PNAS: Üç milyard il əvvəl asteroidin təsiri Yerdə həyatın inkişafına təkan verib...
Harvard Universitetinin alimləri 3,26 milyard il əvvəl nəhəng asteroidin təsirinin erkən həyatın inkişafına töhfə verdiyini aşkar ediblər.
Poliqon xəbər verir ki, tədqiqatın nəticələri “Proceedings of the National Academy of Sciences” (PNAS) jurnalında dərc olunub.
Dinozavrları məhv edən astroiddən 200 dəfə böyük olan asteroidin nəhəng sunamiyə və Yerin ekosistemlərində dramatik dəyişikliklərə səbəb olduğu müəyyən edilib. Zərbə okeanın yuxarı təbəqələrinin buxarlanmasına, atmosferin qızmasına və günəş işığının qarşısını alan və fotosintezi dayandıran sıx bir toz buludunun yaranmasına səbəb olub. Lakin, belə dağıdıcı nəticələrə baxmayaraq, mikrob həyatı tezliklə bərpa olunub.
Tədqiqatçılar Cənubi Afrikadakı Barberton Qrinstoun dağlarındakı qaya nümunələrinin hərtərəfli təhlilini aparıblar. Komanda bir-birindən cəmi bir neçə santimetr məsafədə nümunələr toplayıb və meteorit zərbəsindən sonra baş verən hadisələri yenidən qurmaq üçün onların çöküntü strukturunu, kimyəvi tərkibini və karbon izotop analizini ətraflı öyrəniblər.
Məlum olub ki, zərbədən sonra okeana külli miqdarda dəmir buraxılıb ki, bu da bu elementi metabolizə edən bakteriyaların sürətlə artmasına səbəb olub. Həyat üçün vacib olan fosfor da meteorit tərəfindən Yerə çatdırılıb və ekosistemlərin bərpası üçün vacib element olub. Alimlərin gəldikləri nəticə budur ki, təsir hadisələri qədim okeanlarda həyatın inkişafına təkan verə bilərdi.
Tədqiqatçıların tapıntılarına görə, meteoritlərin dağıdıcı təsirlərinə baxmayaraq, onlar Yerdəki erkən həyata da müsbət təsir göstərərək onun çiçəklənməsinə şərait yarada bilərdi. Alimlərə görə dəmir yeyən bakteriyaların artması meteoritdən sonra mikrob həyatının təkamülünün əsas elementi olub.
Poliqon.info
