“Real”ın azarkeşləri “qaymaqlılar”ın 38 yaşlı keçmiş mərkəz müdafiəçisi Serxio Ramosu Madrid klubuna qayıtmağa səsləyirlər.
Arena.az məlumat verir ki, bu çağırış, “Real”ın braziliya mərkəz müdafiəçisi Eder Militaonun ağır zədə alaraq cari mövsümün sonuna qədər sıradan çıxaması mənzərəsində baş verir.
Xatırladaq ki, Serxio Ramos hazırda azad agent qismində klubsuz gəzib-dolaşır və özünə yeni düşərgə axtarır.
“Real” azarkeşlərini müvafiq çağırışa, 38 yaşlı Ramosun çox yaxşı fiziki formada olduğunu əks etdirən məşq videosunu paylaşması sövq edib:
“Sənə ehtiyacımız var, kapitan”, – “Real” azarkeşlərindən biri sosial şəbəkə hesabı üzərindən Ramosun paylaşmasını şərh edib.
“Lütfən, Madrid “Real”ına dəstək ol, müdafiəçimiz yoxdur, hamı zədəlidir”, – başqa bir azarkeş Ramosun paylaşmasını cavablayıb.
“davidperi” ləqəbli istifadəçi isə “Evə qayıtmaq üçün hər şey hazırdır”, yazaraq, Ramosu şirnikləndirməyə çalışıb.
Xatırladaq ki, Ramos 2005-2021-ci illər aralığında “Real”da çıxış edib və “qaymaqlılar”ın döyünən ürəyi olaraq sevilib.
Veteran Ramos 2023-cü ilin iyununda PSJ-dən ayrıldıqdan sonra azad agent statusunda idi. Müdafiəçi doğma klubu “Sevilya”ya qayıdışı üçün maaşında ciddi azalmaya belə, razılaşmış və “Sevilya” ilə müddəti 2023/2024-cü illər mövsümünün sonuna qədər qüvvədə olacaq müqavilə imzalamışdı.
Geridə qalmış 2023/2024-cü illər mövsümündə isə Ramos “Sevilya”nın heyətində bütün yarışlarda 37 oyuna 7 qol vurub, 1 məhsuldar ötürmə verib.
Ramos “Sevilya”nın məzunudur və Əndəlüs komandasının heyətində 2003-2005-ci illərdə çıxış etdiyi dövrdə 50 oyun keçirib, 3 qol vurub. Veteran müdafiəçinin “Sevilya”nın heyətində çıxışının ümumi mənzərəsi isə belədir: 87 oyun, 10 qol, 1 məhsuldar ötürmə.
Ramosun karyerasının ən məhsuldar dövrünü “Real”da keçirib
Təcrübəli futbolçu 18 ildən sonra doğma klubuna qayıtmışdı. Müdafiəçi 2005-ci ildə məhz “Sevilya”dan “Real”a keçmişdi. Ramos karyerasının ən məhsuldar dövrünü “Real”da keçirib. İspan müdafiəçi 2015-2021-ci illərdə “Real”ın kapitanı olub. Ramos “Kral klubu” ilə 5 dəfə İspaniya La Liqasını, 2 dəfə İspaniya Kral Kubokunu, 4 dəfə İspaniya Super Kubokunu, 4 dəfə UEFA Çempionlar Liqasını, 3 dəfə UEFA Super Kubokunu, 4 dəfə FIFA Klub Dünya Kubokunu qazanıb.
2021-2023-cü illər aralığında Ramos PSJ-nin heyətində 58 oyun keçirib, 6 qol vurub, 1 məhsuldar ötürmə verib. İspan müdafiəçi parislilərlə 2 dəfə Fransa çempionatını (2021/2022, 2022/2023) və Fransa Super Kubokunu (2022/2023) qazanıb.
Serxio Ramos 2005-ci ilin mart ayında debüt etdiyi İspaniya yığmasının heyətində 180 oyun keçirib, 23 qol vurub, 8 məhsuldar ötürmə verib. Ramos İspaniya yığması ilə DÇ-2010-da, AÇ-2008-də və AÇ-2012-də qalib olub. Müdafiəçi həmçinin İspaniyanın U-19 yığması ilə AÇ-2004-ün qalibi olub.
“Transfermarkt” internet-portalı 38 yaşlı mərkəz müdafiəçisinin transfer dəyərini 1,80 milyon avro məbləğində qiymətləndirir.
