"Apple” şirkəti diabetdən əziyyət çəkən insanlara qida qəbuluna nəzarət etməyə və həyat tərzini dəyişməyə kömək edən "Qan Şəkəri” proqramını sınaqdan keçirib.
Qaynarinfo xəbər verir ki, bu barədə "Bloomberg” məlumat yayıb.
Yeni məxfi texnologiyanı ilk sınaqdan keçirənlər xəstə olmayan, lakin testlərə görə 2-ci tip diabetin inkişaf riski ilə üzləşə bilən "Apple" işçiləri olub. Test çərçivəsində onlar bazarda mövcud olan müxtəlif cihazlarla qan şəkərini aktiv şəkildə izləyiblər və sonra qlükoza səviyyəsində dəyişikliklərin yedikləri ilə necə əlaqəli olduğunu proqrama yazıblar.
"Bloomberg” üçün yazan tanınmış insayder Mark Qurman sistemin ideyasının istehlakçılara diabetin qarşısını ala biləcək ruhlandırıcı dəyişikliklər ümidi ilə müəyyən qidaların qan şəkəri səviyyələrinə necə təsir edə biləcəyini göstərmək olduğunu söyləyib. Məsələn, istifadəçilər nahar üçün makaron yediklərini və şəkər səviyyəsinin yüksəldiyini qeyd edərlərsə, onlara makaron yeməyi dayandırmaq və ya zülalla zəngin bir şey yemək tövsiyə oluna bilər.
"Apple” indi bunun üçün ayrı bir tətbiq buraxmağı planlaşdırmır, lakin zamanla bu texnologiyanı gələcək Sağlamlıq məhsullarına, o cümlədən şirkətin ən iddialı Sağlamlıq təşəbbüsünə - on ildən çoxdur inkişaf etdirdiyi qeyri-invaziv qlükoza izləyicisinə inteqrasiya edə bilər.
Nizami Bağırov
