İqtisadi İslahatların Təhlili və Kommunikasiya Mərkəzi “Azərbaycan Respublikasının işğaldan azad edilmiş ərazilərinə Böyük Qayıdışa dair I Dövlət Proqramı”nın icrası ilə bağlı cari ilin birinci yarısı üzrə monitorinq və qiymətləndirmə prosesini yekunlaşdırıb.
Mərkəzdən redaksiyamıza bu barədə verilən məlumatada adıçəkilən dövlət proqramı çərçivəsində 28 min hektara yaxın ərazinin minalardan və partlamamış hərbi sursatlardan təmizləndiyi bildirib. Laçın dövlət sərhədinin buraxılış məntəqəsində “Laçın” gömrük postu qurulub.
Hesabat dövründə 767 ailə olmaqla 2904 nəfər keçmiş məcburi köçkün Şuşa, Füzuli və Laçın şəhərlərinə, Laçın rayonunun Zabux və Sus kəndlərinə köçürülüb. Azad edilmiş ərazilər üzrə, ümumilikdə, 612 nəfər işlə təmin edilib.
Qarabağ və Şərqi Zəngəzurda yüksək gərginlikli elektrik enerjisi təchizatı üçün 72,2 kilometrlik 110 kv-luq, 262 kilometrlik 330 kv-luq elektrik verilişi xətləri çəkilib. Ərazilərdə telekommunikasiya və poçt xidmətləri infrastrukturunun qurulması məqsədilə 2 yaşayış məntəqəsində poçt xidmətləri yenidən təşkil edilib, 1məntəqədə radio-televiziya yayımı stansiyasının fəaliyyəti təmin olunub. Mobil telekommunikasiya xidmətlərinin təşkili üzrə 11 yeni baza stansiyası quraşdırılıb. 5 kilometr uzunluğunda dəmir yolu xəttinin çəkilişi başa çatdırılıb.
Respublika və yerli əhəmiyyətli avtomobil yollarının tikintisi və yenidən qurulması istiqamətində Kəlbəcər və Laçın rayonları ərazisində yol infrastrukturunun, Ağdam şəhərinin daxili yollarının, Xudafərin–Qubadlı–Laçın, Əhmədbəyli–Füzuli–Şuşa, Horadiz–Cəbrayıl–Zəngilan–Ağbənd, Toğanalı–Kəlbəcər–İstisu və Şuşa–Laçın avtomobil yollarının tikintisi davam etdirilib. Hesabat dövründə Füzuli, Zəngilan və Laçın beynəlxalq hava limanları üçün müvafiq kodlar əldə olunub. Füzuli və Zəngilan hava limanlarında uçuşların təşkili reallaşdırılıb.
Qarabağ və Şərqi Zəngəzurda məskunlaşan əhalinin bank, sığorta və maliyyə xidmətlərinə çıxış imkanını genişləndirmək məqsədilə Laçın şəhəri və Zəngilan rayonunda bank filialları, digər yaşayış sahələrində 611 bank və “Azərpoçt” tərəfindən quraşdırılmış POS-terminallar fəaliyyətə başlayıb.
Sahibkarlıq fəaliyyəti üçün əlverişli mexanizmlərin yaradılması istiqamətində regionlarda fəaliyyət göstərən sənaye parklarında 11 müəssisə rezident, 1 müəssisə isə qeyri-rezident kimi qeydiyyata alınıb. Emal sənayesi və xidmət infrastrukturunun inkişaf etdirilməsi istiqamətində, ümumilikdə, 170 layihə üzrə rezidentlərin fəaliyyəti təmin edilib. 3 sahibkarlıq subyektinin investisiya layihəsinin maliyyələşdirilməsinə güzəştli kredit verilib. Azad edilmiş ərazilərdə fəaliyyət göstərən 12 kənd təsərrüfatı məhsulları istehsalçısına dövlət büdcəsinin vəsaiti hesabına əkin subsidiyası ödənilib.
