Azərbaycan diaspor təşkilatları Niderland Krallığının ölkəmizə qarşı qərəzli mövqeyini pisləyiblər. Buna səbəb həmin ölkənin ictimaiyyətə təqdim etdiyi proqramda Azərbaycan ərazilərinin azad edilməsinin, guya, “Dağlıq Qarabağın ələ keçirilməsi” kimi qeyd olunmasıdır.
Niderland–Belçika Azərbaycanlıları Koordinasiya Şurası, “Ana Vətən” Niderland Azərbaycanlı Qadınlar Birliyi, Niderland–Azərbaycan Türk Kültür Dərnəyi, Benelüks Azərbaycanlıları Konqresi, Beynəlxalq Azərbaycanlı Xanımlar Klubu, Azərbaycan-Niderland “Odlar Yurdu” Cəmiyyəti Niderland hökumətinin belə qərəzli mövqeyi barədə birgə bəyanat yayıblar.
Bəyanatda Azərbaycanın öz torpaqlarını azad etməsinin “Dağlıq Qarabağın ələ keçirilməsi” kimi göstərilməsinin qəbuledilməz olduğu və Azərbaycanın ərazi bütövlüyünün bərpası üçün atdığı addımları tamamilə beynəlxalq hüququn norma və prinsiplərinə uyğun həyata keçirdiyi vurğulanıb. Bəyanatda, həmçinin Qarabağ bölgəsinin “Dağlıq Qarabağ” kimi adlandırılması qətiyyətlə rədd edilib.
Bəyanatın sonunda diaspor təşkilatları Niderland hökumətini obyektiv və balanslı yanaşmaya və Azərbaycanla münasibətlərə mənfi təsir edə biləcək bəyanatlardan çəkinməyə çağırıb.
