Avropa İttifaqının daimi nümayəndələri Rusiyaya qarşı yeni sanksiyalar paketi üzrə razılığa gəliblər. Vətəninfo.az xəbər verir ki , bu barədə Macarıstanın sədrliyi məlumat yayıb.
“Daimi nümayəndələr indicə 15-ci sanksiya paketi ilə bağlı razılığa gəliblər”, – prezidentliyin X sosial şəbəkəsindəki press-relizində deyilir.
Xüsusilə, o, “sanksiyalardan yan keçməklə Rusiyanın hərbi və texnoloji sahədə güclənməsinə dolayısı ilə töhfə verən” yeni fiziki və hüquqi şəxslərə (o cümlədən üçüncü ölkələrdən olanlara) məhdudiyyətlərin tətbiq ediləcəyini bildirir. Bundan əlavə, Macarıstanın sədrliyinin məlumatına görə, sanksiyalar paketi üçüncü ölkələrin gəmilərinə qarşı yönələcək.
Avropa mətbuatı xatırladır ki, bu sanksiyalar hələ də Aİ Şurası tərəfindən təsdiqlənməlidir.
Noyabr ayında Bloomberg agentliyi müxtəlif mənbələrdən əldə etdiyi məlumata əsaslanaraq bildirmişdi ki, yeni sanksiyalar paketinə əlavə ticarət məhdudiyyətləri, habelə Rusiyanın kənd təsərrüfatı məhsullarına artan tariflər daxil ola bilər. Macarıstan sədrliyinin mesajında bu barədə heç nə qeyd olunmur.
