Qırğızıstan prezidenti Sadir Japarov dövlət himninin dəyişdirilməsini dəstəkləyib.
Hafta.az-ın “Kabar”a istinadən yazdığına görə, siyasətçi bildirib ki, bunun heç bir mənfi tərəfi yoxdur, faktiki himn 33 il əvvəl - Qırğızıstan müstəqillik əldə etdiyi vaxt yazılıb.
“Biz indi müstəqillik əldə etmişik, taleyimizi əlimizə almışıq, irəliləyirdik – himn müəllifləri belə bir sevinc və həyəcanla yazırdılar. O vaxtdan 33 il keçir. Biz dövlət olaraq tam formalaşmışıq. Bütün dünya bizi tanıyır. Biz yüz ildən sonra da azadlığımızı, müstəqil ölkəmizi tərənnüm edəcəyik” deyən Japarov bildirib ki, Qırğızıstanın müstəqilliyini, 5 min illik tarixini əks etdirən, gəncləri və gələcək nəsilləri ruhlandıran himn yazmaq olar. O, dövlət himninin unudulmayacağını və ölkə tarixində qalacağını vurğulayıb.
“Bəzi demokratlar və populistlər bayrağın dəyişdirilməsi ideyasına qarşı çıxdılar. İndiki bayrağımız pisdir? Əvvəlki bayraqla müqayisədə irəliyə doğru bir addım idi. Köhnə bayrağımızdakı günəş simvolu ya günəbaxana, ya da “mişar dişlərinə” bənzəyirdi. Hazırkı bayrağı görən hər kəs onun günəş şüası olduğunu dərhal anlayacaq. Çünki o, parlayır”, - siyasətçi bildirib.
Japarov bildirib ki, dövlət himninin dəyişdirilməsi tələsik həll olunmayacaq, əvvəlcə yeni himn yazılacaq, sonra isə xalqa təqdim olunacaq.
Qırğızıstan prezidentinin sözlərinə görə, dövlət himni azyaşlı uşaqlardan tutmuş qocalara qədər hamı üçün başa düşülən olmalı, bayramlarda və konsertlərdə səsləndirilməlidir.
“Himnin məzmunu ölkəmizi tərənnüm etməli, vətəndaşları vətənpərvərliyə, birliyə, harmoniyaya səsləməli, ölkəmizin əbədi xilası ilə bağlı ideyaları özündə əks etdirməlidir", - prezident deyib.
