İstehsalın aşağı qiyməti və avtomatlaşdırılmış pilotsuz sistemlərin yüksək səmərəliliyi tezliklə ənənəvi döyüş vasitələrini, o cümlədən tankları və artilleriyanı köhnəldəcək.
Azpost.info xəbər verir ki, bunu amerikalı milyarder və “Google” korporasiyasının direktorlar şurasının keçmiş sədri Erik Şmidt “Business Insider”a deyib.
O, dron savaşlarının qaçılmaz olduğunu bildirib.
“Dron müharibəsi nəticədə hər kəsi tanklardan, artilleriyadan və minaatanlardan qurtulmağa məcbur edəcək, ABŞ-ın minlərlə tankı var, bunun əvəzinə pilotsuz təyyarələr alın. Əgər pilotsuz təyyarələrlə döyüş taktikasına nəzər salsanız, onun hər gün dəyişdiyini görərsiniz. Dünyada çoxlu sayda tank var. İndi bu tanklar praktiki olaraq yararsızdır. 5 min dollarlıq pilotsuz təyyarə 5 milyon dollarlıq tankı məhv edə bilər”, – Şmidt deyib.
“Business Insider” yazır ki, pilotsuz təyyarələrdən istifadə Ukraynada döyüş əməliyyatlarının xarakterini tamamilə dəyişib, burada ucuz FPV dronları həm işçi qüvvəsini, həm də texnikanı məhv etmək üçün dominant vasitə olaraq qalır.
“Pilotsuz təyyarələr döyüş meydanını daha şəffaf və təhlükəli etsə də, ənənəvi döyüş vasitələrindən münaqişələrdə geniş istifadə olunmağa davam edir və tərəflər arasında qarşıdurmada aparıcı rolu artilleriya zərbələri oynayır. Dronların və süni intellektin inkişafı bu vəziyyəti dəyişəcək”, – nəşr qeyd edir.
Azpost.info
