Rusiya prezidenti Vladimir Putinin bazar ertəsi imzaladığı fərmana əsasən, bu ölkənin Müdafiə Nazirliyi payız-qış aylarında 133 min gənci məcburi hərbi xidmətə cəlb etməyi planlaşdırır.
Yazda orduya çağrılacaq 150 min nəfərlə Rusiya ordusu 2024-cü ilin sonuna qədər 283 min nəfəri orduya cəlb etmiş olacaq. 2023-cü ilin payız çağırışında Rusiya 130 min nəfəri orduya cəlb edib.
Yenicag.az xəbər verir ki, yeni fərman Putinin 2024-cü ilin sonuna qədər orduda aktiv şəxsi heyətin sayını 1,5 milyona çatdırmaq istədiyini deməsindən iki həftə sonra imzalanıb.
Məcburi hərbi xidmət 18 yaşdan 30 yaşa qədər olan bütün rus kişilərindən ilkin hərbi təhsil almağı tələb edir. Məcburi hərbi xidmətdən yayınma iki ilədək müddətə azadlıqdan məhrum etmə ilə cəzalandırılır.
Rusiya qanunvericiliyinə görə, çağırışçılar hərbi xidmətə çağırıldıqdan və əsas hazırlığı başa vurduqdan sonra yalnız dörd ay ərzində döyüş bölgələrinə göndərilə bilərlər. Lakin Rusiyanın Ukraynaya genişmiqyaslı müdaxiləsindən sonra Putin ictimaiyyəti əmin edib ki, çağırışçılar döyüş əməliyyatlarında iştirak etməyəcəklər. Lakin bu təminat Rusiya qanunları ilə dəstəklənmir.
Rusiya hərbçiləri Ukraynaya yeni çağırışçıların göndərilməyəcəyini təkrarlayıb. Ordu bu çağırış dövründə Rusiyanın yeni rəqəmsal dövlət sistemindən istifadə edilməyəcəyini açıqlayıb. Hərbi xidmətə çağırılacaq şəxslər isə 1 oktyabr – 31 dekabr tarixlərində qulluğa qəbul zamanı yerli şöbələrə müraciət edəcəklər.
İsmayıl Bakuvi
