Amerikanın United Airlines aviaşirkəti SpaceX-dən olan Starlink peyk interneti sayəsində uçuşlarında pulsuz Wi-Fi təqdim etməyi planlaşdırdığını açıqlayıb. Xidmətin sınaqlarına 2025-ci ilin əvvəlində başlanacaq, bundan sonra Starlink-dən pulsuz Wi-Fi daşıyıcının 1000-dən çox təyyarəsində mövcud olacaq.
News24.az xəbər verir ki, bu barədə “The Verge” məlumat yayıb.
United Airlines-ın baş direktoru Skott Kirbi bildirib ki, bu xidmət sərnişinlərə dünyanın demək olar ki, istənilən yerində yerdə etməyə alışdıqları hər şeyi təyyarənin göyərtəsində etməyə imkan verəcək.
Starlink sərnişinlərə 100 ms-dən az gecikmə ilə ən azı 100 Mbit/s ortaq qoşulma sürəti təqdim etməyi planlaşdırıb. Bu parametrlər axınlı videoya fasiləsiz baxmaq və videokonfranslarda iştirak etmək üçün kifayətdir.
Qeyd edək ki, United Airlines, Starlink sayəsində təyyarələrində internetə çıxış təmin edən ilk aviaşirkət deyil. Bu xidmət artıq ABŞ-da JSX və Hawaiian Airlines təyyarələrində mövcuddur.
Məryəm İlhamqızı
