinin şəxs heyətinin iştirakı ilə təlim keçirilib.
Nazirliyin mətbuat xidmətindən AZƏRTAC-ın Naxçıvan bürosuna bildirilib ki, təlimin məqsədi xilasedicilərin peşəkarlığının artırılması, axtarış-xilasetmə qayda və üsullarını məşq etdirməkdən ibarət olub.
Plana uyğun olaraq “112” qaynar telefon xəttinə şərti olaraq “zəlzələ baş verməsi, köhnə tikililərin və kommunikasiya xətlərinin dağıntılara və digər fəsadlara məruz qalması barədə” məlumat daxil olub. “Məlumat”la əlaqədar müvafiq xilasetmə qüvvələri dərhal hazırlıq vəziyyətinə gətirilərək “hadisə zonasına yürüşü” təşkil olunub, həyata keçirilən operativ tədbirlər sayəsində “həyati təhlükə ilə üzləşmiş vətəndaşlar” xilas ediliblər. Təlimdə idarəetmə və qarşılıqlı fəaliyyət təşkil olunub, mühəndis kəşfiyyatı aparılıb, obyektlərdə baş verən “yanğınlar” söndürülüb, qəza-xilasetmə və digər təxirəsalınmaz işlər aparılıb, kimyəvi zəhərlənmə ocaqlarında fəaliyyət təmin olunub, zərərçəkənlərə “ilk tibbi yardım” göstərilib və təxliyyəsi həyata keçirilib.
Təlimdə diqqət əməkdaşların baş verən fövqəladə hal zamanı vəziyyətin çevik təhlili, operativ qərarvermə, qəza-xilasetmə qüvvələrinin koordinasiyası və tətbiqi üzrə təcrübələrinin təkmilləşdirilməsinə yönəldilib.
Sonra nəticələr müzakirə edilib, müvafiq tapşırıqlar verilib.
