Gürcüstan parlament seçkilərindəki məğlubiyyətdən sonra müxalifət etiraz dalğası yaratmaq üçün nəticələrinin legitimliyini şübhə altına almağa çalışacaq. Lakin bu yaz etiraz aksiyalarında bütün resurslarını tükəndirib.
OXU24.COM xəbər verir ki, bunu Gürcüstanın baş naziri İrakli Kobaxidze brifinqdə bildirib.
Oktyabrın 26-da keçiriləcək parlament seçkilərində 18 seçki subyekti iştirak edir. İlk dəfədir ki, seçkilər yalnız proporsional sistem üzrə (partiya siyahıları əsasında) və geniş miqyasda elektron texnologiyalardan - səslərin yoxlanılması və hesablanması aparatlarından istifadə etməklə keçirilir.
"Müxalifətin məğlubiyyətindən sonra, əlbəttə ki, biz 2020-ci il parlament seçkilərindən sonra yaranmış təxminən eyni ssenarini gözləyirik - onlar öz resurslarını tamamilə tükəndirsələr də, seçkilərin legitimliyini şübhə altına almağa çalışacaqlar", - Kobaxidze bildirib.
Onun sözlərinə görə, “Xarici təsirin şəffaflığı haqqında” qanunun qəbuluna etirazlar zamanı müxalifət öz resurslarını tükəndirib. Bu qanuna müxalifət və xaricdən maliyyələşən qeyri-hökumət təşkilatları ilə yanaşı, bütün Qərb etiraz edirdi. Qanunun qəbulundan sonra Qərblə münasibətlər çox pisləşdi.
Baş nazirin sözlərinə görə, “radikal müxalifət” seçki məntəqələri saat 20:00-da bağlandıqdan sonra öz məğlubiyyətlərinə etiraz etməyə çalışacaq.
Xatırladaq ki, seçicilər Gürcüstan parlamentinə 150 deputat seçir. Mandatlar faktiki səslərin ən azı 5%-ni toplayan partiyalar arasında bölüşdürüləcək.
Səsvermədə ölkədə yaşayan 18 yaşdan yuxarı 3 milyon 17 min 837 Gürcüstan vətəndaşı iştirak edə bilər. Onlar üçün 3044 seçki məntəqəsi açıqdır. Daha 95 910 seçici xaricdəki 67 seçki məntəqəsində - 42 ölkənin 53 şəhərində səs verə biləcək.
