“Ermənistan Rusiya ilə siyasi dialoqu və idarələrarası əməkdaşlığı azaltmağa başlayıb".
“Cebheinfo.az”-ın məlumatına görə, Rusiya Xarici İşlər Nazirliyinin rəsmi nümayəndəsi Mariya Zaxarova həftəlik brifinqdə belə deyib.
“Sanki Ermənistanda müəyyən siyasi qüvvələr tərəfindən qəsdən dezinformasiyalar yayılır ki, guya KTMT Ermənistanı müdafiə etməyib və s. Bütün bunlar həqiqətə uyğun deyil. Çünki biz dəfələrlə KTMT və Rusiyanın səyləri barədə ətraflı danışmışıq və Ermənistan hakimiyyətinin qəbul etdiyi qərarlarla bağlı öz qiymətləndirmələrimizi bölüşmüşük. Biz hesab edirik ki, İrəvandan vaxtaşırı eşidilən iddialar absurddur və faktlara uyğun gəlmir”, - deyə Zaxarova bildirib.
Rusiya rəsmisi Ermənistanı yalnız iqtisadi müstəvidə deyil, siyasi sahədə də Rusiya ilə əməkdaşlığı dərinləşdirməyə çağırıb:
“Onlar davamlı olaraq KTMT-də iştirakın dondurulmasından danışırlar.
Lakin bunun əksinə olaraq onlar Qərbə daha da yaxınlaşmağa başlayıblar. Bunun müəyyən bir manipulyasiyası var. İqtisadi göstəricilər bir şeyi göstərir: insanların, şirkətlərin və bizneslərin əlaqələrin daha da yaxınlaşmasında, möhkəmlənməsində maraq var, amma siyasi üstqurum nədənsə əksinə hərəkət edir. Bunun sonu pis ola bilər”.
O, həmçinin qeyd edib ki, tarix bu cür manipulyasiyaların öz səhv hesablamalarını ört-basdır etmək üçün necə istifadə edildiyinə dair bir çox misallar bilir.
