Xəbər verdiyimiz kimi, Argentina millisinin və “İnter Mayami”nin ulduz hücumçusu Lionel Messi ötən gecə Azərbaycana səfərə gəlib.
Arena.az xəbər verir ki, Messi ilə yanaşı onun komanda yoldaşları – Luis Suares, Serxio Buskets və Jordi Alba da Bakıda səfərdə olublar.
Onlar bu gün əvvəlcə Qarabağ atlarını izləyiblər. Ulduz futbolçular maraqlı anlar yaşayıblar və gördüklərindən məmnun qalıblar.
Daha sonra “İnter Mayami”nin ulduz oyunçuları Fəxri xiyabanda Ulu Öndər Heydər Əliyevin məzarını ziyarət edib, xatirəsini anıblar. Onlar Ümummilli Liderin məzarı önünə əklil qoyublar. Dünya şöhrətli futbolçuları tanınmış iş adamı Adnan Əhmədzadə müşayiət edib
Ardından Messi və komanda yoldaşları Bakı Kristal Zalında fanatları ilə görüşüblər. Azarkeşlərin dünya futbolunun ulduzları ilə görüşündən əvvəl səhnədə “Natiq” ritm qrupunun çıxışı olub. Daha sonra dünyaşöhrətli bəstəkar və müğənni Villi Uilyam (Willy William) konsert proqramını təqdim edib.
Dünya çempionu, 8 dəfə “Qızıl top” mükafatına layiq görülən Lionel Messinin futbol karyerasını əks etdirən filmin nümayişindən sonra isə ulduz futbolçular səhnəyə çıxıblar. Ölkəmizin uşaq futbol komandalarının təmsilçilərinə bir çox gəncin arzuladığı imkan da yaradılıb. Gənc futbolçularımız dünyanın ən yaxşı futbolçusu Lionel Messi və komanda yoldaşlarına top ötürərək özlərini peşəkarlarla bir oyunun iştirakçıları kimi hiss ediblər.
Daha sonra futbol ulduzları gənc həmkarları və sağlamlıq imkanları məhdud uşaqlarla xatirə şəkli çəkdiriblər. Ulduz futbolçular imzalı topları auditoriyaya atıblar. Futbol həvəskarları üçün bu idman bayramı məşhur “Morandi” qrupunun çıxışı ilə davam edib.
Minlərlə fanatın qatıldığı tədbirə Bakının uşaq evlərinin sakinləri, sağlamlıq imkanları məhdud uşaqlar və şəhidlərimizin övladları da dəvət olunub.
Qeyd edək ki, bu tədbirə bilet satışından əldə olunan vəsait isə xeyriyyə məqsədinə yönəldiləcək.
“Azərbaycanın mədəniyyəti və insanları ilə tanış oldum”
Lionel Messi tədbir iştirakçıları ilə təəssüratlarını da bölüşüb. O, qısa çıxışında bunları vurğulayıb: “Hər kəsi salamlayıram. Bu cür isti münasibətə görə təşəkkür edirəm. Azərbaycanın mədəniyyəti və insanları ilə tanış oldum. Dəstəyə görə çox sağ olun”, – deyə o bildirib.
Bu möhtəşəm tədbir bitəndən sonra isə ulduz futbolçular Heydər Əliyev Mərkəzində olublar. Heydər Əliyev Mərkəzinin direktoru Anar Ələkbərovla görüşən qonaqlar mərkəzdə təqdim olunan sərgiləri də ziyarət ediblər.
Lionel Messi və komanda yoldaşları “Azərbaycan xalçası-ilmələrin rəqsi” adlı xalça kolleksiyası, “Klassik avtomobil sərgisi” və digər ekspozisiyalarla tanış olublar.
Axşam saatlarında Lionel Messi, Luis Suares, Serxio Buskets və Xordi Albanın Bakıya səfəri başa çatıb. Qonaqlar bu gün Azərbaycanı tərk ediblər.
