Sentyabrın 20-də əfsanəvi aktrisa Sofia Lorenin 90 yaşı tamam olub. O, Hollivudun “Qızıl Dövrü”nün ulduzlarından biridir.
“Qafqazinfo” xarici mətbuata istinadən xəbər verir ki, yaşının çox olmasına baxmayaraq, Loren tez-tez olmasa da, bəzən ictimai tədbirlərdə iştirak edir.
1934-cü ildə kasıb bir ailədə anadan olub və Sofini anası böyüdüb. O, 14 yaşında gözəllik müsabiqəsinə qatılsa da, qalib gələ bilməyib.
Lakin bu, onun karyerasının başlanğıcı idi…
O, kino prodüseri, daha sonra həyat yoldaşı olan Karlo Pontinin diqqətini çəkib. Ponti Sofinin potensialını görüb və ona filmlərində kiçik rollar almasına kömək edib. Bununla da 70 ildən çox davam edəcək karyerasına başlayıb.
İlk dəfə filmlərə çəkilmək istəyəndə Sofiyə burun əməliyyatı etdirməyi və arıqlamağı məsləhət görsələr də, o, hər iki fikirdən imtina edib.
Loren 1962-ci ildə “Oskar” qazanıb və bu, onun karyerasında dönüş nöqtəsi olub. İlk dəfə idi ki, hər hansı aktyor ingilis dilində olmayan filmdəki roluna görə mükafat alırdı.
O, o dövrdə sənayenin ən böyük adlarından bəziləri ilə birlikdə rol alaraq Hollivuda uğurlu bir keçid edib.
Şöhrətli karyerası ərzində Sofi Loren bir çox mükafat və fəxri adlara layiq görülüb. O, “Oskar”dan əlavə, həmçinin “Qızıl Qlobus” və Kann Film Festivalı mükafatı alıb.
11 illik fasiləsindən sonra 2020-ci ildə Hollivud əfsanəsi italyan dilində “The Life Ahead” dram filmində rol almaq üçün aktyorluğa qayıdıb.
Əfsanəvi italyan aktrisa Sofi Lorenin gənclik illərindən bəzi fotoları təqdim edirik:
