Zaqreb, 10 dekabr, AZƏRTAC
Azərbaycanın Xorvatiyadakı səfirliyi tərəfindən Zaqreb şəhərində Ulu Öndər Heydər Əliyevin anım günü münasibətilə tədbir keçirilib.
AZƏRTAC xəbər verir ki, tədbirdə Xorvatiyanın sabiq Prezidenti İvo Josipoviç, Xarici və Avropa İşləri Nazirliyinin dövlət katibi Frano Matuşiç, Xorvatiya Parlamentinin üzvləri, dövlət qurumlarının rəsmiləri, Zaqrebdə akkreditə olunmuş diplomatik korpusun rəhbərləri, tanınmış mədəniyyət və incəsənət xadimləri, həmçinin ictimaiyyət və media nümayəndələri iştirak ediblər.
Tədbirdə Ulu Öndərin əziz xatirəsi dərin hörmət və ehtiramla yad edilib.
Azərbaycanın Xorvatiyadakı səfiri Anar İmanov Ulu Öndər Heydər Əliyevin Azərbaycan xalqı qarşısında xidmətlərindən danışaraq, onun dünya şöhrətli siyasi xadim olduğunu, azərbaycançılıq ideologiyasının əsasını qoyduğunu, müdrik siyasəti və uzaqgörənliyi sayəsində müasir və güclü Azərbaycan dövlətinin yaradıldığını tədbir iştirakçılarının diqqətinə çatdırıb. Səfir Ulu Öndərin tutduğu qətiyyətli mövqe, apardığı uğurlu siyasət nəticəsində bu gün Azərbaycanın dünya miqyasında güclü dövlətə, beynəlxalq birliyin nüfuzlu və etibarlı üzvünə çevrildiyini vurğulayıb.
Azərbaycanın inkişafında, milli dövlətçiliyin möhkəmləndirilməsində və xalqımızın rifahının təmin edilməsində Ulu Öndərin müstəsna xidmətlərini vurğulayan səfir, dahi liderin uzaqgörən siyasəti və strateji qərarları ilə Azərbaycanın dövlətçilik tarixində əbədi iz qoyduğunu diqqətə çatdırıb. Qeyd olunub ki, ölkəmizin müstəqil və güclü dövlətə çevrilməsi, Azərbaycanın ərazi bütövlüyünün və suverenliyinin bərpası, bugünkü sürətli iqtisadi inkişafı, məhz Ulu Öndər tərəfindən zamanında atılmış addımların və verilmiş müdrik qərarların nəticəsində mümkün olub.
Səfir Ulu Öndər Heydər Əliyevin siyasi kursunun bu gün onun layiqli davamçısı Prezident İlham Əliyev tərəfindən uğurla davam etdirildiyini vurğulayaraq, ölkəmizin müasir dövrdə əldə etdiyi çoxsaylı uğurlar və nailiyyətlər haqqında tədbir iştirakçılarına geniş məlumat verib.
Tədbirdə Azərbaycanın və məşhur dünya bəstəkarlarının əsərləri ifa edilib.
İqbal Hacıyev
AZƏRTAC-ın xüsusi müxbiri
Buxarest
