Argentinanın Buenos-Ayres əyalətinin Villa Gesell şəhərində Dubrovnik apart-otelinin yerləşdiyi on mərtəbəli bina uçub.
Bu barədə“ La Nacion” qəzeti məlumat yayıb.
Şəhər meri Qustavo Barreras nəşrə bildirib ki, bina 38 il əvvəl təsdiq edilmiş plan əsasında və qaydalara uyğun tikilib. Dağılan gün oteldə tikinti işləri gedirdi. Onuncu mərtəbənin tavanlarından başlayan konstruksiyaların uçması zamanı binada işçilər olub, onlardan dördü hadisə yerindən qaça bilib. Oteldə qonaqların olması barədə dəqiq məlumat yoxdur. İlkin olaraq itkin düşən 7-9 nəfər üçün axtarış-xilasetmə əməliyyatı təşkil edilib.
Şəhər rəhbəri əlavə edib ki, çökmə nəticəsində qonşu evlər zərər çəkib, ona görə də dağıntıları təmizləyərkən onların sakinləri də axtarılır. Barreras dəqiqləşdirib ki, strukturlar yerli vaxtla 00:30 radələrində uçub.
