Ukrayna pilotsuz təyyarələri Malinin şimalındakı üsyançılara dəstək verir...
Bu ilin yayından etibarən CSP hərəkatının tuaregləri Mali ordusu və onun Rusiya müttəfiqi "Vaqner"lə mübarizədə pilotsuz təyyarələrdən fəal şəkildə istifadə edirlər.
Poliqon "Le Monde" nəşrinə istinadən məlumat verir ki, Kiyev üsyançılara "ağıllı, lakin qətiyyətli dəstək” verir.
Pilotsuz təyyarələrin istifadəsi artıq sirr deyil - bu, Mali xuntasına və onun Rusiya müttəfiqlərinə qarşı döyüşən CSP üsyançıları üçün qürur məqamına çevrilib.
"Əsas mesaj ondan ibarətdir ki, üsyançılar indi düşmənləri ilə eyni hava hücumu imkanlarına malikdirlər", deyə nəşr bildirib.
Pilotsuz uçuş aparatları döyüşdə qüvvələr balansını dəyişməyə imkan verən effektiv vasitəyə çevrilib. 2024-cü il oktyabrın 4-də kiçik dronlar "Vaqner"in bölmələrinin yerləşdiyi Timbuktu bölgəsində yerləşən Qundamdakı hərbi düşərgəyə hücum ediblər. CSP nümayəndələrinin sözlərinə görə, azı doqquz rus muzdlusu öldürülüb. Sentyabr ayında da eyni düşərgəyə və bölgədəki digər obyektlərə oxşar hücumlar baş verib.
Təsdiqlənmiş məlumatlara görə, Ukrayna hərbi kəşfiyyatı ilə CSP üsyançıları arasında əməliyyat əməkdaşlığı 2024-cü ilin əvvəlində başlayıb. Üsyançıların bir neçə nümayəndəsi pilotsuz uçuş aparatlarının istehsalı və istifadəsi üzrə təlim keçmək üçün Ukraynaya gedib.
"CSP qrupu bizimlə Ukraynada məşq etməyə gəldi və bizim təlimatçılardan daha böyük bir qrup oraya (Sahel) getdi, hələ də oradadır", deyə Ukraynanın Baş Kəşfiyyat İdarəsinə yaxın mənbə bildirib.
CSP komandirlərindən birinin sözlərinə görə, pilotsuz təyyarələr əsasən Malidəki Vaqner qüvvələrini hədəf almaq üçün istifadə olunur. Buna baxmayaraq, üsyançı liderlər dronların Ukrayna mənşəli olduğunu inkar edərək, onların Liviyada qara bazardan alındığını iddia edirlər.
Mütəxəssislər qeyd edirlər ki, bu yüngül pilotsuz təyyarələr üsyançıların hərbi potensialını kökündən dəyişməyə qadir deyil, lakin onlar rus muzdlularına qarşı döyüşlərdə mühüm silahdır.
"Bu, bizə düşmənin hərəkətlərini daha yaxşı izləməyə və onlara havadan hücum etməyə imkan verir. Bu, hər şeyi dəyişə bilər", deyə CSP komandiri yekunlaşdırıb.
Poliqon.info
