Avropa İttifaqının maliyyələşdirdiyi “Vaksinasiyaya dəstək” layihəsi çərçivəsində Ümumdünya Səhiyyə Təşkilatı “İmmunizasiyadan sonrakı arzuolunmaz hallar (İSAH): epidemioloji müşahidə və səbəb-nəticənin qiymətləndirilməsində müasir yanaşmalar” adlı üçgünlük seminar təşkil edib. Tədbir ÜST-nin Avropa üzrə Regional Ofisinin ekspertlərinin İSAH sahəsi üzrə qabaqcıl təcrübəni iştirakçılara interaktiv yolla təqdim etdiyi təlim formatında keçirilib.
Seminarın əsas məqsədi immunizasiyadan sonrakı arzuolunmaz halların aşkarlanması və səbəb-nəticə əlaqəsinin qiymətləndirilməsi üçün milli mexanizmləri möhkəmləndirərək, peyvənd təhlükəsizliyinə nəzarət üzrə ölkədaxili mövcud sistemlərin gücləndirilməsinə dəstək olmaqdır.
Tədbirdə açılış nitqi ilə çıxış edən ÜST-nin Azərbaycan Ofisinin rəhbəri Dr. Hande Harmancı və Azərbaycan Respublikası Səhiyyə Nazirliyinin İctimai səhiyyə və xəstəliklərə nəzarət şöbəsinin məsləhətçisi Vüsalə Səfərova İSAH-nin epidemioloji müşahidəsinin immunizasiya proqramının mühüm istiqamətlərindən biri olduğunu diqqətə çatdırıblar.
Tədbirdə 40 nəfərə yaxın milli immunizasiya proqramı və dərman nəzarəti orqanlarının nümayəndələri, habelə ilkin səhiyyə və xəstəxana xidmətləri, habelə tibb təhsili proqramları üzrə mütəxəssislər iştirak edib.
Seminar İSAH-nin qiymətləndirilməsi və idarə olunması üçün vacib olan mövzuları - müşahidə və monitorinq üsulları, İSAH klasterlərinin araşdırılması, İSAH-nin epidemioloji nəzarəti üzrə ÜST təlimatlarının və resurslarının nəzərdən keçirilməsi, İSAH üzrə kommunikasiyanın qurulması yolları, peyvənd təhlükəsizliyinin şəffaflığı və s. məsələləri əhatə edib. Tədbirdə həmçinin onlayn formatda ABŞ, Estoniya və Gürcüstan mütəxəssisləri tərəfindən bu ölkələrdə İSAH üzrə qurulmuş epidemioloji nəzarət sistemi ilə bağlı uğurlu təcrübə haqqında iştirakçılara ətraflı məlumat verilib.
Seminarın son günü iştirakçılar 3 gün müddətində təqdim olunan informasiyanın təhlili məqsədilə qrup işinə cəlb olunub. Daha sonra qruplar əldə olunan məlumatlar əsasında ölkədə İSAH-la bağlı boşluqları müzakirə edib və gələcəkdə bu sahənin təkmilləşdirilməsi üçün əsas istiqamətlər müəyyən olunub. Seminarın sonunda iştirakçılar tədbirin keçirilməsini İSAH üzrə sistemlərin inkişaf etdirilməsi yolunda irəliyə atılan addım kimi qiymətləndirib və bu sayədə səhiyyə sistemi qarşısında yeni və əhəmiyyətli imkanlar yarandığını bildiriblər.
Xatırladaq ki, Azərbaycanda COVID-19 pandemiyasına qarşı mübarizə və rutin immunlaşdırma proqramlarının gücləndirilməsi məqsədilə ÜST-nin Azərbaycandakı Ölkə Ofisi 2021-ci ilin iyun ayından etibarən Avropa İttifaqının maliyyə dəstəyi ilə üç illik COVID-19 əleyhinə “Vaksinasiyaya Dəstək” layihəsini həyata keçirir. Layihə Avropa İttifaqı və Ümumdünya Səhiyyə Təşkilatının Azərbaycana davamlı dəstəyinin tərkib hissəsidir.
Z.BƏŞİRQIZI XQ
