NASA (ABŞ) “Habl” kosmik teleskopundan 100 dəfə iti görən, elm adamlarına yadplanetlilərin dünyalarını aşkarlamaq üçün lazımi məlumatlara yetişməyə kömək edən yeni kosmik teleskop buraxmaq üzrədir.
Ölkə.az Teleqraf.com-a istinadən xəbər verir ki, bu barədə ABŞ agentliyi məlumat yayıb.
Qurum bildirib ki, yeni nəsil kosmik teleskop olan “Nensi Qreys Roman” (Nancy Grace Roman) 2027-ci ilin mayında işə salınacaq və astronomlara qaranlıq enerji, ekzoplanetlər və infraqırmızı astrofizika ilə bağlı elmi sirləri açmağa imkan verəcək.
NASA-ya görə, yeni kosmik teleskop həm də astronomlara yaşayış üçün əlverişli planetlər axtarmağa imkan verəcək gələcək texnologiyalara doğru atılan əsas addım kimi görünür. Missiyanın bir hissəsi gələcək teleskopların yerəbənzər planetləri aşkar etməsinə kömək etmək üçün həlledici ola biləcək “Roman Koronaqraf” sistemini sınaqdan keçirməkdir.
“Olduğumuz yerdən olmaq istədiyimiz yerə çatmaq məqsədilə bu texnologiyanı nümayiş etdirmək üçün bizə “Roman Koronaqrafı” (Roman Coronagraph) lazımdır. Biz öyrəndiyimiz dərsləri NASA-nın yerəbənzər planetlərin axtarışı üçün xüsusi olaraq hazırlanacaq qabaqcıl missiyalarının növbəti nəslinə tətbiq edəcəyik”, - kosmik teleskop layihəsinin iştirakçısı Rob Zellem deyib.
Qeyd olunur ki, alimlər hazırda uzaq günəşlər ətrafında fırlanan planetləri aşkarlamaqla məşğuldurlar. Başqa sözlə, “Roman Koronaqrafı” elm adamlarına yadplanetli aləmlərin axtarışında yeni bir imkan yaradır.
Yeni teleskop həm də ulduzlarından 100 milyon dəfə zəif olan planetləri mövcud kosmik koronaqraflardan 100-1000 dəfə daha yaxşı aşkar etmək üçün nəzərdə tutulub.
